આગાહી / બ્લેન્કેટ અને સ્વેટરો કાઢીને રાખજો, નહીં તો આ તારીખોમાં ઠુંઠવાઇ જશો, જુઓ શું કહે છે અંબાલાલની આગાહી

• હવામાન નિષ્ણાંત અંબાલાલ પટેલની આગાહી
• રાજ્યમાં 22 ડિસેમ્બરથી કડકડતી ઠંડી જામશે 
• ગુજરાતમાં વાદળછાયુ વાતાવરણ જોવા મળશે

દિવાળી સહિતના તહેવારો બાદ હવે રાજ્યમાં ગુલાબી ઠંડીનું જોર વધવા માંડ્યું છે અને અમદાવાદ સહિત મોટાભાગના વિસ્તારોમાં ઠંડીનો ચમકારો જોવા મળી રહ્યો છે. ત્યારે હવે તહેવારો બાદ વાતાવરણ કેવુ રહેશે? તે મામલે હવામાન નિષ્ણાંત અંબાલાલ પટેલે આગાહી કરી છે અને તેમણે વેસ્ટન ડીસ્ટર્બન્સનો પણ વરતારો આપ્યો છે.

જાન્યુઆરી માસમાં ભુક્કા બોલાવી દે તેવી ઠંડી

હવામાન નિષ્ણાંત અંબાલાલના જણાવાયા અનુસાર 14 થી 16 નવેમ્બર સુધી ચક્રવાત સક્રિય થવાની શક્યતાઓ જોવા મળી રહી છે. ત્યારબાદ આ ચક્રવાતો ડિસેમ્બરની શરૂઆત સુધી રહે તેવી શક્યતાઓ વ્યક્ત કરી છે. સાથે સાથે હવામાન નિષ્ણાતે એવું પણ જણાવ્યું છે કે બંગાળના ઉપસાગર અને અરબ સાગરમાં ભેજના કારણે ગુજરાતના મોટાભાગના શહેરોમાં વાદળછાયુ વાતાવરણ રહેશે. આ ઉપરાંત ઠંડી અંગે તેમણે આગાહી કરતા જણાવ્યું કે શિયાળામાં એક પછી એક વેસ્ટન ડીસ્ટર્બન્સ આવતા જશે અને તેના પરિણામે રાજ્યમાં 22 ડિસેમ્બરથી ઠંડીનો માહોલ શરૂ થશે ખાસ જાન્યુઆરી માસમાં ભુક્કા બોલાવી દે તેવી ઠંડી પડશે.

સાથે સાથે અંબાલાલ પટેલના જણાવાય અનુસાર ફેબ્રુઆરીની શરૂઆતમાં પણ ઠંડીની મોસમ જામશે અને 22 ડિસેમ્બર થી 12 ફેબ્રુઆરી વચ્ચે કડકટથી ઠંડી જોવા મળશે આમ વેસ્ટન ડીસ્ટર્બન્સની અસર વાતાવરણ પર સર્જાય તેવું અંબાલાલે કહ્યું હતું. હવામાન વિભાગની વેબસાઈટ પર આપેલી માહિતી પ્રમાણે વાત કરવામાં આવે તો આજથી પાંચ દિવસ સુધી રાજ્યમાં વરસાદ અંગે કોઈ આગાહી કરવામાં આવી નથી. સમગ્ર રાજ્યમાં સુકુ વાતાવરણ જોવા મળે તેવી શક્યતાઓ જણાવાય છે. લઘુતમ તાપમાન 18 ડિગ્રી સુધી પહોંચી જશે.

તહેવારોમાં જ ગુલાબી ઠંડીનું આગમન

ઉલ્લેખનીય છે કે દિવાળીના તહેવારોમાં જ ગુલાબી ઠંડીનું આગમન થઈ ગયું છે અને હાલ રાજ્યમાં ઉત્તરપૂર્વીય પૂર્વના પવન ફૂંકાતા હોવાથી ગુલાબી ઠંડીનો ચમકારો જોવા મળી રહ્યો છે. રાજ્યના મોટાભાગના શહેરોમાં ઠંડી પડતા હવે મોર્નિંગ વોક કરતા લોકોની સંખ્યામાં પણ વધારો થયો છે.