Coronavirus / કોરોનાનો બોલિવૂડમાં પણ હાહાકાર, ઈન્ડસ્ટ્રીઝને આટલાં કરોડનાં નુકશાનની ભીતિ

• કોરોના વાઈરસના કારણે દુનિયાભરની અર્થવ્યવસ્થાને મોટો ઝાટકો લાગ્યો છે
• બોલિવૂડને પણ કોરોના વાઈરસથી ખૂબ મોટું નુકસાન થવાની આશંકા સેવાઈ રહી છે
• કોરોના વાઈરસના કારણે હિન્દી ફિલ્મ ઈન્ડસ્ટ્રીને અંદાજે 800 કરોડ રૂપિયાનું નુકસાન થવાની આશંકા

દેશની લગભગ તમામ રાજ્ય સરકારોએ સિનેમાઘર બંધ રાખવાની જાહેરાત કરી છે. અત્યાર સુધીમાં 3,500થી વધુ સ્ક્રીન બંધ કરી દેવામાં આવ્યા છે. હિન્દી ફિલ્મોના મુખ્ય બેલ્ટ ગણાતા મુંબઈ, દિલ્હી, રાજસ્થાન, ગુજરાત, પંજાબ અને બિહારનાં તમામ થિયેટર બંધ છે.

બીજી તરફ ઘણી ફિલ્મની રિલીઝ તારીખ પણ પાછી ઠેલવામાં આવી છે. થિયેટર બંધ થવાના કારણે 'બાગી' અને 'ઇંગ્લિશ મીડિયમ' જેવી મોટા બજેટની ફિલ્મોને પણ નુકસાનના ભોગ બનવું પડ્યું છે. 

અન્ય એક બિગ બજેટ ફિલ્મ 'સૂર્યવંશી'ની રિલીઝ ડેટ પણ પાછળ ઠેલાઈ ગઈ છે. ફિલ્મ અને ટીવી શોનું શૂટિંગ બંધ થઈ ગયું છે. નિર્માતાઓ ઉપરાંત સિનેમાઘરના માલિકો પણ હાલ મોટું નુકસાન ભોગવી રહ્યા છે.

જાણીતા ટ્રેડ એનાલિસ્ટ તરણ આદર્શે કહ્યું કે પ્રોડક્શન, ડિસ્ટ્રિબ્યૂશન અને એક્ઝિબિશન સંપૂર્ણ રીતે બંધ થઈ ગયાં હોવાથી ફિલ્મ ઉદ્યોગને થનારું નુકસાન અનેકગણું વધવાની આશંકા છે. 
ફિલ્મ ક્રિટિક રાજ બંસલના કહેવા પ્રમાણે જો ભારતભરનાં થિયેટર બંધ રહેશે તો થિયેટર માલિકોને એક અઠવાડિયામાં આશરે 40 થી 50 કરોડનું નુકસાન થશે. ટ્રેડ વિશ્લેષક કોમલ નાહટાએ પણ કોરોના વાઈરસના કારણે હિન્દી ફિલ્મ ઈન્ડસ્ટ્રીને અંદાજે 800 કરોડ રૂપિયાનું નુકસાન થવાની આશંકા વ્યક્ત કરી છે.