હોબાળો / 700 હંગામી કર્મચારીઓનો MS યુનિવર્સિટીએ સાથ છોડ્યો, પ્રવેશ પ્રક્રિયા અને પરીક્ષા ટલ્લે ચડે તેવી ભીતિ

• વડોદરામાં MS યુનિવર્સિટીની સિન્ડીકેટની બેઠકમાં હોબાળો
• 700 હંગામી કર્મચારીઓનો નોકરીનો આજે છેલ્લો દિવસ
• ઓર્ડર રીન્યુ ન થાય તો આવતીકાલથી નહીં કરે કામ

વડોદરામાં MS યુનિવર્સિટીની સિન્ડીકેટની બેઠક પહેલા જ હંગામી કર્મચારીઓએ હોબાળો મચાવ્યો હતો. 700 હંગામી કર્મચારીઓનો નોકરીનો આજે છેલ્લો દિવસ છે જેને કર્મચારીઓએ હોબાળો મચાવ્યો હતો.

સ્ટાફ એસો.ના પ્રમુખનું નિવેદન
જે સમગ્ર મામલે બરોડા યુનિવર્સિટી સ્ટાફ એસો.ના પ્રમુખ પ્રતાપરાવ ભોયટેનું નિવેદન સામે આવ્યું છે. તેમણે કહ્યું કે, આજે ઓર્ડર રીન્યુ ન થાય તો આવતીકાલથી કર્મચારી કામ નહીં કરે તેમજ યુનિવર્સિટીની પ્રવેશ પ્રક્રિયા અને પરીક્ષા ટલ્લે ચઢશે. પ્રતાપરાવ કહ્યું કે, આઉટસોર્સિંગ એજન્સીને પણ યુનિવર્સિટીમાં નહીં આવવા દઈએ. અત્રે તમને જણાવીએ કે, યુનિ.એ આઉટસોર્સિંગ એજન્સીના ટેન્ડર પ્રક્રિયાની તારીખ વધારીને 3 જુલાઈએ કરી છે. યુનિવર્સિટી હેડ ઓફિસ પર મોટી સંખ્યામાં હંગામી કર્મચારીઓ પ્રદર્શન કરી રહ્યા છે.  

વાઇસ ચાન્સેલરે શું કહ્યું ?
યુનિવર્સિટીમાં આઉટસોર્સિંગથી કર્મચારીઓની ભરતી કરવા મામલે વાઇસ ચાન્સેલર વિજયકુમાર શ્રીવાસ્તવનું નિવેદન સામે આવ્યું છે. તેમણે કહ્યું કે, રાજ્ય સરકારના શિક્ષણ વિભાગના નિર્ણયનો અમારે અમલ કરવો પડશે તેમજ આઉટસોર્સિંગથી કર્મચારીઓની ભરતી કરાશે તેવો વાઇસ ચાન્સેલરએ સંકેત આપ્યો છે. 

કર્મચારી મંડળના પ્રમુખનું નિવેદન
ગુજરાત રાજ્ય પછાત વર્ગ બક્ષીપંચ કર્મચારી મંડળના પ્રમુખ ઠાકોર સોલંકી કહ્યું કે,  યુનિવર્સિટીમાં આઉટસોર્સિંગથી કર્મચારીઓની ભરતી કરાશે તો યુનિવર્સિટીને બંધ કરી દઈશું તેમજ વાઇસ ચાન્સેલરએ ખુલીને હંગામી કર્મચારીઓના સમર્થનમાં બહાર આવવું જોઈએ અને સરકારમાં રજૂઆત કરી આઉટસોર્સિંગથી કર્મચારીઓની ભરતી અટકાવવી જોઈએ.