ઓસ્ટ્રેલિયા / હવે ઘરે જઇને બૉસનો ફોન ઉપાડવો જરૂરી નથી, આ દેશમાં લાગુ થવા જઇ રહ્યું છે વર્કિંગ લૉ બિલ

• હવે ઘરે જઇને બૉસનો ફોન ઉપાડવો જરૂરી નથી
• ઓસ્ટ્રેલિયાની સંસદમાં  લાવવામાં આવી રહ્યો છે નવો કાયદો
• શ્રમ અને રોજગાર મંત્રી ટોની બર્કે આ બિલનો ડ્રાફ્ટ તૈયાર કર્યો

Australia : આપણાં રોજિંદા જીવનમાં ઘણા લોકો એવા હશે કે જેઓ શિફ્ટ પૂરી થયા પછી પણ ઓફિસ કોલ અને મીટિંગમાં વ્યસ્ત રહે છે. ઘણા લોકોને ઘરે ગયા પછી પણ તેમના બોસના મેઈલ કે કોલનો જવાબ આપવો પડે છે. ભારતમાં આ અંગે ભલે કોઈ કાયદો ન હોય, પરંતુ કર્મચારીઓના હિતોની સુરક્ષા માટે ઓસ્ટ્રેલિયાની સંસદમાં નવો કાયદો લાવવામાં આવી રહ્યો છે. શ્રમ અને રોજગાર મંત્રી ટોની બર્કે આ બિલનો ડ્રાફ્ટ તૈયાર કર્યો છે.

થઈ શકે છે બોસને દંડ 
આ કાયદા હેઠળ,કર્મચારીએ શિફ્ટ સમાપ્ત થયા પછી બોસના કૉલ પર હાજરી આપવાની જરૂર રહેશે નહીં. સરળ ભાષામાં કહીએ તો જો તમારી શિફ્ટ પૂર્ણ થઈ જશે તો કોઈ તમને કામ કરવા માટે દબાણ કરી શકશે નહીં. કર્મચારી તેની ફરજ પછી ઓફિસનું કામ કરવા માટે બંધાયેલા રહેશે નહીં. આટલું જ નહીં જો કોઈ બોસ તેના કર્મચારીને ઓફિસ સમય પછી કામ કરાવે તો તેને દંડ પણ લાગશે. પેનલ દંડની રકમ નક્કી કરશે. એટલું જ નહીં કર્મચારીને બોસ સામે ફરિયાદ કરવાનો પણ અધિકાર હશે.

આ દેશોમાં કાયદો છે અસ્તિત્વમાં  
નવો કાયદો કર્મચારીઓને અવેતન ઓવરટાઇમ કામ કરવા માટે પ્રતિબંધિત કરે છે અને તેમને "ડિસ્કનેક્ટ કરવાનો અધિકાર" આપે છે. તમને જણાવી દઈએ કે, ઓસ્ટ્રેલિયામાં ઘણા સમયથી બોસ કલ્ચરને ખતમ કરવાની અને વર્ક-લાઈફ બેલેન્સ હાંસલ કરવાની માંગ કરવામાં આવી રહી છે. કર્મચારીઓને તેમના ઉપકરણોને બંધ કરવાનો અધિકાર આપતા આવા કાયદા ફ્રાન્સ, સ્પેન અને યુરોપિયન યુનિયનના અન્ય દેશોમાં પહેલેથી જ અસ્તિત્વમાં છે.

વધુ વાંચો: માલદીવમાં તૈનાત ભારતીય જવાનોના સ્થાને હવે કોણ? વિદેશ મંત્રાલયે કરી સ્પષ્ટતા

શિફ્ટ પછી કંપનીઓ કામ લઈ શકતી નથી
ઓસ્ટ્રેલિયાના વડા પ્રધાન એન્થોની અલ્બેનિસે અગાઉ કહ્યું હતું કે, દેશની કંપનીઓ અને સરકારી વિભાગોએ કાયદાનું પાલન કરવું પડશે. જો કોઈ વ્યક્તિને 24 કલાક કામ કરવા માટે ચૂકવણી કરવામાં આવતી નથી, તો તેને 24 કલાક હાજર રહેવા માટે કહી શકાય નહીં. આપણે જાણીએ છીએ કે ફરજ પછી કામ કરવાથી તણાવ વધે છે, સ્વાસ્થ્ય બગડે છે અને સંબંધો પણ બગડે છે. ડાબેરી ગ્રીન્સ પાર્ટીએ પણ આને સમર્થન આપતાં કહ્યું હતું કે, ઓસ્ટ્રેલિયનો દર વર્ષે સરેરાશ છ અઠવાડિયા ઓવરટાઇમ કામ કરે છે અને આ માટે તેમને કોઈ વધારાનો પગાર આપવામાં આવતો નથી. આ સમગ્ર અર્થતંત્રમાં 92 બિલિયન ઓસ્ટ્રેલિયન ડોલર ($60.13 બિલિયન) અવેતન પગારની સમકક્ષ છે. હવે પૈસા વગર ઓવરટાઇમ કરી શકાતો નથી.