શનિવારથી સુરતમાં શરૂ થયેલો રાજકીય ડ્રામા હવે આગળ ચાલે એવું લાગતું નથી. હાલ એવું માનીને ચાલીએ કે રાજકીય નાટકનો એક અંક પૂરો થયો. સુરત લોકસભાના કોંગ્રેસના ઉમેદવાર નિલેશ કુંભાણીનું ફોર્મ રદ થયું. દિવસ દરમિયાન ઘટનાક્રમ સતત ચાલુ રહ્યો છે એટલે ટેકેદારોનું સોગંદનામુ, ચૂંટણી અધિકારી સામે હાજર થયા બાદ તેમનું ગૂમ થવું, ટેકેદારોનો સંપર્ક કરવાનો પ્રયાસ છતા ન થવો એ બધાથી લગભગ બધા વાકેફ છે. કોંગ્રેસ સ્વભાવિકપણે આ ઘટનાને ભાજપનું ષડયંત્ર ગણાવી રહી છે તો ભાજપનું કહેવું છે કે આ તમામ કોંગ્રેસના આંતરિક પ્રશ્નો છે જેમા અમારે કોઈ લેવા-દેવા નથી. હવે આગળ જતા આ ઘટના શું વળાંક લે છે તેની ખબર નથી પણ રાજકીય સોગઠાંબાજીમાં કોંગ્રેસ હારી ગઈ છે એ હકીકત છે. કદાચ હાઈકોર્ટમાં પિટીશન થશે, હેબિયર્સ કોર્પર્સ થશે પણ અત્યારે તો હકીકત એટલી જ છે કે ભાજપ સામે હવે મુખ્ય વિપક્ષ કોંગ્રેસનો ઉમેદવાર જ ચૂંટણી લડવા માટે નથી રહ્યો. જો આગામી દિવસોમાં અપક્ષ અને અન્ય નાની પાર્ટીઓના ઉમેદવાર પણ પોતાનો કોઈ ગજ વાગવાનો નથી એવુ માનીને ફોર્મ પરત ખેંચી લે તો સુરત બેઠક બિનહરીફ થઈ જાય. કોંગ્રેસને સવાલ એ કરવાનો કે શું ટેકેદારો પણ તેમના કહ્યાંમાં નથી, કોંગ્રેસના ઉમેદવાર સાથે જે ખેલ થયો તેમાં ખરેખર કોણ ફૂટી ગયું છે?, બંધબારણે રમત કોણ રમી ગયું અને કોની સાથે રમી ગયું.
સોગઠાંબાજીમાં કોંગ્રેસ પાછી પડી
સુરતના જંગની સોગઠાંબાજીમાં કોંગ્રેસ પાછી પડી છે. સુરત લોકસભાના કોંગ્રેસના ઉમેદવારની ઉમેદવારી રદ થઈ છે. નિલેશ કુંભાણીનું ફોર્મ રદ કરવામાં આવ્યું. શનિવારથી સુરતમાં રાજકીય ડ્રામા ભજવાતો હતો ત્યારે રાજકીય ડ્રામાનો આખરે અંત આવ્યો છે. સુરત લોકસભામાં ભાજપ સામે કોઈ મજબૂત ઉમેદવાર નથી. સવાલ એ છે કે રાજકીય સોગઠાંબાજીમાં કોંગ્રેસ ક્યાં હારી?
ઘટનાક્રમને સમજો
18 એપ્રિલે નિલેશ કુંભાણીએ સુરત લોકસભા માટે ફોર્મ ભર્યું હતું. શનિવારે ઉમેદવારી પત્રોની ચકાસણી થઈ હતી. નિલેશ કુંભાણીની ઉમેદવારી સામે ભાજપના ચૂંટણી એજન્ટે વાંધો લીધો હતો. ભાજપના ચૂંટણી એજન્ટના વાંધા સામે ચૂંટણી અધિકારીએ સુનાવણી કરી હતી. ચૂંટણી અધિકારી સમક્ષ કુંભાણીના ટેકેદારો હાજર થયા અને ટેકેદારોએ કહ્યું કે તેમની સહી ખોટી રીતે કરવામાં આવી છે. ટેકેદારોએ પોતાની ખોટી સહી થઈ હોવાનું સોગંદનામું પણ કર્યું. ચૂંટણી અધિકારી સામે હાજર થયા પછી કુંભાણીના ટેકેદારો ગૂમ થઈ ગયા હતાં. નિલેશ કુંભાણીએ ટેકેદારોને હાજર કરવા સમય માગ્યો હતો. નિલેશ કુંભાણીના ટેકેદારોનો સંપર્ક ન થઈ શક્યો અને ટેકેદારોના અપહરણની પણ ફરિયાદ કરવામાં આવી હતી. ટેકેદારો નિયત સમયમર્યાદામાં હાજર ન થયા. ચૂંટણી અધિકારીએ ચકાસણી બાદ નિલેશ કુંભાણીનું ફોર્મ રદ કર્યું છે.
કોંગ્રેસે શું કહ્યું?
કોંગ્રેસે કહ્યું કે, આ રીતે ઉમેદવારનું ફોર્મ રદ ન થઈ શકે અને ટેકેદારોની સહી ન હોય તો ફોર્મ રદ થઈ શકે. ટેકેદાર કહે કે સહી ખોટી છે તો ફોર્મ રદ ન થઈ શકે. કાયદામાં ઉલટતપાસની જોગવાઈ છે. ભાજપ ચૂંટણી જીતીો શકે એમ નથી એટલે ષડયંત્ર કરે છે. નિષ્પક્ષ ચૂંટણી થશે તો ભાજપ હારી જશે. અમારા વકીલે વિસ્તારથી દલીલો કરી હતી. એક ટેકેદારે આવવાની વાત કરી પછી તેનો ફોન બંધ આવ્યો અને ટેકેદારોને હાજર કરો એ જ અમારી માગ છે
કોંગ્રેસની હવે સ્થિતિ શું?
ગુજરાતમાં કોંગ્રેસ પહેલા 24 બેઠક ઉપર ચૂંટણી લડતી હતી હવે કોંગ્રેસ ગુજરાતમાં 23 લોકસભા બેઠક ઉપર જ ચૂંટણી લડશે. સુરતના કોંગ્રેસ ઉમેદવારનું ફોર્મ રદ થયું છે. ભાવનગર અને ભરૂચ બેઠક ગઠબંધનના ઉમેદવારને ફાળવાઈ છે
સુરત બેઠક ઉપર જંગ નહીં જામે?
સુરત લોકસભા બેઠકના કોંગ્રેસના ઉમેદવારનું ફોર્મ રદ થયું છે. ચૂંટણી અધિકારીએ સુરત માટે 8 ફોર્મને માન્ય કર્યા છે. ભાજપ સહિત 3 અપક્ષ, 1 BSP અને 3 સ્થાનિક પક્ષના ફોર્મ મંજૂર થયા છે. ભાજપ સિવાયના અન્ય ઉમેદવારો ફોર્મ પરત ખેંચે તેવી શક્યતાઓ છે. અન્ય ઉમેદવારો ઉમેદવારી પાછી ખેંચે તો સુરત બેઠક બિનહરીફ થઈ શકે
