- ભાજપ હાઈ કમાન્ડે વસુંધરા રાજે પાસે જ જાહેર કરાવ્યું સીએમ તરીકે ભજનલાલનું નામ
- રાજનાથે ભજનલાલ શર્મા લખેલી ચિઠ્ઠી વસુંધરા રાજેને પકડાવી
- વસુંધરાએ કોઈને ખબર ન પડે તે રીતે વાંચી લીધું નામ
- નામ વાંચ્યા બાદ તરત બન્યાં ઉદાસ
રાજસ્થાનમાં 9 દિવસના સસ્પેન્સ બાદ રાજ્યને નવા કેપ્ટન મળ્યાં છે. ભાજપે ભજનલાલ શર્માને નવા મુખ્યમંત્રી તરીકે પસંદ કર્યા છે. ભજનલાલનું નામ નક્કી થતાં વસુંધરા રાજે સંપૂર્ણરીતે સાઈડલાઈનમાં આવી ગયા પરંતુ તેમાંય પાછી ભાજપે ચાલાકી કરી અને તેમની પાસે જ નવા સીએમના નામનો પ્રસ્તાવ રજૂ કરાવ્યો હતો જેને ધારાસભ્ય પક્ષ દ્વારા સર્વાનુમતે મંજૂર કરી દીધો હતો.
ભજનલાલના નામવાળી ચિઠ્ઠી વાંચીને વસુંધરા રાજેએ શું કર્યું
ધારાસભ્ય દળની બેઠક દરમિયાનનો એક વીડિયો પણ વાયરલ થઈ રહ્યો છે. જેમાં પૂર્વ મુખ્યમંત્રી વસુંધરા રાજે રાજનાથે આપેલી ચિઠ્ઠી પર કોઈને ખબર ન પડે તે રીતે નવા સીએમનું નામ વાંચી લેતા જોવા મળી રહ્યાં છે. તેઓ ચિઠ્ઠી વાંચીને નવાઈ પામીને રાજનાથ સામે જુએ છે અને તરત ઉદાસ બનતાં જોવા મળે છે. સોશિયલ મીડિયા પર આ વીડિયો શેર કરતી વખતે દાવો કરવામાં આવી રહ્યો છે કે આ એ સ્લિપ છે જે રાજનાથ સિંહે પ્રસ્તાવ મૂકતા પહેલા વસુંધરા રાજેને સોંપી દીધી હતી. તેના પર ભજનલાલનું નામ લખેલું હતું, જેનું નામ રાજે ધારાસભ્યોને પ્રપોઝ કરવાનું હતું.
હોટલમાં વસુંધરાને એકલા મળીને રાજનાથે આપી હાઈ કમાન્ડના નિર્ણયની જાણકારી
ધારાસભ્ય દળની બેઠક પહેલા રાજનાથ સિંહે વસુંધરા રાજે સાથે હોટલ લલિતમાં અલગથી બેઠક કરી હતી અને તેમને પાર્ટીના નિર્ણયની જાણકારી આપી હતી. બેઠકમાં રાજનાથે વસુંધરા રાજેને પાર્ટી હાઈકમાન્ડના નિર્ણયને જાણકારી આપી હતી કે ભજનલાલ શર્માને સીએમ જાહેર કરવાના છે અને તે પણ તમારા દ્વારા પ્રસ્તાવિત થશે. રાજનાથે રાજેને પાર્ટીમાં હવે પછીની તેમની ભૂમિકા વિશે પણ વાત કરી હતી. સૂત્રોના જણાવ્યા અનુસાર, સિંહે વસુંધરાને પાર્ટીના નેતૃત્વના નિર્ણયની જાણકારી આપી હતી અને ધારાસભ્ય દળની બેઠકમાં શર્માના નામનો પ્રસ્તાવ મૂકવા માટે તેમને સમજાવ્યા હતા. સૂત્રોના જણાવ્યા મુજબ સિંઘે તેને ખાતરી આપી હતી કે તેનો આગામી રોલ આગામી થોડા દિવસોમાં નક્કી કરવામાં આવશે.
ભાજપે છેલ્લી ઘડી સુધી સસ્પેન્સ જાળવી રાખ્યું
છેલ્લી ઘડી સુધી સસ્પેન્સ સંપૂર્ણપણે અકબંધ રહ્યું હતું અને છત્તીસગઢ અને મધ્યપ્રદેશની જેમ ભાજપે પણ રાજસ્થાનમાં તમામ અટકળોને ખોટી સાબિત કરીને 'છુપા રુસ્તમ' આગળ ધર્યા હતા. પૂર્વ મુખ્યમંત્રી વસુંધરા રાજેને મુખ્યમંત્રી પદની મહત્વની દાવેદાર માનવામાં આવતી હતી. એવું કહેવામાં આવે છે કે રાજેએ પોતાનો દાવો મજબૂત કરવા માટે દરેક શક્ય પ્રયત્નો કર્યા હતા. રાજે ઉપરાંત બાબા બાલકનાથ, ગજેન્દ્રસિંહ શેખાવત સહિત અડધો ડઝન જેટલા દિગ્ગજ નેતાઓના નામની અટકળો લગાવવામાં આવી હતી. જોકે અચાનક સરપ્રાઈઝ નામ જાહેર કરવામાં આવ્યું. ભજનલાલ શર્મા તો સીએમની રેસમાં જરા પણ નહોતા. ધારાસભ્ય દળની બેઠક પહેલાં યોજાયેલા ફોટો સેશનમાં ચોથી હરોળમાં ઊભા રહેલા ભજનલાલનું નામ રાજેએ રજૂ કરતાં જ સૌ કોઈ આશ્ચર્યમાં પડી ગયા હતા.
