ગણગણાટ / કાર્તિ ચિદમ્બરમની ટ્વિટ બાદ દેશના નવા નાણામંત્રી તરીકે કે.વી કામથના નામની ચર્ચાએ જોર પકડ્યું

• લૉકડાઉન વચ્ચે નાણામંત્રી બદલાય તેવી ચર્ચા
• કે.વી કામથની નવા નાણામંત્રી તરીકે નિમણૂંકની ચર્ચા
• કાર્તિ ચિદમ્બરમે પણ સ્પષ્ટ સંકેત આપતી ટ્વિટ કરી

લૉકડાઉન અને કોરોના સંકટમાં જ્યાં દેશ આર્થિક ભીંસથી પસાર થઈ રહ્યો છે ત્યારે હાલમાં એક અફવાએ જોર પકડ્યું છે તેવું કહી શકાય. પરંતુ જો આ અફવાને સાચી માનવામાં આવે તો કે.વી કામથની નિર્મલા સીતારામણની જગ્યાએ દેશના નવા નાણામંત્રી તરીકે નિમણૂક કરી શકાય છે. આ ચર્ચાને વધુ જોર ત્યારે મળ્યું જ્યારે કોંગ્રેસ નેતા પી.ચિંદમ્બરમના પુત્ર અને સાંસદ કાર્તિ ચિદમ્બરમે પણ સ્પષ્ટ સંકેત આપતી ટ્વિટ કરી હતી.

ઉલ્લેખનીય છે કે છેલ્લાં કેટલાંક સમયથી આ વાતો સમયાંતરે ઉડતી રહી છે. આ અગાઉ મોદી સરકારના સામાન્ય બજેટ બાદ નિર્મલા સીતારામણની જગ્યાએ કે.વી કામથને નાણામંત્રી બનાવવાની વાત વહેતી થઈ ચૂકેલી છે. ત્યારે ફરી એક વખત દિલ્હીમાં આ ચર્ચાએ જોર પકડ્યું છે. 

મહત્વનું છે કે આ સપ્તાહની શરૂઆત સુધી 72 વર્ષીય કે.વી કામથ 2015માં BRICS દેશોની ન્યૂ ડેવલપમેન્ટ બૅંક (NDB)ના ચૅરમેનપદે કાર્યરત હતાં. તેમના સ્થાને હવે બ્રાઝિલના માર્કોસ પ્રાડો ત્રોજ્યો ચેરમેનપદે નિયુક્ત થયાં છે. 

ચર્ચાએ જોર કેમ પકડ્યું

આ ચર્ચાઓનું જોર પકડવાનું મુખ્ય કારણ કે.વી કામથની PM મોદી સાથેની મુલાકાત છે. તેમણે તાજેતરમાં પ્રધાનમંત્રી સાથે મુલાકાત કરી હતી. આ ઉપરાંત કોંગ્રેસના દિગ્ગજ નેતા પી. ચિદમ્બરમના પુત્ર કાર્તિ ચિદમ્બરમે પણ આ જ વાતનો સંકેત આપતી એક ટ્વિટ કરી હતી. જેના બાદ ચર્ચાએ દિલ્હીમાં વધુ જોર પકડ્યું હતું.

A little birdie tells me that “cometh” the hour in North Block

— Karti P Chidambaram (@KartiPC) May 30, 2020

કોણ છે કે.વી કામથ?

કે.વી કામથ એક જાણીતા બૅન્કર છે અને તેઓ BRICS બૅંકના ચેરમેન બન્યાં તે અગાઉ ઈન્ફોસીસના ચૅરમેનપદે પણ રહી ચૂક્યાં છે. તેમણે પોતાનો પાંચ વર્ષનો કાર્યકાળ પૂર્ણ કર્યા બાદ બ્રિક્સના પાંચ સભ્યોના નેતૃત્વ હેઠળની નેશનલ ડેવલપમેન્ટ બૅંક (NDB)ના અધ્યક્ષપદેથી ગત બુધવારે પદ છોડ્યું હતું. બ્રિક્સ દેશોની નવી બૅંકોનું એકીકરણ કરવામાં તેમનો મહત્વનો ફાળો રહ્યો છે. કામથને સ્ક્રૅચથી બહુપક્ષીય લોન આપનારી સંસ્થાના નિર્માણ કરવાનો મુખ્ય શ્રેય આપવામાં આવે છે. 

જો મોદી સરકાર દેશમાં ચાલી રહેલી આર્થિક કટોકટીની વચ્ચે હાલમાં કે.વી કામથને નાણામંત્રી તરીકે લાવે છે તો સ્ટોક માર્કેટમાં ચોક્કસપણે હકારાત્મક અસર જોવા મળશે તેમ પણ કહેવામાં આવી રહ્યું છે.