દુનિયાભરના દેશોમાં કોરોના મહામારીએ હાહાકાર મચાવ્યો છે. સમગ્ર દુનિયામાં કોરોનાથી ચેપગ્રસ્ત લોકોની સંખ્યા વધીને હવે 64,85,563 થઈ ગઈ છે. આ સમયગાળા દરમિયાન 30,09,259 લોકો સારવાર લીધા બાદ સ્વસ્થ પણ થયા છે. અત્યાર સુધીમાં કુલ 3,82,227 લોકોનાં મોત નીપજ્યાં છે.
દુનિયાભરમાં 64.85 લાખ કેસઃ 3.82 લાખથી વધુ લોકોનાં મોત
અમેરિકામાં 18.81 લાખથી વધુ કેસઃ ન્યૂયોર્કમાં 4 લાખથી વધુ દર્દીઓ
સિંગાપોરને વિશ્વના સૌથી મોટા બિઝનેસ હબમાંનું એક માનવામાં આવે છે. અહીં મોટી સંખ્યામાં પરપ્રાંતિય શ્રમિકો રહે છે. કોરોનાના ચેપથી આ શ્રમિકો જ સૌથી વધુ પ્રભાવિત થયા હતા. હવે ત્યાંની સરકાર તેમના માટે નવી અને વધુ સારી ડોરમેટ્રીઝ બનાવવા જઈ રહી છે. ત્યાં આરોગ્ય સુવિધાઓ અને સ્વચ્છતાની ખૂબ સારી વ્યવસ્થા હશે.
કોરોના મહામારીની સૌથી માઠી અસર હાલ અમેરિકામાં જોવા મળી છે. અમેરિકામાં અત્યાર સુધીમાં 18.81 લાખથી વધુ પોઝિટિવ કેસ નોંધાયા છે. કુલ 1,08,059 લોકોએ પોતાના જીવ ગુમાવ્યા છે. 6.46 લાખ લોકોને સારવાર બાદ રજા અપાઈ છે.
અમેરિકાના ન્યૂયોર્કમાં કોરોના સંક્રમણના 4 લાખથી વધુ પોઝિટિવ કેસ નોંધાયા છે અને 29,000 લોકોનાં મોત થયાં છે. ન્યૂજર્સીમાં કોરોના સંક્રમણના એક લાખથી વધારે કેસ નોંધાયા છે અને કુલ 11 હજારથી વધારે લોકોનાં મોત થયા છે.
પાકિસ્તાનના સિંધના પ્રધાનનું કોરોનાથી મોત
પાકિસ્તાનના સિંધના પ્રધાન હાજી ગુલામ મુર્તઝા બલોચનું ગઈ કાલે મંગળવારે મોડી રાતે કોરોના સંક્રમણથી મોત થયું છે. આ જાણકારી રાજ્ય સરકારના પ્રવક્તાએ આપી હતી. પાકિસ્તાનમાં લોકડાઉન હટાવ્યા બાદ સ્થિતિ સતત બગડી રહી છે. અહીં અત્યાર સુધીમાં કુલ76,398 કેસ નોંધાયા છે અને 1621 લોકોનાં મોત થયા છે.
ચીલીમાં છેલ્લા 24 કલાકમાં 3527 નવા કેસ
ચીલીમાં કોરોના સંક્રમણના નવા કેસ સતત ચિંતાજનક રીતે વધી રહ્યા છે. અહીં છેલ્લા 24 કલાકમાં જ 3527 નવા કેસ સામે આવ્યા છે અને 75 લોકોનાં મોત થયાં છે. આ સાથે જ હવે કુલ પોઝિટિવ કેસ 1,08,686 થઈ ગયા છે અને કુલ 1188 લોકોએ જીવ ગુમાવ્યો છે.
એક મહિના બાદ ઈઝરાયલમાં સૌથી વધુ કેસ સામે આવ્યા
ઈઝરાયલમાં છેલ્લા 24 કલાકમાં 116 નવા કેસ નોંધાયા છે. આ અગાઉ એક મહિના પહેલા એક મેના રોજ 155 નવા કેસ નોંધાયા હતા. અહીં અત્યાર સુધીમાં કુલ 17,285 કેસ નોંધાયા છે અને 287 લોકોનાં મોત થયાં છે. અહીં હાલ 2055 એક્ટિવ કેસ છે.
દરમિયાન, બ્રાઝિલમાં 5.58 લાખથી વધુ કેસ નોંધાયા છે અને કુલ 31,309 લોકોએ પોતાના જીવ ગુમાવ્યા છે. કોરોના સંક્રમણના કેસના મામલે બ્રાઝિલ સમગ્ર વિશ્વમાં અમેરિકા બાદ બીજા સ્થાને છે. ત્યારબાદ રશિયા 4,23,741 કેસ સાથે ત્રીજા સ્થાને છે. રશિયામાં કુલ 50037 લોકોનાં મોત થયા છે.