ટીમ ઇન્ડિયાની ધમાકેદર જીત બાદ રોહિત શર્મા અને વિરાટ કોહલી સહિત તમામ ખેલાડીઓ જશ્નમાં મગ્ન થયા હતા. તો પૂર્વ કોચ રવિ શાસ્ત્રી માઇક પર મોર્ચો સંભાળતા જોવા મળ્યા. ત્યારે જીતના જશ્નમાં ગ્રાઉન્ડ પર એક એવા દ્રશ્ય જોવા મળ્યા કે ફેન્સનો ઉત્સાહ બેવડાઇ ગયો. ક્રિકેટ ગ્રાઉન્ડ પર જોવા મળેલા આ દ્રશ્યનો વીડિયો ભારે વાયરલ થયો છે.
રવિશાસ્ત્રીને ગિફ્ટ કરી શેમ્પેઇનની બોટલ
રવિશાસ્ત્રીએ મેન ઑફ ધ મેચ , સદી ફટકારનાર પંતના હાથમાંથી શેમ્પેનની બોટલ લીધી ત્યારે દર્શકોનો ઉત્સાહ બમણો થઇ ગયો હતો. મસ્ત મૌલા શાસ્ત્રીએ પણ ચીયર્સ સ્ટાઈલમાં બોટલ ઉંચી કરીને શ્રોતાઓનું અભિવાદન ઝિલ્યુ હતું. આ ક્ષણનો વીડિયો વાયરલ થઈ રહ્યો છે. મહત્વનુ છે કે સિરિઝમાં કોમેન્ટ્રી કરતા જોવા મળેલા રવિ શાસ્ત્રીને જોઈને વિરાટ કોહલીએ શેમ્પેનની ઓફર કરી હતી, પરંતુ પૂર્વ કોચે ના પાડી દીધી હતી. આ પછી ઈંગ્લેન્ડ સામેની જીતનો હીરો રિષભ પંત શાસ્ત્રીને મળ્યો અને બળજબરીથી પોતાની શેમ્પેનની બોટલ ગિફ્ટ કરી દીધી.
ભારતે ઈંગ્લેન્ડને 5 વિકેટથી હરાવીને વન-ડે શ્રેણી જીતી લીધી છે. મેનચેસ્ટરમાં રમાયેલી આ મેચમાં ટીમ ઇન્ડિયાને જીત માટે 260 રનનો ટાર્ગેટ મળ્યો હતો, જેને ભારતીય ટીમે 5 વિકેટ ગુમાવીને મેળવી લીધો. આ જીત સાથે જ ભારતે વનડે સીરીઝ પર 2-1થી કબજો કરી લીધો. ભારતીય ટીમમાં ઋષભ પંત અને હાર્દિક પંડ્યા હીરો બનીને ઉભર્યા. પંતે શાનદાર 125 રનોની ઇનિંગ રમી.
પંત-હાર્દિકે કર્યો કમાલ
72 રન પર ચાર વિકેટ પડ્યા બાદ ઋષભ પંત અને હાર્દિક પંડ્યાએ 133 રનોની ભાગીદારી કરી હાથમાંથી જતી મેચ બચાવી. હાર્દિકે 55 બોલમાં 71 રન બનાવ્યા, જેમાં 10 ચોગ્ગા સામેલ હતા. ઋષભ પંત 113 બોલ પર 125 રન બનાવીને અણનમ રહ્યા. પંતે પોતાની ઇનિંગમાં 16 ચોગ્ગા અને 2 છગ્ગા લગાવ્યા. પંતની વનડે ઇન્ટરનેશનલની આ પહેલી સદી રહી. બન્નેની બેટિંગનું પરિણામ હતું કે ભારતે 47 બોલ બાકી રહેતા જ ટાર્ગેટ મેળવી લીધો. ભારત તરફથી હાર્દિક પંડ્યાએ શાનદાર બોલિંગ કરતા ચાર વિકેટ ઝડપી. ત્યારે યુજવેન્દ્ર ચહલે ત્રણ અને સિરાજે 2-2 વિકેટ ઝડપી.