જૂનાગઢ / ઘેડ પંથકમાં લીલા દુકાળની ભીતિ, અનેક ગામો અને ખેતી પાણીમાં ગરકાવ થયા

• જૂનાગઢ વિસ્તારમાં ઓઝત નદીમાં પૂર આવ્યું
• અનેક વિસ્તારો પાણીમાં ગરકાવ થયા
• મગફળીનો મોટાભાગનો પાક નષ્ટ થઈ ગયો

 સૌરાષ્ટ્રમાં ભારે વરસાદના કારણે જ્યાં જુઓ ત્યાં જળ અને માત્ર જળ નજરે પડી રહ્યું છે. ઓઝત નદીના ધસમસતા પાણી ઘેડ પંથકના લાંગડ, ઓસા, બાલગામ અને પાદરડી ગામ, તથા ભાથરોડ ગામમાં ઘૂસી ગયા છે જેના કારણે અનેક વિસ્તારો પાણીમાં ગરકાવ થઈ ગયા છે. ટ્રેક્ટર જેવા વાહનો, ઊંટ ગાડીઓ, મકાનો અને ખેતી બધા પર પાણી ફરી વળ્યા છે.

લાંગડ ગામમાં ઠેર ઠેર પાણી ભરાઈ ગયા છે. તો ક્યાંક મકાનો પણ જમીન દોસ્ત થઈ ગયા છે. સામાન્ય વ્યવહાર માટે પણ ઘરની બહાર નીકળવું મુશ્કેલ બની રહ્યું છે. ઘેડ પંથકના ઓસા ગામમાં જાણે દરિયો ફરી વળ્યો હોય તેવા દ્રશ્યો નજરે ચડતા હતા. શું ખેતર કે શું ગામ જ્યાં જુઓ ત્યાં જળબંબાકારની સ્થિતિનું નિર્માણ થયું હતું. ખેતી તો જાણે લીલા દુકાળમા નષ્ટ થઈ ગઈ હોય તેવી સ્થિતિ જોવા મળી હતી. 

ઓસમ ગામે ખેતરમાં પાણી ફરી વળતા મગફળીનો મોટાભાગનો પાક નષ્ટ થઈ ગયો છે. જો હજુ પણ થોડા દિવસોમા પાણી નહી ઊતરે તો બાકી રહી ગયેલો પાક પણ ખેડૂતોના હાથમાંથી છીનવાઈ જશે તેવું ખૂડૂતોનું કહેવું છે.