સુવિધા / ઋષિકેશ પટેલની મોટી જાહેરાત : 1 મહિનામાં જ તમામ તાલુકામાં શરૂ કરાશે નિઃશુલ્ક ડાયાલિસિસ સેન્ટર

• ડાયાલિસિસના દર્દીઓ માટે આરોગ્ય મંત્રી ઋષિકેશ પટેલની જાહેરાત
• રાજ્યના તમામ તાલુકાઓમાં કિડની ડાયાલિસિસ સેન્ટર શરૂ કરાશે
• હાલ 82 જગ્યાએ કિડની ડાયાલિસિસ સેન્ટર કાર્યરત

દેશ અને ગુજરાતમાં કિડનીના રોગોનું પ્રમાણ ખુબ જ ઝડપથી વધી રહ્યું છે. ત્યારે વધતી કિડની ફેલ્યોરની સમસ્યામાં ડાયાલિસિસની જરૂરિયાત પણ વધી રહીં છે એવામાં આજે અમદાવાદ સિવિલ કેમ્પસ ખાતેના અંગદાનના એક કાર્યક્રમમાં આરોગ્ય મંત્રી ઋષિકેશ પટેલે ડાયાલિસિસિ અંગે મહત્વની જાહેરાત કરતા જણાવ્યુ હતુ કે આગામી એક મહિનામાં રાજ્યના તમામ તાલુકાઓમાં દર્દી ડાયાલિસિસ કરાવી શકે એ પ્રકારની વ્યવસ્થા ગોઠવવા જઇ રહ્યાં છે.હાલ 160 જેટલા તાલુકાઓમાં ડાયાલિસિસ સેન્ટર નથી જેથી આ કામ આગામી ટૂંક જ સમયમાં પૂર્ણ થાય તે તરફ રાજ્ય સરકાર આગળ વધી રહીં છે.

ડાયાલિસિસ એટલે શું ??
કિડની સંબંધિત રોગોથી ધીમેધીમે બંન્ને કિડનીની કાર્યક્ષમતામાં નોંધપાત્ર ઘટાડો અથવા કિડની કામ કરતી બંધ થઇ જાય. બંન્ને કિડની બંધ થઇ જાય ત્યારે શરીરમાં ભેગા થતા બિનજરૂરી તત્વો, પદાર્થો અને વધારાના પ્રવાહી , ક્ષાર અને એસિડ જેવા રસાયણોને કૃત્રિમ રીતે દૂર કરવાની, શુદ્ધિકરણ કરવાની પદ્ધતિને ડાયાલિસિસ કહેવાય છે.

અસારવા સિવિલમાં અંગદાન ઋણ સ્વીકારનો હતો કાર્યક્રમ
ગુજરાત રાજ્યમાં અંગદાનનું મહત્વ ધીમે ધીમે વધી રહ્યું છે ત્યારે આજે અમદાવાદ ખાતે અંગદાન કરનાર વ્યક્તિઓનો ઋણ સ્વીકાર કરી તેમના પરિવારોનું સન્માન કરવાનો કાર્યક્રમ અસારવા સિવિલ હોસ્પિટલ કેમ્પસમાં આવેલા માં શારદા લક્ષ્મી ઓડિટોરિયમ ખાતે યોજવામાં આવ્યો હતો જેમાં આરોગ્ય મંત્રી ઋષિકેશ પટેલ અને ભાજપ પ્રદેશ પ્રમુખ સી.આર પાટીલ હાજર રહ્યાં હતા. વર્ષ 2019થી 2022 સુધીમાં 280 જેટલા અંગદાન મળ્યા છે ત્યારે આ તમામ અંગદાન કરનારના પરિવારોનું સન્માન કરાયુ હતુ. વધુમાં વધુ લોકો અંગદાન તરફ જાગૃત થાય એ અંગે સ્ટેટ ઓર્ગન ટીસ્યુ ટ્રાન્સપ્લાન્ટ ઓર્ગેનાઇઝેશન દ્વારા કાર્યક્રમનું આયોજન કરવામાં આવ્યુ હતું.