કાળિયાર કેસ / કોર્ટે સલમાન ખાનને ઉપસ્થિત રહેવા આપ્યો આદેશ, માર્ચમાં થશે આગામી સુનાવણી

Noor

Last Updated: 05:59 PM, 20 December 2019

FOLLOW ON

શેર કરો

બહુચર્ચિત કાળિયાર કેસમાં બોલિવૂડ અભિનેતા સલમાન ખાનને 7 માર્ચના રોજ જિલ્લા અને સેશન કોર્ટ જોધપુર જિલ્લામાં ઉપસ્થિત થવાના આદેશ અપાયા છે. કાળિયાર કેસમાં આરોપી સલમાન ખાન અને રાજ્ય સરકાર તરફથી દાખલ કરાયેલી અપીલ પર જિલ્લા અને સેશન કોર્ટ જોધપુર જિલ્લામાં સુનાવણી થઇ હતી. ત્યાં સલમાન તરફથી રજૂ કરાયેલી સ્થાયી હાજરી માફી પર પણ સુનાવણી થવાની હતી, પરંતુ એડ્વોકેટ વિશ્નોઇએ પ્રાર્થનાપત્ર પર જવાબ આપવા માટે સમય માગ્યો. તેથી આ કેસની સુનાવણી આગળ ન વધી શકી.

કાળિયાર કેસમાં 7 માર્ચે આગામી સુનાવણી
કોર્ટનો સલમાનને સુનાવણીમાં હાજર રહેવા આદેશ
સલમાન ખાનને ફરજિયાત ઉપસ્થિત રહેવું પડશે

સેશન જજ ચંદ્રકુમાર સોનગરાએ સલમાન ખાનને આગામી સુનાવણી દરમિયાન કોર્ટમાં ઉપસ્થિત રહેવાના આદેશ આપ્યા છે. આ કેસમાં હવે આગામી સુનાવણી 7 માર્ચે થશે, જ્યાં સુનાવણી દરમિયાન સલમાન ખાને ફરજિયાત કોર્ટમાં હાજર રહેવું પડશે. કાળિયાર કેસમાં જોધપુર કોર્ટે ૫ એપ્રિલ, 2018ના રોજ સલમાન ખાનને દોષી જણાવીને પાંચ વર્ષની સજા ફરમાવી હતી તો બીજી તરફ અભિનેતા સૈફ અલી, નીલમ, તબ્બુ, સોનાલી બેન્દ્રે અને સ્થાનિક યુવક દુષ્યંતસિંહને શંકાનો લાભ આપીને મુક્ત કર્યાં હતાં.

સલમાનને સજા ફરમાવવા વિરુદ્ધ જિલ્લા કોર્ટમાં અરજી કરાઇ હતી, જેના પર ગઇ કાલે સુનાવણી દરમિયાન સલમાન ખાનના એડ્વોકેટ તરફથી રજૂ કરાયેલી સ્થાયી હાજરી માફીની અરજી પર જવાબ માટે સરકારી વકીલે સમય માગ્યો. અપીલ પર સુનાવણી કરતાં કોર્ટે સલમાનના એડ્વોકેટ અને સરકારી વકીલને પૂછ્યું કે સલમાન ખાન કેટલા વખતથી કોર્ટમાં સુનાવણી દરમિયાન હાજર રહ્યો નથી. એડ્વોકેટ તરફથી જવાબ અપાયો કે સજાના આદેશ બાદથી સલમાન ખાન અપીલ પર સુનાવણી દરમિયાન કોર્ટમાં આવ્યો નથી. સેશન જજ ચંદ્રકુમાર સોનગરાએ આગામી સુનાવણી પર સલમાન ખાનને ફરજિયાત ઉપસ્થિત રહેવાના આદેશ આપ્યા હતા.

સંકળાયેલા મુદ્દાઓ

Blackbuck poaching case Kadiyar case Salman khan આરોપી સલમાન ખાન કાળિયાર કેસ Kadiyar case