ભયાનક / કેનેડામાં 13 અલગ અલગ સ્થળોએ છરીનાં હુમલામાં 10 લોકોનાં મોત, 15 ઘાયલ, સ્થાનિકોમાં ફફડાટ

• કેનેડામાં 13 સ્થળોએ છરીનાં હુમલા 
• 10 લોકોના મોત, 15 લોકો ઘાયલ
• બે શકમંદોની તસવીરો જાહેર

કેનેડાના સાસ્કાચેવાન પ્રાંતમાં મોટો હુમલો થયો છે. 13 સ્થળોએ છરીના હુમલામાં 10 લોકોના મોત થયા છે જ્યારે 15 લોકો ઘાયલ થયા છે.

બે શકમંદોની તસવીરો જાહેર

આ હુમલા જેમ્સ સ્મિથ ક્રી નેશન અને વેલ્ડન વિસ્તારમાં થયા છે. પોલીસ બે શકમંદોને શોધી રહી છે. તેમની શોધખોળ માટે દરોડા પાડવામાં આવી રહ્યા છે. કેનેડિયન પોલીસે આ બે શકમંદોની તસવીરો પણ જાહેર કરી છે.

Stabbings in Canada kill 10, wound 15; suspects at large, reports AP. PTI

— Press Trust of India (@PTI_News) September 5, 2022

13 અલગ અલગ સ્થળોએ થયા હુમલા 

જે શકમંદોના ફોટા જાહેર કરવામાં આવ્યા છે તેઓ ડેમિયન સેન્ડરસન અને માઈલ્સ સેન્ડરસન છે. કાળા રંગની કારમાં નાસતા ફરતા બંનેએ આ ગુનાને અંજામ આપ્યો છે. રોયલ કેનેડિયન માઉન્ટેડ પોલીસના મદદનીશ પોલીસ કમિશનર રોન્ડા બ્લેકમોરે જણાવ્યું હતું કે પ્રથમ ઘટના સ્થાનિક સમય મુજબ સવારે 5:40 વાગ્યે નોંધાઈ હતી. સાસ્કાચેવનમાં ઓછામાં ઓછા 13 સ્થળોએ પીડિતો મળી આવ્યા છે.

સિવિલ ઈમરજન્સી લાદવામાં આવી

પોલીસ કમિશનર રોન્ડા બ્લેકમોરે કહ્યું કે તાજેતરના વર્ષોમાં બનેલી આ સૌથી મોટી ઘટના છે. રવિવારે હિંસાને કારણે સિવિલ ઈમરજન્સી લાદવામાં આવી છે. એક સંદેશમાં, બ્લેકમોરે બંને શકમંદોને કહ્યું કે જો ડેમિયન અને માઈલ્સ સાંભળી રહ્યા હોય અથવા માહિતી મેળવતા હોય, તો તેઓએ તરત જ પોતાને પોલીસને સોંપી દેવા જોઈએ. તો જ્યારે કેનેડાના વડાપ્રધાન જસ્ટિન ટ્રુડોએ આ ઘટનાને ભયાનક ગણાવી છે.

વડાપ્રધાન જસ્ટિન ટ્રુડોએ ઘટનાને ભયાનક ગણાવી
જસ્ટિન ટ્રુડોએ ટ્વીટ કરીને છરા મારવાની આ ઘટનાઓને ભયાનક અને હૃદયદ્રાવક ગણાવી હતી. મૃતકો અને પરિવારજનો પ્રત્યે સંવેદના પણ વ્યક્ત કરવામાં આવી છે. જસ્ટિન ટ્રુડોએ લખ્યું હતું કે અમે પરિસ્થિતિ પર નજીકથી નજર રાખી રહ્યા છીએ અને દરેકને સ્થાનિક અધિકારીઓના અપડેટ ફોલો કરવા વિનંતી કરીએ છીએ.