અમદાવાદ / ભાઈએ ઉછીના લીધેલા 2 લાખ પાછા ન આપતાં બહેને કર્યું ગજબ કામ

• બહેને ભાઈને વ્યાજ પર પૈસા આપ્યા હતા
• 2 લાખ રૂપિયાનું 5% વ્યાજ હતું
• બહેને ઉઘરાણી કરવા ભાઈના ઘરે ગુંડા મોકલ્યા

ભાઈએ બહેન પાસેથી ધંધા માટે પાંચ ટકા વ્યાજે બે લાખ રૂપિયા લીધા હતા​

જમાલપુરમાં ભાઈએ બહેન પાસેથી ધંધા માટે પાંચ ટકા વ્યાજે બે લાખ રૂપિયા લીધા હતા. વ્યાજ કે મૂડી આપી ન શકતાં બહેને ભાઈના ઘરે માણસો મોકલી પઠાણી ઉઘરાણી કરી ભાઈને લાફો મારી એક લાખનું બાઈક લઇ જઈ જાનથી મારી નાખવાની ધમકી આપી હોવાની ઘટના પ્રકાશમાં આવી છે.

અસલમભાઇ છિપાએ ચાર લોકો વિરુદ્ધમાં ગાયકવાડ હવેલી પોલીસ સ્ટેશનમાં ફરિયાદ કરી

જમાલપુર વિસ્તારમાં આવેલ ક‌િડયાશેરી પતંગબજારમાં રહેતા અસલમભાઇ છિપાએ ચાર લોકો વિરુદ્ધમાં ગાયકવાડ હવેલી પોલીસ સ્ટેશનમાં ફરિયાદ કરી છે. અસલમભાઈએ તેમની બહેન શબાના પાસેથી ધંધાર્થે પૈસાની જરૂર હોવાથી બે લાખ રૂપિયા પાંચ ટકા વ્યાજે લીધા હતા અસલમભાઈએ નિયમિત વ્યાજ સહિત ૪૩ હજાર રૂપિયા ચૂકવી દીધા હતા, જોકે ધંધાે બરાબર ચાલતો ન હોવાથી અસલમભાઈ બહેનને વ્યાજ કે મૂડી આપતા ન હતા. 

શબાનાએ ઉઘરાણી કરવા માટે માણસો મોકલ્યા હતા

થોડા દિવસ પહેલાં ઈમ્તિયાઝ-શાહબાઝ તથા સરફરાઝે તેમના ઘરે આવીને કહ્યું કે તારી બહેન શબાનાએ ઉઘરાણી કરવા મોકલ્યા છે. ત્યારબાદ અસલમભાઇના ઘર બહાર રહેલ એક લાખ રૂપિયાનું બાઈક લઇ જઈ કહ્યું કે પૈસા આપી જજે અને બાઈક લઇ જજે. ત્યારબાદ ત્રણેય યુવક જતા રહ્યા હતા. ગઈ કાલે ફરી ઈમ્તિયાઝે અસલમભાઇને ફોન કરી પૈસાની ઉઘરાણી કરી હતી અને પૈસા આપી દેજે, નહીં તો જાનથી મારી નાખીશ તેવી ધમકી આપી હતી.