BIG BREAKING / NCPનો હાથ છોડી રેશમા પટેલે AAPનું ઝાડું પકડ્યું, ભાજપના આ દિગ્ગજ પાટીદાર ચહેરા સામે ઉતરી શકે છે ચૂંટણી મેદાને

• રેશમા પટેલ આમ આદમી પાર્ટીમાં જોડાયા
• સહ પ્રભારી રાઘવ ચઢ્ઢાએ ખેસ પહેરાવી પાર્ટીમાં આવકાર્યા
• રેશમા પટેલ વિરમગામથી લડી શકે છે ચૂંટણી

ગુજરાત વિધાનસભાની ચૂંટણી ટાણે તડજોડની રાજનીતિ પણ તેજ થઈ ગઈ છે. ભાજપ હોય કે આપ, કે પછી કોંગ્રેસ કદાવર નેતાને પોતાની પડખે કરી રાજકીય ગણિતના સોગઠાં ફીટ બેસાડવામાં ઘણખરા ઉમેદવારોની જાહેરાત બાદ પણ પાછી પાની કરી રહ્યા નથી ત્યારે ગુજરાતના રાજકારણના વધુ એક મોટા સમાચાર સામે આવ્યા છે. NCPના ગુજરાત મહિલા પ્રમુખ રેશમા પટેલે બરોબર ચૂંટણીની મોસમ જામતા જ હવાફેર કરી છે. એટલે કે રેશમા પટેલ આમ આદમી પાર્ટીમાં જોડાયા છે. 

NCPમાંથી આપી દીધું હતું રાજીનામું 
ગુજરાતમાં તમામ પક્ષોના અસંતુષ્ટ નેતાઓ પક્ષ પલટો કરી રહ્યા છે. ટિકિટ ન મળતા રેશમા પટેલે પણ NCPમાંથી રાજીનામું આપી દીધું હતું. તેમણે NCPના તમામ સભ્યપદેથી રાજીનામું આપ્યું હતું. આજે તેઓ આમ આદમી પાર્ટીમાં જોડાઈ ગયા છે.  આમ આદમી પાર્ટીના સહ પ્રભારી રાઘવ ચઢ્ઢાએ પાર્ટીનો ખેસ પહેરાવી તેમને આવકાર્યા છે. 

વિરમગામ બેઠક પરથી ચૂંટણી લડશે?
વધુ મળતી વિગતો પ્રમાણે રેશમા પટેલને હાર્દિક પટેલની સામે એટલે કે વિરમગામ બેઠક પરથી ચૂંટણી મેદાનમાં ઉતારવામાં આવશે તેવા પણ સંકેત મળી રહ્યા છે. વિરમગામ બેઠક પર આપ પાર્ટીએ ઠાકોર સમાજના આગેવાન ચંદુજી ઠાકોરને ટિકિટ આપી છે. રેશમા પટેલના આવવાથી ઠાકોર સમાજમાં પણ રોષની લાગણી જોવા મળી શકે છે. રાજનીતિમાં સમય સાથે બધુ જ નક્કી છે. ત્યારે બુધવારની સાંજ ગુજરાતની રાજનીતિમાં શું નવું લઈને આવે છે તે જોવું રહ્યું. હાલ તો રેશમા પટેલના આપમાં આગમનનો મુદ્દો ગુજરાતમાં ચર્ચાનો વિષય બન્યો છે.  

કોણ છે રેશમા પટેલ ?
- રેશમા પટેલ મૂળ વંથલી તાલુકાના બંટિયા ગામના વતની છે. 
- તેઓ સામાન્ય કડવા પાટીદાર પરિવારમાંથી આવે છે. 
- 2015ના પાટીદાર અનામત આંદોલન બાદ તેઓ પાટીદાર નેતા તરીકે ઉભરી આવ્યા હતા.
- બાદમાં 2017માં ભાજપમાં જોડાઈ રાજકારણમાં ઝંપલાવ્યું હતું.
- ભાજપ સામે પણ વાંધો પડતા તેમણે ભાજપનો છેડો ફાડ્યો હતો.
- ત્યારબાદ તેઓ NCPમાં જોડાયા હતા
- પાર્ટીએ તેમને એનસીપીના ગુજરાત મહિલા પ્રમુખ બનાવ્યા હતા
- ગુજરાત વિધાસભાની ચૂંટણીમાં કોંગ્રેસ અને NCPનું ગઠબંધન થતાં ટિકિટ કપાઈ
- 16 નવેમ્બર, 2022ના રોજ આમ આદમી પાર્ટીમાં જોડાયા