- ગુજરાતને બે મુખ્યમંત્રી આપનાર ઘાટલોડિયા બેઠકનું ગણિત
- વર્ષ 2017માં ભુપેન્દ્ર પટેલે આ બેઠક પર સૌથી વધુ માર્જિનથી મેળવી હતી જીત
ગુજરાતમાં વિધાનસબભાની ચુંટણીનો દમદાર માહોલ જામ્યો છે. પ્રચાર-પ્રસાર અને જીતના દાવા થઇ રહ્યા છે. જીત માટે ઉમેદવારો મતદારોને રીઝવવા દિવસરાત એક કરીને મહેનતમાં લાગી ગયા છે. તેવામાં ગુજરાતનો ઘાટલોડિયા વિધાનસભા મતવિસ્તાર ચુંટણીની દ્રષ્ટિએ ખૂબ જ મહત્વનો ગણાઈ રહ્યો છે. કારણ કે, આ મતવિસ્તાર પરથી ગુજરાતને બે મુખ્યમંત્રીઑ મળ્યા છે. જેમાં આનંદીબેન પટેલ અને ભુપેન્દ્ર પટેલનો સમાવેશ થાય છે. ત્યારે હાલ પણ ઘાટલોડિયા વિધાનસભામાં બેઠક પરથી ભુપેન્દ્ર પટેલને ભાજપ દ્વારા ગુજરાત વિધાનસભાના ચુંટણી જંગમાં ઉતારવામાં આવ્યા છે. ત્યારે આ સીટ સૌનું ધ્યાન ખેંચનારી રહેશે.
2012માં ઘાટલોડિયા બેઠક પરથી આનંદીબેન જીત્યા હતા
આ બેઠકની વાત કરવામાં આવે તો આ સીટ પર પાટીદાર સમાજનું વધુ પ્રભુત્વ રહ્યું છે. તો રબારી સમાજનું પણ ખાસ વર્ચસ્વ છે. આ સીટ પર કુલ 3,52, 340 મતદાતા છે. ભાજપ માટે આ બેઠક મહત્વની છે કારણ કે, આ સીટ પરથી ભાજપના ઉમેદવારો બે વખતથી સતત જિતતા આવ્યા છે. 2012ની વિધાનસભા ચૂંટણીમાં ઘાટલોડિયા બેઠક પરથી ભાજપએ આનંદીબેન પટેલને ટિકિટ આપી ચુંટણી જંગમાં આનંદીબેન પટેલએ કોંગ્રેસના ઉમેદવાર રમેશભાઈ પટેલને એક લાખથી વધુ મતોની સરસાઈથી હરાવ્યા હતા અને ત્યાંરબાદ તેઑ મુખ્યમંત્રી બન્યા હતા.
ભૂપેન્દ્ર પટેલ આ બેઠકથી જ જીતીને રાજ્યના મુખ્યમંત્રી બન્યા
આ દરમિયાન ગુજરાતમાં પાટીદાર અનામત આંદોલન ચાલ્યું હતુ. ત્યાર બાદ આનંદીબેન પટેલને મુખ્યમંત્રી પદેથી હટાવી દેવામાં આવ્યા હતા. તો ગત વિધાનસભાની ચુંટણીમાં ભૂપેન્દ્ર પટેલ ચૂંટણી લડ્યા હતા. જેની પણ જંગી લીડથી જીત થઇ હતી. ભૂપેન્દ્ર પટેલ આ બેઠકથી જ જીતીને રાજ્યના મુખ્યમંત્રી બન્યા હતા. પણ ભૂપેન્દ્ર પટેલના વડપણ હેઠળ ગુજરાતની ચુંટણી લડવામાં આવી રહી છે. ત્યારે આ વખતે કોંગ્રેસે ખેલ પાડી રાજ્યસભાના સદસ્ય આમીબેન યાજ્ઞિકને ઉતાર્યા છે. મુખ્યમંત્રી મેદાને હોવાથી આ બેઠક હોટ સીટ ગણાઈ રહી છે.
વર્ષ 2017માં ભુપેન્દ્ર પટેલે સૌથી વધુ માર્જિનથી મેળવી હતી જીત
અમદાવાદની ઘાટલોડિયા વિધાનસભામાં બેઠક પરથી ભુપેન્દ્ર પટેલ બુધવારે વિજય મુહૂર્તમાં ઉમેદવારી ફોર્મ ભરશે. આ દરમિયાન રેલી યોજીને શક્તિ પ્રદર્શન સાથે ભુપેન્દ્ર પટેલ ઉમેદવારી કરશે. ગત વિધાનસભાની ચુંટણીમાં ભુપેન્દ્ર પટેલના નામે એક રેકોર્ડ છે. જે 2017 ની ચુંટણીમાં રાજ્યની તમામ 182 વિધાનસભા બેઠકોના પરિણામમાં સૌથી વધુ 1.17 લાખની લીડ સાથે જંગી સરસાઈથી ચૂંટાયા હતા. ત્યાર આ વખતે 2017 જેવો રેકૉર્ડ બની શકશે કે કેમ? તે જોવું રહ્યું!
ઘાટલોડિયા, નિકોલ બેઠક સિવાય અમદાવાદની બેઠકો પર નો રિપિટ થિયરીનો અમલ
ભાજપે અમદાવાદ ઘાટલોડિયા બેઠક પરથી સીએમ ભૂપેન્દ્ર પટેલ અને નિકોલ બેઠક પરથી જગદિશ પંચાલ સિવાય અમદાવાદની તમામ બેઠકો પર નો રિપિટની થિયરીનો અમલ કર્યો છે. મેમનગર નગરપાલિકાના ચેરમેન, અમદાવાદ મ્યુનિ. કોર્પોરેશનની સ્ટે. કમિટીના ચેરમેન, ઔડાના ચેરમેન સહીત અનેક હોદા પર રહેલા ભૂપેન્દ્ર પટેલને મતવિસ્તારના લોકો અને પક્ષના આગેવાનૉ દાદાના નામથી પણ ઓળખે છે.
