ક્રિકેટ / ICC મહિલા ક્રિકેટ વર્લ્ડ કપમાં ટીમ ઈન્ડિયાની વિજયકૂચ અટકી, ન્યુઝીલેન્ડ સામે 62 રને પરાજય

• આઈસીસી વુમન્સ વલ્ડ કપ 2022માં ભારતની હાર
• ન્યૂઝીલેન્ડે 62 રનથી આપ્યો પરાજય
• ભારત વતી હરમનપ્રીત કૌરે ફટકાર્યાં 71 રન

આઈસીસી મહિલા વર્લ્ડ કપમાં ભારતનો વિજયરથ અટક્યો છે. ન્યૂઝીલેન્ડમાં રમાઈ રહેલા મહિલા વર્લ્ડ કપમાં યજમાન ટીમ ઈન્ડીયાને 62 રનથી પરાજય આપીને વિજય પતાકા લહેરાવી દીધી છે. ન્યૂઝીલેન્ડની ટીમે પહેલા બેટિંગ કરીને નિર્ધારીત 50 ઓવરમાં 260 રન કર્યાં હતા, આ રીતે ટીમ ઈન્ડીયાને જીત માટે 261 રનનો ટાર્ગેટ  મળ્યો હતો. 261 રનનો પીછો કરવા ઉતરેલી ટીમ ઈન્ડીયા 198 રનમાં ઓલઆઉટ થઈ ગઈ હતી. ભારત તરફથી પૂજા વસ્ત્રાકર સૌથી સફળ બોલર રહી હતી. તેણે 10 ઓવરમાં 34 રન આપીને 4 વિકેટ ઝડપી હતી. ભારત તરફથી હરમનપ્રીત કૌરે સૌથી વધુ 63 બોલમાં 71 રન બનાવ્યા હતા. મહિલા વર્લ્ડ કપ 2022માં સતત બીજી મેચ જીતવાનું ટીમ ઈન્ડીયાનું સપનું  પુરુ થઈ શક્યું  નથી. ટીમ ઈન્ડીયા પાકિસ્તાન સામેની મેચમાં જીતી હતી પરંતુ હવે તેને ન્યૂઝીલેન્ડ સામે હારનો સ્વાદ ચાખવો પડ્યો છે. 

New Zealand beat India by 62 runs in ICC Women's World Cup 2022. (Harmanpreet Kaur 71)

(Pic - BCCI Women) pic.twitter.com/8gyg4Yb4Tu

— ANI (@ANI) March 10, 2022

 લક્ષ્યનો પીછો કરવા ઉતરેલી ભારતીય ટીમની શરૂઆત નબળી રહી અને ઓપનર સ્મૃતિ મંધાના 6 રને જેસ કેરની બોલ પર આઉટ થઈ ગઈ. ભારતને બીજો ફટકો દીપ્તિ શર્મા (5)ના રૂપમાં લાગ્યો હતો. ન્યૂઝીલેન્ડને આ વિકેટ રિવ્યૂ પર મળી હતી. વાસ્તવમાં અમ્પાયરે દીપ્તિને નોટઆઉટ આપ્યો હતો, જે બાદ ન્યૂઝીલેન્ડે ડીઆરએસ લીધો હતો. ટીવી રિપ્લેમાં સ્પષ્ટ જોઈ શકાતું હતુ કે, કેરનો બોલ ઓફ સ્ટમ્પ પર હતો અને તે સીધો દીપ્તિના પેડ પર વાગ્યોનથી. ઝડપી બે વિકેટ ગુમાવ્યા બાદ ભારતીય કેપ્ટન મિતાલી રાજ અને યસ્તિકા ભાટિયાએ 24 રન જોડતાં ભારતીય ઈનિંગને ફરી પાટા પર લાવી દીધી હતી. જોકે ભાટિયા 28 રને તાહુહુની બોલિંગમાં આઉટ થયો હતો.

હરમનપ્રીત કૌરની મહેનત પાણીમાં ગઈ

ભારતની દિગ્ગજ ખેલાડી હરમનપ્રીત કૌરે સર્વાધિક 71 રન બનાવ્યાં હતા તેમ છતાં પણ ટીમ ઈન્ડીયાને હારનો સ્વાદ ચાખવો પડ્યો હતો. મિતાલીએ આ પછી વાઈસ કેપ્ટન હરમનપ્રીત કૌર સાથે મળીને ભારતની જીતની આશા જીવંત રાખતાં 47 રનની ભાગીદારી કરી હતી. મિતાલી 31 રને એમેલિયા કેરની બોલિંગમાં સ્ટમ્પ્ડ થઈ ગઈ હતી. ટીમ આઘાતમાંથી પણ બહાર આવી શકી નહતી કે, બીજા જ બોલ પર વિકેટકિપર રિચા ઘોષ ખાતું ખોલાવ્યા વિના જ પેવેલિયનમાં પાછી ફરી હતી. અગાઉની મેચમાં જોરદાર બેટીંગ કરનારી પૂજા વસ્ત્રાકર પણ 6 અને સ્નેહ રાણા 18 રને પેવેલિયનમાં પાછી ફરી હતી. જોકે હરમનપ્રીત કૌરે બેટીંગ જારી રાખતાં 43મી ઓવરમાં 2 છગ્ગા અને 2 ચોગ્ગા સાથે 20 રન ફટકાર્યા હતા. જોકે ત્યાર બાદની જ ઓવરમાં હરમનપ્રીત આઉટ થઈ ગઈ હતી અને જેવી તે પેવેલિયનમાં પાછી ફરી કે તરત જ ભારતનું બધુ જ નક્કી થઈ ગયું હતુ.

ટીમ ઈન્ડીયાએ પહેલી મેચમાં પાકિસ્તાનને આપી હતી હાર

મિતાલીની આગેવાની વાળી ટીમ ઈન્ડીયાએ મહિલા વર્લ્ડ કપની પહેલી મેચમાં પાકિસ્તાન સામે જીતીને વિજયની શરુઆત કરી હતી. 

ટીમ ઈન્ડીયા હવે 12 માર્ચે વેસ્ટ ઈન્ડીઝ સામે રમશે

મહિલા વર્લ્ડ કપની ત્રીજી મેચ ટીમ ઈન્ડીયા 12 માર્ચે વેસ્ટ ઈન્ડીઝ સામે રમશે. મિતાલી રાજની આગેવાની વાળી ટીમ વેસ્ટ ઈન્ડીઝની સામે જીતની  આશા સાથે જ ઉતરશે.