ઇલેક્શન 2022 / અલ્પેશ ઠાકોર, શંભુનાથ ટુંડિયા ફાઇનલ: મોડી રાતે 100 જેટલા BJP નેતાઓના ફોનની વાગી ઘંટડી, જુઓ આખું લિસ્ટ

• આજે જાહેર થશે ભાજપના ઉમેદવારી યાદી
• અનેક નવા ચહેરાને પણ ભાજપ આપી શકે તક
• જાણો પાર્ટી કોને કઈ બેઠક પરથી આપી શકે છે ટિકિટ

ગુજરાત વિધાનસભાની ચૂંટણી જાહેર થઈ ચૂકી છે. ત્યારે ઉમેદવારોની પસંદગીની પ્રક્રિયાનું કાર્ય વેગવંતુ બન્યું છે. આમ આદમી પાર્ટીએ તો અત્યાર સુધીમાં 167  ઉમેદવારોના નામો પણ જાહેર કરી દીધાં છે. તો કોંગ્રેસે પણ ઉમેદવારની પ્રથમ યાદી જાહેર કરી દીધી છે. ભારતીય જનતા પાર્ટી દ્વારા ઉમેદવારોના નામોની સત્તાવાર જાહેરાત કરવામાં આવી નથી. એવામાં ભાજપના સંભવિત ઉમેદવારોની એક યાદી VTV પાસે આવી છે. 

વિજય રૂપાણી સહિતના દિગ્ગજોએ પાછી ખેંચી દાવેદારી
ગુજરાતમાં બરાબરનો ચૂંટણીનો માહોલ જામ્યો છે. 50 વર્ષ સુધી પાર્ટી સાથે જોડાયેલા મોહનસિંહ રાઠવાએ કોંગ્રેસને અલવિદા કહીને ભાજપનો ખેસ ધારણ કરી લીધો છે. જ્યારે કોંગ્રેસના ધારાસભ્ય ભગા બારડે પણ કેસરીયો ખેસ ધારણ કરી લીધો છે. ભાજપમાંથી વિજય રૂપાણી અને નીતિન પટેલની ટિકિટ કપાય એ પહેલાં પોતે જ ચૂંટણીમાંથી દાવેદારી પાછી ખેંચી છે, ગુજરાતના પૂર્વ મુખ્યમંત્રી અને પૂર્વ નાયબ મુખ્યમંત્રી, પૂર્વ શિક્ષણ મંત્રી, પૂર્વ ગૃહ રાજ્યમંત્રી વિધાનસભાની રેસમાંથી બહાર થઈ ગયાં છે. એવી સ્થિતિની વચ્ચે VTV પાસે ભાજપના સંભવિત ઉમેદવારોની યાદી સામે આવી છે. 

પાર્ટી નવા ચહેરાને આપી શકે છે તક
જે મુજબ ભારતીય જનતા પાર્ટી આ વખતે અનેક નવા ચહેરાને તક આપી શકે છે. પાર્ટી બોટાદની ગઢડા બેઠક પર શંભુનાથ ટુંડિયાને ટિકિટ આપી શકે છે. તો દસાડા બેઠક પરથી પી.કે.પરમારને ટિકિટ આપી શકે છે. આમાંથી કેટલાક નેતાઓને પાર્ટી દ્વારા ફોન પણ કરી દેવામાં આવ્યા છે. 

જાણો કોને કઈ બેઠક પરથી મળશે ટિકિટ
વઢવાણ બેઠક પર જીગ્નાબેન પંડ્યા, ધ્રાંગધ્રા બેઠક પર પ્રકાશ વરમોરા, લીંબડીથી કિરીટસિંહ રાણા, ચોટીલા બેઠક પર શામજી ચૌહાણ, ગીર સોમનાથ બેઠક પર માનસિંહ, અમરેલી બેઠક પર કૌશિક વેકરિયા, વલસાડ બેઠક પર ભરત પટેલ, અબડાસા બેઠક પર પ્રદ્યુમનસિંહ જાડેજા, ઉમરગામ બેઠક માટે રમણ પાટકર, પારડીથી કનુભાઈ દેસાઈ, રાજકોટ પશ્ચિમથી કમલેશ મીરાણી, અમદાવાદના નિકોલથી જગદીશ પંચાલ, વિસાવદરથી હર્ષદ રીબડીયાને મળી શકે છે ટિકિટ.

આ ઉપરાંત માણવદરથી જવાહર ચાવડા, વિસનગરથી ઋષિકેશ પટેલ, રાધનપુર બેઠક પરથી અલ્પેશ ઠાકોર, સિદ્ધપુરથી બળવંતસિંહ રાજપૂત, નવસારી વિધાનસભા બેઠક ઉપર રાકેશ દેસાઈ, ભરૂચ બેઠક પરથી રમેશ મિસ્ત્રી, અંકલેશ્વર બેઠક પર ઇશ્વરસિંહ પટેલ, વાગરા બેઠક માટે અરૂણસિંહ રાણા, જંબુસર બેઠક પરથી ડી.કે.સ્વામી અને ઝઘડિયા બેઠક પરથી રિતેશ વસાવાને ટિકિટ મળી શકે છે. 

સુરતની કામરેજ બેઠક પર પ્રફુલ પાનસેરિયા, ઉધના બેઠક પરથી મન પટેલને મળી શકે છે ટિકિટ. આ ઉપરાંત મજુરા બેઠક પર હર્ષ સંઘવી, લિંબાયત બેઠક પર સંગીતા પાટીલ, કરંજ બેઠક પર પ્રવિણ ઘોઘારી, વરાછા બેઠક પર કુમાર કાનાણી, કતારગામ બેઠક પર વિનુ મોરડિયા, સુરત ઉત્તર કાંતિ બલર, સુરત પૂર્વ બેઠક પર અરવિંદ રાણા, ઓલપાડ બેઠક પર મુકેશ પટેલને પાર્ટી ચૂંટણીના મેદાનમાં ઉતારી શકે છે.