વિશ્વમાં ડંકો! / એશિયન ગેમ્સમાં આજે સિલ્વર ડે: 4 x 400 મીટર દોડમાં ભારતના ખાતામાં આવ્યો રજત મેડલ, લોંગ જમ્પમાં પણ બજરંગ કૂદકો

• ચીનનાં હાંગઝોઉમાં થયેલ એશિયન ગેમ્સમાં ભારતનો દબદબો
• અત્યાર સુધીમાં 60 મેડલ ભારતને નામ
• 16 ગોલ્ડ જ્યારે 24 સિલ્વર મેડલ જીત્યાં

ચીનનાં હાંગઝોઉમાં ચાલી રહેલ એશિયાન ગેમ્સમાં ભારતનું શાનદાર પ્રદર્શન જોવા મળી રહ્યું છે. અત્યારસુધીમાં ભારતે કુલ 60 મેડલ પોતાને નામ કરી લીધાં છે. આજે 4 x 400 મીટરની દોડમાં પણ ભારતે સિલ્વર મેડલ જીત્યું છે. જ્યારે 400 મીટરની રેસમાં ગોલ્ડ મેડલ ભારતનાં નામે થયું છે.

4 x 400ની દોડમાં સિલ્વર જીત્યાં
ભારતને 4 x 400 મીટરની દોડમાં મિક્સ્ડ ટીમનાં ખેલાડી મોહમ્મદ અજમલ, વિદ્યા રામરાજ, રાજેશ રમેશ અને શુભા વેંકટેશને મળીને બ્રોન્ઝ મેડલ જીત્યું હતું જો કે પછી શ્રીલંકાની ટીમ ડિસ્ક્વોલિફાઈ થતાં ભારતને હવે 4 x 400 મીટરની દોડમાં સિલ્વર મેડલ મળશે.

લોન્ગ જંપમાં સિલ્વર
ભારતની મહિલા ખેલાડી એનસી સોજને લોન્ગ જંપમાં દેશને મેડલ અપાવ્યો છે. તેણે 6.63 મીટરનો જંપ લગાવીને સિલ્વર મેડલ જીત્યો હતો.

3000 મીટર સ્ટીપલચેજમાં ભારતને 2 મેડલ
3000 મીટર સ્ટીપલચેજમાં ભારતે 2 મેડલ જીત્યાં છે. પારુલ ચૌધરીએ સિલ્વર જ્યારે પ્રીતિએ બ્રોન્ઝ મેડલ પોતાને નામ કર્યુ છે.

ટેબલ ટેનિસમાં ભારતને બ્રોન્ઝ
સુતીર્થા મુખર્જી અને અહિકા મુકર્જીએ એશિયન ગેમ્સમાં સોમવારે ટેબલ ટેનિસ મહિલા યુગલ સેમિફાઈનલમાં કોરિયા સામે 3.4થી હાર મેળવી. સુતીર્થા અને અહિકાએ 2.3થી હાર્યા બાદ વાપસી તો કરી પરંતુ કોરિયાની સુગિયોંગ પાક અને સુયોગ ચાએ ફાઈનલ ગેમમાં બાજી મારી લીધી. જેના લીધે ભારતે આ ગેમમાં બ્રોન્ઝથી સંતોષ માનવો પડ્યો.

સ્પીડ સ્કેટિંગ ટીમને બ્રોન્ઝ
સ્પીડ સ્કેટિંગ 3000 મીટર રિલેમાં ભારતની મેન્સ ટીમે બ્રોન્ઝ મેડલ જીત્યું. આર્યનપાલ સિંહ ઘુમન, આનંદ કુમાર વેલકુમાર, સિદ્ધાંત કાંબલે અને વિક્રમ ઈંગલેએ 4:10:128 સેકન્ડનાં સમયની સાથે બ્રોન્ઝ મેડલ જીત્યો. ચીને આ ગેમમાં ગોલ્ડ જ્યારે દક્ષિણ કોરિયાએ સિલ્વર મેડલ પોતાને નામ કર્યો.