- પૂર્વ કૃષિમંત્રી કરશનજી ઠાકોર ઉપર હુમલો કર્યાની ફરિયાદ
- જમીન વહેંચણી નહી કરી આપતા દીકરા અને પૌત્રોએ કર્યો હતો હુમલો
- ટ્રેકટર ચઢાવી જાનથી મારી નાખવાની આપી હતી ધમકી
- પોતાના દીકરા અને પૌત્રો સહિત 6 શખ્સો સામે પૂર્વ મંત્રીએ બાવલું પોલીસમાં નોંધાવી ફરિયાદ
- કરશનજી ઠાકોર વર્ષ 1980 થી 1990 સુધી હતા કડીના ધારાસભ્ય
- વર્ષ 1985 થી 1990 સુધી કૃષિમંત્રી પણ રહી ચુક્યા છે
Kadi Crime News : આપણે ગુજરાતમાં એક કહેવત છે કે, જર, જમીન ને જોરુ એ ત્રણે કજિયાનાં છોરું. આ કહેવત મુજબની જ ઘટના મહેસાણા જિલ્લાના કડીથી સામે આવી છે. જોકે અહીં ચોંકાવનારી વાત તો એ છે કે, આ ઘટનાનો શિકાર ખુદ રાજ્યના પૂર્વ કૃષિમંત્રી બન્યા છે. આ સાથે એથી પણ ચોંકાવનારી વાત તો એ છે કે, ખુદ તેમના જ પુત્રોએ અન્ય ઇસમો સાથે મળી તેમની પર જમીન બાબતે હુમલો કર્યો છે. આ તરફ હવે ઘટનાને લઈ પૂર્વ કૃષિમંત્રીએ તેમના પુત્રો સહિત કુલ 6 ઇસમો સામે બાવલું પોલીસ મથકે ફરિયાદ નોંધાવી છે.
મહેસાણા જિલ્લામાં કડી તાલુકાના ચંદ્રાસણ ગામથી જમીન મામલે હુમલાની ઘટના સામે આવી છે. વિગતો મુજબ ચંદ્રાસણ ગામના વતની અને વર્ષો પહેલા ગુજરાત રાજ્ય સરકારમાં મંત્રી તરીકે રહેલા કરસનજી મગનજી ઠાકોર અત્યારે નિવૃત્ત જીવન જીવી રહ્યા છે. પૂર્વ કૃષિ મંત્રીની ચંદ્રાસણ ગામની સીમમાં સર્વે નંબર 1048, 1063 અને 1064 વાડી જમીન આવેલી છે અને અલગ અલગ પ્રકારના વાવેતર કરવામાં આવેલા છે. આ સાથે વિગતો મુજબ કરસનજી મગનજી ઠાકોરે જમીનની વહેંચણી કરેલી નથી તેમજ કબજા ભોગવટો પણ તેમનો જ છે.
જાણો શું છે સમગ્ર ઘટના ?
ગુરુવારના દિવસે પૂર્વ કૃષિમંત્રી કરસનજી મગનજી ઠાકોર પોતાના ઘરે જ હાજર હતા. આ દરમિયાન તેમણે જાણવા મળેલ કે, તેમની જમીનમાં કુલદીપ રાજેન્દ્ર ઠાકોર ટ્રેક્ટર લઈને આવ્યો છે અને જમીન ખેડી રહ્યો છે. જેથી કરસનજી ઠાકોર અને તેમનો પૌત્ર વિજય બાઈક લઈને પોતાની જમીને પહોંચ્યા હતા. જ્યાં તેમના જ એક બીજા દીકરા સહિતના છ ઇસમોએ ધોકા લાકડીઓ લઈને આવી પહોંચ્યા હતા અને ધાક ધમકીઓ પોતાના પિતાને જ ધક્કો મારી જાનથી મારી નાખીશું જેવી ધમકીઓ આપી હતી.
વાંચો વધુ: ગુજરાત ટુ ફ્રાંસ અને કબૂતરબાજી: યુવક ઝડપાયો, ગામના 50થી વધુ લોકોનું ભેદી મૌન... VTVના ગ્રાઉન્ડ રિપોર્ટમાં મોટો ખુલાસો
ગાળો બોલવાની ના પાડતા ઇસમો ઉશ્કેરાયા
આ દરમિયાન કરસનજીએ ગાળો બોલવાની ના પાડતા કુલદીપનું ઉપરાણું લઈને તેમના પુત્ર ગણપતજી, દશરથજી, તેમજ તેમના પૌત્રો હાથમાં ધોકા અને લાકડીઓ લઈને આવી પહોંચ્યા હતા અને જાનથી મારી નાખીશું જેવી ધમકીઓ આપવા લાગ્યા હતા. આ સાથે જમીનમાં ભાગ પાડી વહેંચણી કરી આપો નહીં તો આ ટ્રેક્ટર ચડાવી તમને જાનથી મારી નાખીશું જેવી ધમકીઓ આપીને ત્યાંથી ફરાર થઈ ગયા હતા.
અંતે નોંધાઈ પોલીસ ફરિયાદ
આ તરફ ગુજરાત રાજ્યના પૂર્વ મંત્રી પણ તેમના પુત્ર, પૌત્રો સહિતના છ ઇસમોએ હુમલો કરી દેતા પંથકમાં પણ હડકંપ મચી ગયો છે. નોંધનિય છે કે, છેલ્લા ઘણા વર્ષોથી પૂર્વ મંત્રી કરસનજી મગનજી ઠાકોરના પરિવારમાં જમીનની વહેંચણી બાબતે પારિવારિક તેમજ પોતાના જ પુત્રો સાથે વિવાદ ચાલી રહ્યો હતો. સમગ્ર બાબતે કરસનજી ઠાકોરે તેમના અન્ય એક પુત્રને જાણ કરીને બાવલું પોલીસ મથકમાં આવી પહોંચ્યા હતા અને 6 વિરુદ્ધ ગુનો દાખલ કરાવ્યો હતો. નોંધનિય છે કે, ઠાકોર કરશનજી વર્ષ 1980થી 1990 સુધી કડીના ધારાસભ્ય હતા અને 1985થી 90 સુધી કૃષિ મંત્રી તરીકે રહ્યા હતા.
