ચિંતા / હવે કોરોના બાદ મંકીપોક્સે વધારી ચિંતા, બ્રિટન બાદ અમેરિકામાં નોંધાયો કેસ, જાણો કેવા છે લક્ષણો

• અમેરિકામાં નોંધાયો મંકીપોક્સનો કેસ
• હાલમાં દર્દીની સ્થિતિ સ્થિર
• બ્રિટનમાં નોંધાયા છે 9 કેસ 

એક તરફ કોરોના વાયરસે લોકોના જીવ અધ્ધર કરી દીધા છે.  ધીરે ધીરે કોરોનાના કેસ વધી રહ્યા છે ત્યારે વધુ એક વાયરસ સામે આવ્યો છે.  જી, હા કોરોના બાદ હવે મંકીપોક્સે ચિંતામાં વધારો કર્યો છે. બ્રિટન બાદ અમેરિકામાં મંકીપોક્સનો કેસ સામે આવ્યો છે.  યુએસના મેસેચ્યુસેટ્સ ડિપાર્ટમેન્ટ ઓફ પબ્લિક હેલ્થે બુધવારે એક વ્યક્તિમાં મંકીપોક્સ વાયરસના ચેપની પુષ્ટિ કરી છે. આ વ્યક્તિ તાજેતરમાં કેનેડા ગયો હતો.

અમેરિકામાં નોંધાયો મંકીપોક્સનો કેસ

મેસેચ્યુસેટ્સ ડિપાર્ટમેન્ટે એક પ્રેસ રિલીઝમાં જણાવ્યું હતું કે આ વ્યક્તિની શરૂઆતી તપાસ જમૈકાની લેબમાં પરીક્ષણમાં થઇ.  જ્યારે યુએસ સેન્ટર ફોર ડિસીઝ કંટ્રોલ એન્ડ પ્રિવેન્શન ખાતે વાયરસની પુષ્ટિ થઈ હતી. હાલમાં, સીડીસી તે વ્યક્તિના સંપર્કમાં આવેલા લોકોને ઓળખવા માટે સ્થાનિક આરોગ્ય બોર્ડ સાથે કામ કરી રહી છે. અખબારી યાદી મુજબ આ બાબતથી સામાન્ય જનતાને કોઈ ખતરો નથી. આ વ્યક્તિ હજુ પણ હોસ્પિટલમાં દાખલ છે અને તેની હાલત  સ્થિર છે. 

શું છે મંકીપોક્સ ? 

• મંકી પોક્સ એક દુર્લભ અને ગંભીર વાયરલ બીમારી છે.
• ફ્લૂ જેવી બીમારી છે જેમાં લિમ્ફ નોડ્સમાં સોજો આવે છે.
• ચહેરા અને શરીર પર દાણા દાણા જેવું જોવા મળે છે 
• સંક્રમણ 2થી 4 અઠવાડિયા સુધી ચાલે છે
• આ વાયરસ લોકોમાં સરળતાથી નથી ફેલાતો
• દર્દીના શરીરના પ્રવાહી કે મંકીપોક્સના જખમના સંપર્કથી ફેલાય છે.  
• વાંદરાઓ, ઉંદરો અને ખિસકોલી જેવા ચેપગ્રસ્ત પ્રાણીઓના સંપર્કથી ફેલાઇ શકે છે.
• વાયરસથી દૂષિત વસ્તુઓ, જેમ કે પથારી અને કપડાંના સંપર્ક દ્વારા પણ ફેલાય છે.

કેવા હોય છે લક્ષણો

• તાવ, માથાનો દુઃખાવો, સોજા, પીઠ દર્દ, માંસપેશીઓમાં દુઃખાવો થાય છે
• એકવાર તાવ ઉતરી જાય પછી આખા શરીરમાં ફોલ્લીઓ થાય છે. 
• ચહેરા પર ફોલ્લીઓ થવાની શરુઆત થાય છે.
• સામાન્ય રીતે હાથની હથેળીઓ અને પગના તળિયામાં ફોલ્લીઓ જોવા મળે છે. 
• ફોલ્લીઓને કારણે ખંજવાળ પણ વધારે આવે છે.
• ધીરે ધીરે ફોલ્લીઓ સુકાઇ જતા પોપડાની જેમ ખરી પડે છે અને ડાઘ પડે છએ. 
• 14થી 21 દિવસ સુધી આ ચેપ જોવા મળે છે. 

બ્રિટનમાં 9 કેસ આવ્યા છે

મહત્વનું છે કે  મે 2022 ની શરૂઆતમાં યુકેમાં મંકીપોક્સના 9 કેસની ઓળખ કરવામાં આવી હતી. તેનો પહેલો કેસ નાઇઝિરિયામાં સામે આવ્યો હતો. જેને લઇને બ્રિટનની સ્વાસ્થ્ય સુરક્ષા એજન્સીઓ સતર્ક થઇ ગઇ છે. તેઓનું કહેવુ છે કે મંકીપોક્સ એક દુર્લભ વાયરસ છે અને તે સરળતાથી ફેલાતો નથી.