કાર્યવાહી / ઉત્તર ગુજરાતની 818 પેઢીઓ પર કૃષિ વિભાગનો સપાટો, રૂ. 80 લાખથી વધુનું ખાતર, બિયારણ અને જંતુનાશક દવાનો જથ્થો સીઝ

• ઉત્તર ગુજરાતની 818 પેઢીઓ પર કૃષિ વિભાગની કાર્યવાહી
• રૂ. 82.60 લાખના ખાતર, બિયારણ, જંતુનાશક દવાનો જથ્થો સીઝ
• મહેસાણા જિલ્લામાં રૂ. 26.84 લાખની સામગ્રી સીઝ કરવામાં આવી

રાજ્યના કૃષિ વિભાગ દ્વારા ઉત્તર ગુજરાતની 818 પેઢીઓ પર કડક કાર્યવાહી કરવામાં આવી છે. જેમાં કૃષિ વિભાગ દ્વારા ખાતર, બિયારણ અને જંતુનાશક દવાના જથ્થા મામલે તપાસ હાથ ધરવામાં આવી. જેમાં રૂ. 82.60 લાખના ખાતર, બિયારણ અને જંતુનાશક દવાનો જથ્થો સીઝ કરાયો.

મહેસાણા જિલ્લામાં રૂ. 26.84 લાખની સામગ્રી સીઝ કરાઇ

મહેસાણા જિલ્લામાં 152 પેઢીમાંથી 47 નમૂના લઇને 80 પેઢીને નોટિસ ફટકારાઇ છે તો પાટણ જિલ્લામાં 170 પેઢીમાંથી 21 નમૂના લઇને 57ને નોટિસ ફટકારાઇ. જ્યારે બનાસકાંઠામાં 229 પેઢીમાંથી 37 નમૂના લઇને 41, સાબરકાંઠામાં 145 પેઢીમાંથી 42 નમૂના લઇને 51 અને અરવલ્લીમાં 120 પેઢીમાંથી 28 નમૂના લઇને 47ને નોટિસ ફટકારવામાં આવી.

મહેસાણા જિલ્લામાં રૂ. 26.84 લાખની સામગ્રી કૃષિ વિભાગ દ્વારા સીઝ કરવામાં આવી. સ્ટોક પત્રકમાં ખામી અને લાયસન્સમાં ઉમેરો ન કરવા સહિતના મામલે કૃષિ વિભાગ દ્વારા કાર્યવાહી હાથ ધરવામાં આવી. શંકાસ્પદ બિયારણ અને જંતુનાશક દવાઓનો જથ્થો પણ સીઝ કરાયો છે.

સળગતા સવાલ

ખેડૂતોને કોણ પધરાવે છે આ નકલી બિયારણ?
ખાતર, જંતુનાશક દવા અને બિયારણ નકલી વેચાય છે?
ખેડૂતો સાથે છેતરપિંડી કરનારાને સજા ક્યારે?
પેઢીઓ ક્યાંથી લાવે છે ડુપ્લીકેટ સામાન?
શું ખેડૂતોને ન્યાય મળશે?
નકલી સામાનથી થતાં નુકસાન માટે જવાબદાર કોણ?

કૃષિ વિભાગની છેલ્લાં 3 દિવસમાં 150થી વધુ પેઢીમાં રેડ

બીજી બાજુ સાબરકાંઠામાં પણ નકલી અને શંકાસ્પદ બિયારણ મામલે રેડ પાડવામાં આવી છે. જણાવી દઇએ કે, કૃષિ વિભાગની છેલ્લાં 3 દિવસમાં 150થી વધુ પેઢીમાં રેડ પાડવામાં આવી છે. સાબરકાંઠા જિલ્લામાં 47થી વધુ નમૂના લેવાયા. સાબરકાંઠામાં 55થી વધુ પેઢીઓને નોટિસ ફટકારાઈ છે. સ્ટોક પત્રકમાં ખામી અને લાયસન્સમાં ઉમેરો ન કરવો સહિતની ખામીઓ જાણવા મળી. શંકાસ્પદ બિયારણ અને જંતુનાશક દવાઓ ખાતરના નમૂના લઇને સીઝ કરાયા. તમને જણાવી દઇએ કે, સાબરકાંઠા જિલ્લો બિયારણ મામલે રાજ્યભરનું હબ છે. ત્યારે નકલી અને શંકાસ્પદ બિયારણથી જગતનો તાત ચિંતિત છે.