મહત્વનો નિર્ણય / હવેથી આ રાજ્યમાં 21 વર્ષથી ઓછી ઉંમરના લોકોને નહીં મળે સિગારેટ, હુક્કા બાર પર પણ પ્રતિબંધ

Karnataka Tobacco Ban: કર્ણાટકમાં સીએમ સિદ્ધારમૈયા સરકારે તમાકુના સેવન અને વેચાણ પર કડક કાર્યવાહી કરવાનો મોટો નિર્ણય લીધો છે. જાહેર સ્થળોએ તમાકુ ઉત્પાદનોના સેવન પર સંપૂર્ણ પ્રતિબંધ મુકવામાં આવ્યો છે. આ સાથે હુક્કાબાર પર પણ પ્રતિબંધ મુકવામાં આવ્યો છે. 21 વર્ષથી ઓછી ઉંમરના લોકો હવે સિગારેટ ખરીદી શકશે નહીં. 

બુધવારે કર્ણાટક વિધાનસભામાં COTPA એક્ટ એટલે કે સિગારેટ એન્ડ અધર ટોબેકો પ્રોડક્ટ એક્ટમાં સુધારો કરવામાં આવ્યો છે. આ કાયદામાં ફેરફાર કરવાના નિર્ણય અંગે મુખ્યમંત્રીએ જણાવ્યું હતું કે લોકોના સ્વાસ્થ્ય અને તમાકુની બનાવટોની ખરાબ અસરોને બચાવવા માટે આ નિર્ણય લેવામાં આવ્યો છે.

કર્ણાટક સરકારે COTPA  Actમાં ફેરફાર અંગેના નિયમો માટે નોટિફિકેશન પણ બહાર પાડી દીધું છે. હવે નવા નિયમો હેઠળ સુધારેલા કાયદામાં સજા અને દંડમાં પણ ફેરફાર કરવામાં આવ્યો છે. સુધારેલા કાયદા હેઠળ, પ્રતિબંધિત જગ્યાએ તમાકુ અથવા સિગારેટ વેચવા પર અથવા 21 વર્ષથી ઓછી ઉંમરના વ્યક્તિને 1000 રૂપિયા સુધીનો દંડ લાદવાની જોગવાઈ છે. 

- આ બિલ પાસ થયા બાદ રાજ્યમાં હુક્કાબાર પર સંપૂર્ણ પ્રતિબંધ લાગશે. હુક્કાબાર ખોલવા કે ચલાવવા માટે સજા અને દંડ બંનેની જોગવાઈ છે.

- 21 વર્ષથી ઓછી ઉંમરના લોકોને સિગારેટ વેચવા પર સંપૂર્ણ પ્રતિબંધ છે. ઘણા રાજ્યોમાં આ ઉંમર 18 વર્ષ છે. આ ઉપરાંત, શાળાઓ, કોલેજો, હોસ્પિટલો, બાળ સંભાળ કેન્દ્રો, આરોગ્ય કેન્દ્રો, મંદિરો, મસ્જિદો અને ઉદ્યાનોની આસપાસ (100 મીટરની ત્રિજ્યામાં) જાહેર સ્થળોએ તમાકુ ઉત્પાદનોના વેચાણ પર પ્રતિબંધ મૂકવામાં આવ્યો છે.

વધુ વાંચો: અમદાવાદના હૂક્કા પ્રેમીઓ ચેતજો ! 45 મિનિટનો કસ 100 સિગારેટ પીવા બરોબર

- હુક્કાબાર ખોલવા કે ચલાવવામાં દોષી સાબિત થાય તો 1 થી 3 વર્ષની સજાની જોગવાઈ છે. આ ઉપરાંત 50 હજારથી લઈને 1 લાખ રૂપિયા સુધીનો દંડ પણ થઈ શકે છે. સરકારની દલીલ છે કે હુક્કા બારમાં 15 મિનિટ સુધી રહેવું એ 100 સિગારેટ પીવા જેટલું નુકસાનકારક છે.

VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો