અમેરિકા / US કેપિટલ હિલ હિંસા મામલે વધી શકે છે ડોનાલ્ડ ટ્રમ્પની મુશ્કેલી, તપાસ કમિટીએ આક્ષેપ મૂકતા આપ્યું ચોંકાવનારું નિવેદન

• અમેરિકાના પૂર્વ રાષ્ટ્રપતિ ડોનાલ્ડ ટ્રમ્પને લઈ મોટા સમાચાર
• ડોનાલ્ડ ટ્રમ્પની 2024ની ચૂંટણી લડવાની યોજનાને ફટકો પડી શકે
• US કેપિટલમાં થયેલા હુમલાને લઈ કોંગ્રેસ સમિતિએ રિપોર્ટ સોંપ્યો 
• પૂર્વ રાષ્ટ્રપતિ ડોનાલ્ડ ટ્રમ્પ સામે ફોજદારી આરોપો દાખલ કરવાની ભલામણ

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પને લઈ એક મોટા સમાચાર સામે આવ્યા છે. ડોનાલ્ડ ટ્રમ્પની 2024ની ચૂંટણી લડવાની યોજનાને ફટકો પડી શકે છે. યુએસ કેપિટલમાં ગયા વર્ષે થયેલા હુમલાની તપાસ કરનાર કોંગ્રેસ સમિતિએ સોમવારે પોતાનો રિપોર્ટ આપ્યો હતો. આ રિપોર્ટમાં સમિતિએ પૂર્વ રાષ્ટ્રપતિ ડોનાલ્ડ ટ્રમ્પ સામે ફોજદારી આરોપો દાખલ કરવાની ભલામણ કરી છે. હાઉસ પેનલે સર્વસંમતિથી તોડફોડને ઉશ્કેરવાનો, સત્તાવાર કાર્યવાહીમાં અવરોધ લાવવાનો,  યુએસ સરકારને છેતરવાનું ષડયંત્ર રચવા અને ખોટા નિવેદનો કરવા બદલ ટ્રમ્પ સામે આવી કાર્યવાહી કરવા વિનંતી કરી છે.

શું કહ્યું સમિતિએ ? 

પેનલના તારણોનું પ્રતિનિધિત્વ કરતા પ્રતિનિધિ જેમી રસ્કિને કહ્યું કે, તપાસ દરમિયાન સમિતિને નોંધપાત્ર પુરાવા મળ્યા છે કે, રાષ્ટ્રપતિ ડોનાલ્ડ ટ્રમ્પે આપણા બંધારણ હેઠળ સત્તાના શાંતિપૂર્ણ સંક્રમણને વિક્ષેપિત કરવાના હેતુથી આ ઘટનાનું આયોજન કર્યું હતું. આ સાથે પ્રતિનિધિ જેમી રસ્કિને વધુમાં કહ્યું કે, અમે માનીએ છીએ કે આ સમગ્ર કેસમાં મારા સાથીદારો દ્વારા આજે રજૂ કરાયેલા પુરાવા અને અમારી સુનાવણી દરમિયાન એકત્ર કરાયેલા પુરાવા પૂર્વ રાષ્ટ્રપતિ ડોનાલ્ડ ટ્રમ્પ સામે ફોજદારી આરોપો ઘડવાની અને તે અંતર્ગત કાર્યવાહીની પુષ્ટિ કરે છે.

શું થયું હતું કેપિટલ હિલમાં ? 

નોંધનીય છે કે, 6 જાન્યુઆરી-2021ના રોજ પૂર્વ રાષ્ટ્રપતિ ડોનાલ્ડ ટ્રમ્પના હજારો સમર્થકોએ ચૂંટણીમાં હાર બાદ યુએસ સંસદ કેપિટલ હિલ પર કથિત રીતે હુમલો કર્યો હતો. તે સમયે રાષ્ટ્રપતિની પસંદગી કરવામાં આવી હતી જેણે બિડેનની ચૂંટણીની ઔપચારિક પુષ્ટિની પ્રક્રિયામાં અવરોધ લાવવાનો પ્રયાસ કર્યો હતો.