સુરત / મંત્રી કુમાર કાનાણીનો પુત્ર ફરી વિવાદમાં, ભાગીદાર સાથે બનાવેલી બિલ્ડિંગમાં વીજ કનેક્શન કપાતા રહીશો રોષે ભરાયા

Divyesh

Last Updated: 02:53 PM, 6 November 2020

FOLLOW ON

શેર કરો

ગુજરાતના આરોગ્ય મંત્રી કુમાર કાનાણીના પુત્રનું નામ વધુ એક વિવાદમાં સામે આવ્યું છે. પવિત્ર નગરી નામની સોસાયટીમાં કુમાર કાનાણીના દિકરાનો કથિત રીતે ભાગ હોવાને લઇને લોકોએ વીજ કનેકશન કપાઇ જતા તેઓ આરોગ્ય મંત્રીના ઘરે પહોંચીને વિરોધ કરતાં જોવા મળ્યાં હતા.

પ્રાપ્ત મળતી વિગત અનુસાર કામરેજ નજીક આવેલા ખોલવડા ગામમાં પવિત્ર નગરી નામની સોસાયટીના રેહવાસીઓ આરોગ્ય મંત્રી કુમાર કાનાણીના નિવાસ સ્થાને પહોંચ્યાં હતા. સોસાયટીના રહીશો દ્વારા આરોપ લગાવામાં આવ્યો છે કે બિલ્ડરો દ્વારા સોસાયટીના જનરલ મીટરનું બિલ ભરવામાં આવ્યું નથી, જેને લઇને સોસાયટીના ઘરોનું વીજ કનેકશન કાપી નાંખવામાં આવ્યું છે.

જો કે આ બિલ્ડીંગમાં આરોગ્ય મંત્રી કુમાર કાનાણીનો પુત્ર પણ ભાગીદાર હોય લોકો વિરોધ કરવા માટે કુમાર કાનાણીના ઘરે પહોંચ્યા હતા. જો કે આ અંગે પોલીસને જાણ થતાં ઘટનાસ્થળે પહોંચી હતી. જો કે ત્યારબાદ પોલીસે વચ્ચે પડી સમાધાનનો રસ્તો અપનાવવા અંગે સૂચન કર્યું હતું.

ઉલ્લેખનીય છે કે આ અગાઉ પણ આરોગ્ય મંત્રી કુમાર કાનાણીનો પુત્ર પ્રકાશ કાનાણી લોકડાઉન દરમિયાન રાત્રે પોતાના મિત્રને લેવા જતા પોલીસ સાથેનો વિવાદ સામે આવ્યો હતો. જેમાં મહિલા પોલીસ અને પ્રકાશ કાનાણીનો વીડિયો સોશિયલ મીડિયામાં વાયરલ થયો હતો.

સંકળાયેલા મુદ્દાઓ

Health Minister kumar kanani surat આરોગ્ય મંત્રી કુમાર કાનાણી સુરત surat