અમદાવાદના બોપલ વિસ્તારમાં પણ બાળક ઉઠાવી જતી ગેંગ ફરતી હોવાની અફવા ચાલતી હોવાથી સોસાયટીના ચેરમેનોએ રહીશોને આવી અફવાઓથી દૂર રહેવા અપીલ કરી છે.
અમદાવાદમાં 15 દિવસથી અફવાનું બજાર ગરમ
બાળકોને ઉઠાવી જતી ગેંગ સક્રિય થઈ હોવાની અફવા
અફવાના પગલે બોપલ પોલીસની લોકોને અપીલ
અમદાવાદ શહેરમાં છેલ્લા 15 દિવસથી બાળકોને ઉઠાવી જતી ગેંગ સક્રિય થઈ હોવાની અફવા વચ્ચે લોકોમાં ભય છે. જોકે પોલીસ ચોપડે આવી એક પણ ફરિયાદ નોંધાઇ નથી. અમદાવાદના બોપલ વિસ્તારમાં વોટ્સએપ ગ્રુપમાં બાળકો ઉપાડી જતી ટોળકીના ફોટો-વીડિયો વાયરલ થતા અફવાનું જોર પકડ્યું છે. જેમાં અજાણી સ્ત્રી સોસાયટીમાં રમતા બાળકને લાલચ આપીને ઉઠાવી જતી હોવાની અફવા ચાલી રહી છે. પરંતુ આવો કોઈ બનાવ બન્યો નથી.
પોલીસે ચેરમેનોને જણાવ્યું અને ચેરમેનોએ રહીશોને આપી સલાહ
કોઈ આવી ઘટના પ્રકાશમાં ન આવતા બોપલ પોલીસે તમામ સોસાયટીના ચેરમેનોને એક ઈ-મેઈલના માધ્યમથી જણાવ્યું હતું કે આવી અફવાઓથી દૂર રહેવું અને શંકાસ્પદ વ્યક્તિ હોય જેની જાણ પોલીસને કરવી. ત્યારે સોસાયટીના ચેરમેનોએ પણ તકેદારીના ભાગરૂપે રહીશોને આ રીતે અફવા ન ફેલાવી અને પોતાના બાળકોનું ધ્યાન રાખવા જણાવ્યું હતું.
વાલીઓ બાળકોને એકલા બહાર રમવા જવા નથી દેતા
બાળ તસ્કરીની અફવાને પગલે બોપલમાં સોસાયટીઓ દ્વારા સિક્યુરિટી ગાર્ડ અને સીસીટીવીથી શંકાસ્પદ વ્યક્તિઓની હિલચાલ પર ધ્યાન રાખી રહ્યા છે. ત્યારે અફવાને લઈ લોકોમાં એક ભયનો માહોલ ફેલાતા સાઇકલ અથવા વાહન લઈને સ્કૂલે જતા બાળકોને તેમના વાલીઓ વાહન પર લેવા મુકવાનું શરૂ કર્યું છે. બાળકોને એકલા બહાર રમવા જવા દેતા નથી અને વાલીઓ તેમની આસપાસ રહે છે. ત્યારે સોશિયલ મીડિયા પર વાયરલ થયેલા ફોટો-વીડિયોને અફવા પર ધ્યાન ન આપી કાયદો હાથમાં ન લેવા સોસાયટીના ચેરમનોએ અપીલ કરી છે..
થોડા દિવસો પૂર્વે નરોડા નજીક કૃષ્ણનગર વિસ્તારમાં ઝડપાયા હતા 2 શખ્સો
તાજેતરમાં અમદાવાદના નરોડા અને ગોતામાં તરુણના અપહરણની ઘટના પ્રકાસમાં આવી હતી. જેને લઈને બાળકો ઉઠાવતી ગેંગ સક્રિય થઇ હોવાની ચર્ચા જાગી હતી આથી લોકોમાં ભયનો માહોલ પેદા થયો હતો. તેવી ચર્ચા અને ભયના વાતાવરણ વચ્ચે આજે અમદાવાદમાંથી બાળકોને ઉઠાઈ જતી ગેંગના બે શખ્સો પકડાયા હતા. શહેરના નરોડા નજીક કૃષ્ણનગર વિસ્તારમાં 2 શખ્સો ઝડપાતા ચકચાર મચી જવા પામી હતી. લોકોની નજરે ચડેલા શખ્સો ભગવા કપડા પહેરીને કાળા કામ કરતા હોવાનું સામે આવ્યું છે. બીજી તરફ વિધર્મીઓ ભગવા કપડા પહેરીને બાળકોને ઉઠાવતા હોવાનો દાવો પણ કરવામાં આવી રહ્યો છે. આ અંગે સ્થાનિકોને જાણ થતાં લોકોના ટોળેટોળે એકઠા થઇ ગયા હતા અને સ્થાનિકોએ શખ્સોને લમધારી પોલીસ હવાલે કર્યા હતા.