Black Sea Drone Attack / રશિયન ડ્રોને તુર્કીના કાર્ગો શિપને નિશાન બનાવ્યું, કેપ્ટનનું મો*ત, શિપમાં સવાર 3 ભારતીયોમાંથી એક ઘાયલ

કાળા સમુદ્રમાં એક કાર્ગો જહાજ પોતાની મુસાફરી પર આગળ વધી રહ્યું હતું. જહાજનું ગંતવ્ય ઇટાલીનું રેવેના હતું. પરંતુ સફર દરમિયાન અચાનક ડ્રોન હુમલાએ આખી પરિસ્થિતિ બદલી નાખી. રશિયન ડ્રોન દ્વારા જહાજને નિશાન બનાવવામાં આવ્યા હોવાના અહેવાલો વચ્ચે હુમલા બાદ એમવી રોયાદ મામ્માડોવમાં આગ લાગી અને અંતે જહાજ ડૂબી ગયું.

આ કાર્ગો જહાજમાં કુલ ત્રણ ભારતીય નાગરિકો સવાર હતા. હુમલામાં જહાજના કેપ્ટનનું મોત થયું હતું, જ્યારે ત્રણ ભારતીય ક્રૂ સભ્યોમાંથી એક ઘાયલ થયો હતો. જોકે રાહતની વાત એ છે કે રોમાનિયામાં ભારતીય દૂતાવાસે ત્રણેય ભારતીય નાગરિકો સુરક્ષિત હોવાની માહિતી આપી છે. હુમલા બાદ જહાજમાં આગ લાગતાં બચાવ કામગીરી શરૂ કરવામાં આવી હતી. અહેવાલો અનુસાર, જહાજમાં સવાર 11 ક્રૂ સભ્યોને બચાવી લેવામાં આવ્યા હતા. ઘાયલ ભારતીય ક્રૂ સભ્યને સારવાર માટે રોમાનિયાની એક હોસ્પિટલમાં લઈ જવામાં આવ્યો હતો.

રોયાદ મામ્માડોવ પર થયેલા હુમલા અંગે માહિતી મળી

રોમાનિયામાં ભારતીય દૂતાવાસે જણાવ્યું હતું કે તેમને કાળા સમુદ્રમાં વ્યાપારી જહાજ એમવી રોયાદ મામ્માડોવ પર થયેલા હુમલા અંગે માહિતી મળી હતી. ત્યારબાદ દૂતાવાસે ત્રણેય ભારતીય નાગરિકોનો સંપર્ક કર્યો હતો અને તેમની સ્થિતિ અંગે માહિતી મેળવી હતી. દૂતાવાસના નિવેદન અનુસાર, ત્રણેય ભારતીય નાગરિકો સુરક્ષિત છે. દૂતાવાસે જણાવ્યું હતું કે અધિકારીઓએ તેમની સાથે વાત કરી છે અને તેમાંથી એક ભારતીય નાગરિક ઘાયલ થયો છે, જેની સારવાર ચાલી રહી છે. દૂતાવાસે વધુમાં કહ્યું કે તે હોસ્પિટલના અધિકારીઓ સાથે સતત સંપર્કમાં છે અને ઘાયલ ભારતીય ક્રૂ સભ્યને શક્ય તમામ સહાય પૂરી પાડવામાં આવી રહી છે.

રોમાનિયન પાણીની બહાર થયો હોવાનું જણાવવામાં આવ્યું

આ હુમલો રોમાનિયન પાણીની બહાર થયો હોવાનું જણાવવામાં આવ્યું છે. યુક્રેનના રાષ્ટ્રપતિ વોલોડીમીર ઝેલેન્સ્કીએ આ હુમલા માટે રશિયાને જવાબદાર ઠેરવ્યું છે. ઝેલેન્સ્કીના જણાવ્યા અનુસાર, બે રશિયન ડ્રોન દ્વારા તુર્કીના એક નાગરિક જહાજને નિશાન બનાવવામાં આવ્યું હતું. હુમલામાં નિશાન બનેલું જહાજ ઇટાલીના રેવેના તરફ જઈ રહ્યું હતું. જહાજ-ટ્રેકિંગ વેબસાઇટ Finder.com અનુસાર, એમવી રોયાદ મામ્માડોવ સેન્ટ કિટ્સ અને નેવિસના ધ્વજ હેઠળ સફર કરી રહ્યું હતું. જહાજે છેલ્લે યુક્રેનના બંદર ઇઝમેલ ખાતે ડોક કર્યું હતું. દરમિયાન, રોમાનિયાના ગૃહ મંત્રાલયે પણ જહાજના 11 ક્રૂ સભ્યોને બચાવવામાં આવ્યા હોવાની માહિતી આપી છે. રોમાનિયન નૌકાદળના અધિકારીઓએ જહાજની ઓળખ એમવી રોયાદ મામ્માડોવ તરીકે કરી હતી.

આ પણ વાંચો : નાઈજીરિયાના ઓન્ડોમાં મિલિટરી ATR-42 વિમાન ક્રેશ, 25 મુસાફરો અને 7 ક્રૂ સહિત તમામ 32 લોકોનાં મો*ત

હાલમાં સૌથી મહત્વની વાત એ છે કે હુમલામાં ત્રણ ભારતીય નાગરિકોમાંથી એક ઘાયલ થયો હોવા છતાં ત્રણેય સુરક્ષિત છે. ભારતીય દૂતાવાસ હોસ્પિટલના અધિકારીઓ સાથે સતત સંપર્કમાં છે અને ઘાયલ ક્રૂ સભ્યને જરૂરી મદદ પૂરી પાડવામાં આવી રહી છે. બીજી તરફ, જહાજના કેપ્ટનના મોત અને જહાજ ડૂબી જવાથી આ હુમલો કાળા સમુદ્રમાં વેપારી જહાજોની સુરક્ષા અંગે ગંભીર ઘટના બની છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ