તસ્કરોનો તરખાટ / અમદાવાદમાં ઘરની બહાર પાર્ક કરતા કાર માલિકો ચેતી જજો, નહીંતર પસ્તાશો

• કારનો કાચ તોડી ચોરી કરતી ગેંગનો આતંક
• બે કારમાંથી રૂપિયા 1.50 લાખ ઉઠાવી ગયા
• સેટેલાઈટ ખાતે એકાઉન્ટન્ટ અને નિકોલમાં ચોરી કરી તસ્કરો ફરાર

જયેશ તેરૈયાએ પોલીસ સ્ટેશનમાં ચોરીની ફરિયાદ કરી

જોધપુરના શુભ દર્શનમાં રહેતા જયેશ તેરૈયાએ પોલીસ સ્ટેશનમાં ચોરીની ફરિયાદ કરી છે. જયેશ ઘર બેઠા એકાઉન્ટન્ટ તરીકે કામકાજ કરે છે. જયેશ ગઈ કાલે તેમની કાર લઈને થલતેજ રસ્તા પાસે મિત્રનાં લગ્નની કંકોતરી કુરિયર કરવા માટે ગયા હતા. જયેશે મુક્તિધામ પાસે આવેલ સર્વિસ રોડ પર કાર પાર્ક કરી હતી. જયેશ કામ પૂરું કરીને કાર પાસે પરત આવ્યાં ત્યારે કારનો કાચ તૂટેલો હતો. અજાણ્યા શખ્સો તેમની કારનો કાચ તોડી બેગમાંથી રોકડા ૫૦,૦૦૦ તેમજ અગત્યના ડોક્યુમેન્ટની ચોરી કરી ફરાર થઇ ગયા હતા.

દહેગામમાં ગઠિયો એક લાખ રોકડા લઇ ફરાર

બીજી તરફ દહેગામ રહેતા વકીલે પણ તેમની કારનો કાચ તોડી ચોરી થયાની ફરિયાદ નિકોલ પોલીસ સ્ટેશનમાં નોંધાવી છે. દહેગામ સિવિલ કોર્ટના વકીલ   વિપુલભાઈ બારોટ તેમની કાર લઈને બહેનના જન્મ દિવસ માટે નિકોલ ખાતે આવેલ શબરી હોટલમાં જમવા માટે ગયા હતા. વકીલ પાર્કિંગમાં કાર પાર્ક કરીને જમવા માટે ગયા હતા. ત્યારે ગઠિયો કારનો કાચ તોડી એક લાખ રોકડા તેમજ અગત્યના ડોક્યુમેન્ટ સહિતની ચોરી કરીને ફરાર થઇ ગયો હતો 

પોલીસે ફરિયાદના આધારે ગુનો નોંધ્યો

આ અંગેની જયેશભાઇ અને વિપુલભાઈએ વસ્ત્રાપુર અને નિકોલ પોલીસ સ્ટેશનમાં ફરિયાદ નોંધાવી હતી. પોલીસે ફરિયાદના આધારે ગુનો નોંધી આસપાસના સીસીટીવી ફૂટેજ મેળવીને તપાસ શરૂ કરી છે. પોલીસને શંકા છે કે આ ત્રણેય ઘટનામાં એક જ ગેંગનો હાથ હોઇ શકે છે. 

ચોરી કરતી ગેંગ શહેરમાં ફરી સક્રિય

શહેરમાં રોકડ રકમ, કીમતી માલ સામાન, સોના-ચાંદીના દાગીના, લેપટોપ, રિવોલ્વર જેવી વસ્તુઓ કારમાં રેઢી મૂકીને બહાર નીકળવાનો પ્રયાસ કરતાં પહેલાં એક હજાર વાર વિચારજો. કારણ કે અલગ અલગ મોડસ ઓપરેન્ડીનો ઉપયોગ કરી કારમાંથી ચોરી કરતી ગેંગ શહેરમાં ફરી સક્રિય થઇ છે. જે ગણતરીની સેકન્ડોમાં ચોરીની ઘટનાને અંજામ આપી નાસી જાય છે. સામાન્ય રીતે માસૂમ દેખાતાં બાળકો પર કોઈ ખાસ નજર રાખતું હોતું નથી. જેના કારણે ચોર ટોળકીઓ આ વાતનો ભરપૂર ફાયદો ઉઠાવતી હોય છે. લગ્ન પ્રસંગ હોય કે પછી કોઇ પણ અન્ય જગ્યા. કારના કાચ પર કપડું રાખી આસાનીથી તેને તોડ્યા બાદ કારમાં રહેલી કીમતી ચીજવસ્તુઓ ચોરી લેતી આ ગેંગ છે

આ ગેંગમાં 12 થી 15 વર્ષના ટાબરિયાઓનો ઉપયોગ કરાય છે

લગ્ન પ્રસંગમાં વર કન્યા બંને પક્ષના મોટી સંખ્યામાં મહેમાનો આવતા હોવાથી આ દિવસે કોણ કોના ત્યાં મહેમાન છે તેનો કોઈને પણ ખાસ ખ્યાલ હોતો નથી. આવા સમયે લગ્ન સમારંભ અને પાર્ટી પ્લોટમાં તેમજ કારના કાચ તોડી ચોરી કરતી ગેંગ સક્રિય થઇ જાય છે. આ ચોરી કરનાર ગેંગમાં ૧રથી ૧પ વર્ષનાં ટાબરિયાં (બાળકો)નો ઉપયોગ કરાતો હોય છે. આ ટાબરિયાંઓને ચોરી કરતાં પહેલાં ખાસ તાલીમ આપવામાં આવે છે. ત્યારબાદ આ ટાબરિયાંઓને સારા કપડાં પહેરાવીને રિક્ષા તથા અન્ય વાહન દ્વારા લગ્ન સ્થળે લઇ જવામાં આવતાં હોય છે. આ ટાબરિયાંઓને ખાસ કરીને વર અને કન્યાના સંબંધીઓની ઓળખ મેળવીને તેમને ટાર્ગેટ બનાવવાનું કહેવામાં આવતું હોય છે.