આંદોલન / રાજુલામાં રેલવેની જમીન મારા માટે માંગી નહોતી, સી.આર પાટીલના નિવેદન પર અંબરિશ ડેરનો પ્રહાર

• રાજૂલામાં રેલ્વેની જમીન મામલે કોંગ્રેસ - ભાજપ સામસામે
• "કેટલાક લોકોએ રેલવેની જમીન પડાવી લેવા પ્રયાસ કર્યો"
• "પાટીલે નારણ કાછડીયાની પીઠ થાપડીએ દુઃખદ બાબત"

રાજુલામાં રેલ્વેની જમીન મામલે કોંગ્રેસ અને ભાજપે સામસામે પ્રહારો કર્યા છે. અમરેલીમાં સી.આર.પાટીલે નિવેદન આપતા કહ્યું કે, કેટલાક લોકોએ રાજુલામાં રેલવેની જમીન બગીચા માટે પડાવી લેવા પ્રયાસ કર્યો. જે બાદ કોંગ્રેસ ધારાસભ્ય અંબરીશ ડેરે પણ વળતો જવાબ આપ્યો છે. ડેરે પ્રતિક્રિયા આપતા કહ્યું, સી.આર.પાટીલે નારણ કાછડીયાની પીઠ થાપડીએ દુઃખદની બાબત છે. સાંસદને જશ જોઇતો હોય તો લઇ લે પરંતુ...રાજુલા સાથે અન્યાય ન કરે.

ગુજરાતમાં રેલવેની 2 હજાર હેકટર જમીન સરપ્લસ છે. રાજુલા નગરપાલિકાએ પત્ર લખી જમીન બ્યુટીફિકેશન માટે માંગી હતી. ભાવનગર DRM સાથે MOU પણ થયા હતાં. નારણ કાછડિયાએ જમીન રાજુલા નગરપાલિકાને મળતી અટકાવી છે. ભાજપને મારી સાથે વાંધો હોઇ શકે પણ રાજુલાના નગરજનો સાથે કેમ વાંધો છે. ભાજપની જશ ખટવાની રાજનીતિ નૈતિક અપરાધ છે. મારે જમીન મારા માટે ક્યાં જોઈતી હતી ? સાંસદને ઠપકો આપવાને બદલે પાટીલ તેમની પીઠ થાપડે છે. અન્યાય કરીને આશીર્વાદ માટે નીકળેલા લોકોએ શરમાવવું જોઇએ. સાંસદને જશ જોઇતો હોય તો એમના હસ્તે લોકાર્પણ કરાવીશું.

જાણો શું છે જમીનનો મામલો

આપને જણાવી દઈએ કે, રાજુલામાં રહેલી રેલવેની જમીનને રાજુલા નગરપાલિકાએ બ્યુટીફીકેશન માટે ઉપયોગમાં માગી હતી આથી રેલવે દ્વારા રાજુલા નગરપાલિકાના સત્તાધીશોને એગ્રીમેન્ટ કરવા બોલાવ્યા હતા અને ત્યારબાદ રેલવે વિભાગ દ્વારા આ જમીન પર ફેન્સિંગનું કામ શરૂ કરવામાં આવ્યું હતું. રેલવેના ફેન્સિંગના કામના કારણે લોકોને અવરજવરમાં પરેશાની થશે તેવા દાવા સાથે આ બાબતે કોંગ્રેસના ધારાસભ્ય અમરીશ ડેરે વિરોધ નોંધાવ્યો હતો. અને જમીનની માગ સાથે અમરીશ ડેરે 16 દિવસનું ઉપવાસ  આંદોલન શરૂ કર્યું છે.