તમારા કામનું / બેંક ડૂબી જાય તો તમારા પૈસાનું શું? કઇ રીતે તમારા એકાઉન્ટમાં રકમ પરત આવશે, જાણો નિયમ

• બેંક નાદાર જાહેર થાય તો થાપણોનું શું થશે?
• જમા રાશિ પર પાંચ લાખ રૂપિયાની ગેરેન્ટી મળી રહે છે
• ખાતાધારકોને પૈસા પાછા આપવાની જવાબદારી DICGCની છે

Bank Rules and Regulations: આજકાલ દરેક લોકોનું બેંક એકાઉન્ટ હોય છે અને એ જરૂરી પણ બની ગયું છે, વધુ પડતાં લોકોની સેલેરી બેંક ખાતામાં આવે છે અને આ સિવાય ઘણા લોકો એમના પૈસા પણ બેંકમાં સાચવીને રાખે છે. ઘણા લોકો એમની બચત બેંકમાં રાખે છે. આ સિવાય બેંક ફક્ત પૈસા રાખવાની જ નહીં પણ બીજી ઘણી સુવિધા પણ આપે છે. ઘણી એવી સ્કીમ આપે છે જેમાં રોકાણ કરીને સારું રિટર્ન પણ મળે છે પણ શું તમે ક્યારેય વિચાર્યું છે કે જો તમારી બેંક ક્યારેક ડૂબી જાય કે કોઈ કારણોસર બંધ થઈ જાય તો એવી સ્થિતિમા તેમાં પડેલ તમારા પૈસાનું શું થાય છે? આજે અમે તમને એ વિશે જણાવવા જઈ રહ્યા છીએ. 

શું છે નિયમ? 
જો બેંક ડૂબી જાય કે નાદાર જાહેર થાય તો આ સ્થિતિમાં થાપણોનું શું થશે? કે તમારા પૈસાનું શું થશે? જો તમારા મનમાં પણ આ વિચાર આવ્યો છે તો આ સમાચાર તમારા કામના છે.  જો તમારું કોઈ બેંકમાં એકાઉન્ટ છે અને એ એકાઉન્ટમાં 5 લાખ રૂપિયા જમા પડ્યા હોય અને એવામાં અચાનક બેંક ડૂબી ગઈ તો? જણાવી દઈએ કે નિયમો અનુસાર આવી સ્થિતિમાં 5 લાખ રૂપિયા મળી રહે છે એટલે કે 5 લાખ કે તેનાથી નીચેની રકમ બેંકમાં સુરક્ષિત માનવામાં આવે છે. 

બેંક ડિપોઝિટ ગેરંટી વધારીને પાંચ લાખ રૂપિયા કરી 
જણાવી દઈએ કે પહેલા બેકમાં જમા રાશિ પર એક લાખ રૂપિયાની ગેરંટી મળતી હતી. આ પછી વર્ષ 2020 માં ડિપોઝિટ ઇન્સ્યોરન્સ અને ક્રેડિટ ગેરંટી કોર્પોરેશન એક્ટમાં ફેરફાર કર્યો હતો અને કેન્દ્ર સરકારે બેંક ડિપોઝિટ ગેરંટી વધારીને પાંચ લાખ રૂપિયા કરી દીધી હતી.

તો શું તમારે નુકસાન ભોગવવું પડશે?
હવે આ વાંચીને વિચાર આવ્યો હશે કે જો બેંકમાં 5 લાખ કરતાં વધુ પૈસા જમા પડ્યા હોય તો શું તમારે નુકસાન ભોગવવું પડશે? એ સમયે એમ સમજવું જરૂરી છે કે સરકાર પણ તેના માટે પગલાં ઉઠાવી રહી છે કે કેવી રીતે લોકોની મહેનતની કમાણી ન બગડે. આવી સ્થિતિમાં સરકાર એવું પગલું ઉઠાવે છે કે કોઈ પણ બેંક ડૂબવાની હોય ત્યારે આરબીઆઇની મદદથી સરકાર એ બેંકને બીજી કોઈ એક મોટી બેંકમાં વિલય કરી દે છે અને એમ કરવાથી લોકોના પૈસા ડૂબતાં બચી જાય છે. 

આ સિવાય જ્યારે કોઈ બેંક ડૂબવાની હોય છે કે એવી સ્થિતિમાં આવી જાય છે ત્યારે ડીઆઈસીજીસી બેંક એ ખાતા ધારકોના પૈસા ચૂકવવાની જવાબદારી ઉઠાવી લે છે અને એ બેંક પાસેથી તે પ્રીમિયમ લે છે.