ક્રિકેટ / MS ધોનીએ IPLમાં બનાવ્યો નવો રેકોર્ડ, આવું કરનાર બન્યો પ્રથમ વિકેટકીપર

મહેન્દ્ર સિંહ ધોની માટે મંગળવારનો દિવસ ખૂબ જ સારો રહ્યો. ભલે ચેન્નાઈ સુપર કિંગ્સ પંજાબ કિંગ્સ સામે જીતી શક્યું ન હતું પરંતુ આ મેચ દરમિયાન એમએસ ધોનીએ એક મોટો રેકોર્ડ પોતાના નામે કર્યો. ધોની ઈન્ડિયન પ્રીમિયર લીગ (IPL) ના ઇતિહાસમાં 150 કેચ લેનાર પ્રથમ વિકેટકીપર બન્યો છે. અને આ સાથે જ તેણે દિનેશ કાર્તિકનો રેકોર્ડ તોડી દીધો છે.

150 કેચ સાથે જ બનાવ્યો રેકોર્ડ

પંજાબ કિંગ્સ સામે રવિચંદ્રન અશ્વિનની બોલિંગમાં એમએસ ધોનીએ નેહલ વાઢેરાનો કેચ પકડતા જ આઈપીએલમાં તેના કેચનો આંકડો 150 થઈ ગયો. આઈપીએલમાં આ સિદ્ધિ મેળવનાર તે પ્રથમ વિકેટકીપર છે. આ યાદીમાં બીજું નામ દિનેશ કાર્તિકનું છે, જેણે IPLમાં અત્યાર સુધી 137 કેચ પકડ્યા છે. આ યાદીમાં રિદ્ધિમાન સાહા ત્રીજા સ્થાને છે જેમણે 87 કેચ કર્યા પછી નિવૃત્તિ લઈ લીધી છે. ચોથું નામ ઋષભ પંતનું છે જેણે 76 કેચ લીધા છે અને ક્વિન્ટન ડીકોકે અત્યાર સુધીમાં 66 કેચ લીધા છે.

વિકેટકીપર તરીકે સૌથી વધુ કેચ લેનાર પ્લેયર

• 150 કેચ - મહેન્દ્ર સિંઘ ધોની
• 137 કેચ - દિનેશ કાર્તિક
• 87 કેચ - રિદ્ધિમાન સાહા
• 76 કેચ - રિષભ પંત
• 66 કેચ - ક્વિન્ટન ડીકોક

વધુ વાંચો: આજે અમદાવાદમાં GT અને RR વચ્ચે કાંટે કી ટક્કર, જાણો પિચ રિપોર્ટ અને હેડ ટુ હેડ રેકોર્ડ

ધોનીની શાનદાર ઈનિંગ્સ છતાં ચેન્નાઈ મેચ હાર્યું

પંજાબ કિંગ્સ સામે એમએસ ધોની માટે મેચ ખૂબ જ સારી રહી. ઘણી ચર્ચાઓ પછી ધોનીને પ્રમોટ કરીને પાંચમા ક્રમે બેટિંગ આપવામાં આવી અને તેણે 12 બોલમાં 27 રનની ધમાકેદાર ઇનિંગ રમી. આ ઇનિંગ દરમિયાન તેણે 1 ફોર અને 3 સિક્સર ફટકારી. તેનો સ્ટ્રાઇક રેટ 225 હતો. જોકે તે પાછળથી આઉટ થઈ ગયો અને ચેન્નાઈ સુપર કિંગ્સ મેચ જીતી શક્યું નહીં. એમએસ ધોની અત્યાર સુધી 7, 8 કે 9 નંબર પર બેટિંગ કરતો હતો પરંતુ આ વખતે તે 5મા નંબર પર આવ્યો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ