રણનીતિ / કર્ણાટકમાં નવજોત સિંહ સિદ્ધુને કોંગ્રેસ ઉતારાશે ચૂંટણી પ્રચારમાં, ટૂંક સમયમાં મળી શકે મોટી જવાબદારી

• નવજોત સિદ્ધુને જેલમાંથી મુક્ત થયા બાદ મળશે પહેલી રાજકીય જવાબદારી 
• કોંગ્રેસ ટૂંક સમયમાં કર્ણાટક ચૂંટણી પ્રચારથી સિદ્ધુને સક્રિય રાજકારણમાં ઉતારી શકે
• સિદ્ધુ દક્ષિણના રાજ્યમાં પ્રચાર કરે તેવી પૂરી સંભાવના 

ક્રિકેટરમાંથી રાજનેતા બનેલા નવજોત સિદ્ધુ જેલમાંથી મુક્ત થયા બાદ તેમણે પ્રથમ રાજકીય જવાબદારી મળી શકે છે. વાત જાણે એમ છે કે, કોંગ્રેસના સૂત્રોના જણાવ્યા અનુસાર, કોંગ્રેસ ટૂંક સમયમાં કર્ણાટક ચૂંટણી પ્રચારથી તેમને સક્રિય રાજકારણમાં ઉતારી શકે છે. સિદ્ધુ દક્ષિણના રાજ્યમાં પ્રચાર કરે તેવી પૂરી સંભાવના છે. નવજોત સિંહ સિદ્ધુ કર્ણાટકના મુખ્ય જિલ્લાઓમાં રેલીઓને સંબોધિત કરે તેવી શક્યતા છે.

કર્ણાટક વિધાનસભાની ચૂંટણી આવતા મહિનાની શરૂઆતમાં થવાની છે. આગામી દિવસોમાં જોરશોરથી પ્રચાર શરૂ થવાનો છે. AICCના એક મેનેજરે જણાવ્યું હતું કે, તે કર્ણાટકની મુલાકાત લેશે અને પાર્ટીના સમર્થન માટે પ્રચાર કરશે. આ અઠવાડિયે કોંગ્રેસના મુખ્ય નેતાઓ સાથેની તેમની મુલાકાતો પરથી સ્પષ્ટ થાય છે કે, કોઈ પણ સમય ગુમાવ્યા વિના સિદ્ધુ તેમની રાજકીય કારકિર્દી ફરી શરૂ કરવા માટે તૈયાર છે.

મહત્વનું છે કે, તાજેતરમાં જ સિદ્ધુએ કોંગ્રેસ અધ્યક્ષ મલ્લિકાર્જુન ખડગે અને રાહુલ ગાંધી સાથે મુલાકાત કરી હતી. સિદ્ધુએ રાહુલને પોતાના માર્ગદર્શક ગણાવ્યા હતા. નોંધપાત્ર રીતે ગયા વર્ષે પંજાબની ચૂંટણીમાં કોંગ્રેસની હાર બાદ સિદ્ધુની રાજકીય કારકિર્દી અટકી ગઈ હતી. આ પછી સુપ્રીમ કોર્ટે તેમને 1988ના રોડ રેજ કેસમાં એક વર્ષની જેલની સજા સંભળાવી હતી.