લૉકડાઉન / ના હોય, ખરેખર? ખેતરમાં જોવા મળતું આ પ્રાણી અમદાવાદના રસ્તા પર ફરતું દેખાયું

• અમદાવાદને ફળ્યું લૉકડાઉન
• હવા-પાણી શુધ્ધ થયાં 
• રસ્તા પર નીલગાય લટાર મારતી જોવા મળી 

ક્યાં લૉકડાઉનના લીધે હવા શુધ્ધ બની તો દેશના કોઇ શહેરમાંથી 200 કિલોમીટર દૂર રહેલો હિમાલય દેખાવા લાગ્યો, ઓસ્ટ્રેલિયાના રસ્તા પર હરણ ફરતા જોવા મળ્યા તો થાઇલેન્ડમાં વાંદર ટોળી સૂમસાન પડેલા રસ્તા પર તોફાન કરતી નજરે ચડી હતી. આવો જ લૉકડાઉનનો ફાયદો ગુજરાતને પણ થયો હતો. જ્યાં સૌથી વધુ કોરોના વાયરસના કેસ છે તેવા અમદાવાદના રસ્તા પર નીલગાય ટહેલવા નીકળી હોય તેવા દ્રશ્યો કચકડે કેદ થયાં હતા. 

નીલગાય ફરતી રહી રસ્તા પર 

સામાન્ય રીતે ટ્રાફિકથી સતત ધમધમતા રહેતા અમદાવાદમાં ક્યારેક ગાય-ભેંસ સિવાય માત્ર વાહનો જોવા મળે તે રસ્તા પર નીલગાય ફરતી જોવા મળી હતી. ઉલ્લેખનીય છે કે, અમદાવાદના સીજી રોડ ખાતે ભર બપોરે એક નીલગાય ફરતી હોય તેવા દ્રશ્યો સર્જાતા, રસ્તા પર પસાર થનાર લોકોમાં પણ કૌતુક સર્જાયું હતું. 

જોનારાએ ઘટનાને કેમેરામાં કેદ કરી 

નોંધનીય છે કે, અમદાવાદમાં સૌથી વધુ કોરોના વાયરસના કેસ નોંધાયા છે ત્યારે મોટા ભાગના લોકો લૉકડાઉનને કારણે ઘરમાં પુરાયેલા છે. રસ્તા પર હાલ માત્ર કોરોના સામેની જંગ લડતા લડવૈયા જ જોવા મળી રહ્યા છે. ત્યારે નીલગાયને રસ્તા પર જોનારા તમામ લોકોએ પોતાના ફોનમાં આ ઘટનાને કેદ કરી હતી. 

અમદાવાદને ફળ્યું લૉકડાઉન 

નોંધનીય છે કે, અમદાવાદને લૉકડાઉન ફળ્યું છે કારણ કે,  શહેરમાંથી પ્રદૂષણની માત્રા સાવ ઘટી ગઈ અને એર ક્વોલિટી ઈન્ડેક્સ જે 300થી વધુ રહેતો હતો તે આજે 70-75 પર આવી ગયો. સાબરમતી નદીનું પાણી ચોખ્ખું થઈ ગયું અને આજે તો સાવ ચમત્કારી પરિવર્તન જોવા મળ્યું છે.