લોકસભા ચૂંટણી 2024 / લોકસભા ચૂંટણી પહેલા જ મોદી સરકાર 3.0 ની તૈયારી શરૂ, કેબિનેટ સચિવની બેઠકમાં આ મુદ્દાઓ પર થશે ચર્ચા

ભારતીય જનતા પાર્ટી (BJP) લોકસભાની ચૂંટણીમાં પોતાની જીતનો વિશ્વાસ ધરાવે છે. ભગવા પાર્ટીને વિશ્વાસ છે કે નરેન્દ્ર મોદી સતત ત્રીજી વખત દેશના વડાપ્રધાન બનશે. સરકારી અધિકારીઓ પણ આ બાબતે પૂરેપૂરા આત્મવિશ્વાસ ધરાવે છે. દેશના ટોચના અધિકારીઓ નવી સરકાર માટે એક્શન પ્લાન બનાવવામાં વ્યસ્ત છે. જો પીએમ મોદી ત્રીજી વખત કાર્યભાર સંભાળે છે તો મંત્રાલયોની સંખ્યામાં ઘટાડો થવાની સંભાવના છે. હાલમાં કુલ 54 મંત્રાલયો છે. આ સિવાય આગામી છ વર્ષમાં વિદેશમાં ભારતીય મિશનની સંખ્યામાં 20 ટકાનો વધારો થવાની પણ સંભાવના છે. ઇન્ફ્રાસ્ટ્રક્ચરમાં વધુ ખાનગી રોકાણ તેમજ પ્રાધાન્યતા પ્રોજેક્ટ્સ માટે જમીન સંપાદન સરળ બનાવવા માટે મિકેનિઝમ વિકસાવવા પર ધ્યાન કેન્દ્રિત કરવામાં આવશે.

કેબિનેટ સચિવ દ્વારા આ મહિને બોલાવવામાં આવેલી બેઠકો દરમિયાન ચર્ચા કરવા માટેના ડ્રાફ્ટ પેપરનો ઉદ્દેશ્ય 2030 સુધીમાં પેન્શન લાભો ધરાવતા વરિષ્ઠ નાગરિકોનો હિસ્સો 22% થી 50% સુધી બમણો કરવાનો છે. તે જ સમયે, મહિલાઓની ભાગીદારી 37% થી વધારીને 50% કરવામાં આવશે. તમને જણાવી દઈએ કે દુનિયામાં આ સરેરાશ લગભગ 47 ટકા છે.

નવી સરકાર ઈ-વાહનોના વેચાણ પર ભાર મૂકશે. તેનો હિસ્સો 7% થી વધારીને 30% થી વધુ કરવાનો લક્ષ્યાંક નક્કી કરવામાં આવ્યો છે. સૂત્રોએ જણાવ્યું હતું કે અદાલતોમાં પેન્ડિંગ કેસોની સંખ્યા હાલમાં 5 કરોડથી ઘટાડીને 2030 સુધીમાં 1 કરોડથી ઓછી કરવાનો લક્ષ્યાંક પણ નિર્ધારિત કરવામાં આવ્યો છે. આ માટે, આગામી છ વર્ષમાં ન્યાયતંત્રમાં ખાલી જગ્યાઓ 22% થી ઘટાડીને 10% કરવાની યોજના છે.

હાલમાં, દેશમાં સંરક્ષણ ખર્ચ જીડીપીના 2.4% થી વધારીને 3% કરવા માટે વિચારણા ચાલી રહી છે. સંશોધન માટે સંરક્ષણબજેટનોહિસ્સો 2% થી વધારીને 3% કરવા પર પણ ચર્ચા થઈ રહી છે .આ સમયગાળા દરમિયાન, સમગ્ર વિશ્વમાં શસ્ત્રોની આયાતમાં ભારતનો હિસ્સો અડધો કરવાની પરિકલ્પના છે. આ દર્શાવે છે કે સરકાર સંરક્ષણ સાધનોના સ્થાનિક ઉત્પાદનને પ્રોત્સાહન આપવા માટે તેના પ્રયત્નોને બમણા કરવા માંગે છે. 

જો કે આમાંના ઘણા મુદ્દાઓ પર પહેલા પણ ચર્ચા કરવામાં આવી છે, પરંતુ ચૂંટણીની જાહેરાત પહેલા પીએમ સાથેની ચર્ચાએ તેમને પાટા પર પાછા લાવી દીધા છે. અગાઉની બેઠક દરમિયાન, અધિકારીઓએ પરિવહન ક્ષેત્રના મંત્રાલયોને મર્જ કરવાની હાકલ કરી હતી. કેબિનેટ સચિવ સ્તરે ચર્ચામાં કહેવામાં આવ્યું છે કે ચીનમાં 26 મંત્રાલયો સાથે સરકાર ચાલે છે, બ્રાઝિલમાં 23 અને અમેરિકામાં માત્ર 15 મંત્રાલયો છે. 

વધુ વાંચોઃ સ્કાયમેટનું અનુમાન: દેશમાં ગરમી અને વરસાદનું ડબલ કોમ્બિનેશન, ગુજરાતની પણ આગાહી કરી

તમને એ પણ જણાવી દઈએ કે નોકરિયાતો આ યોજના પર કામ કરી રહ્યા છે, પરંતુ અંતિમ નિર્ણય રાજકીય હશે કારણ કે સાંસદો અને ગઠબંધન ભાગીદારોને સમાવવા માટે મંત્રાલયોની સંખ્યા વધી છે.

VTV Gujarati Newsની તમામ અપડેટ સૌથી પહેલા મેળ​વ​વા માટે અમારી WhatsApp ચેનલ ફોલો કરો