પર્દાફાશ / અમદાવાદમાં ચણા મમરાની જેમ MD ડ્રગ્સને વેચતો પેડલર ઝબ્બે, પોલીસે સરભરા કરતાં સામે આવી ચોંકાવનારી હકીકત

• જાહેરમાં એમડી ડ્રગ્સ વેચતા પેડલરને SOGએ ઝડપ્યો
• પૂછપરછમાં પોપટની જેમ બોલવા લાગ્યો પેડલર
• શાહઆલમના રાશિદ પાસેથી ડ્રગ્સ ખરીદ્યું હતું

ડ્રગ્સના નેટવર્કનો પર્દાફાશ અનેક વખત પોલીસ તેમજ સુરક્ષા એજન્સીઓ દ્વારા કરવામાં આવે છે પરંતુ ડ્રગ્સ માફિયાઓએ પોતાનું નેટવર્ક અમદાવાદ સહિત ગુજરાતમાં એવી રીતે ઘુસાડી દીધું છે કે જેનો હિસ્સો એજ્યુકેટેડ લોકો પણ બની ગયા છે. યુવકો અને યુવતીઓ ડ્રગ્સના નશામાં એવી રીતે ડૂબી ગયાં છે કે હવે ડ્રગ્સ માફિયાઓને ફાવતું મળી ગયું છે. સ્થાનિક પોલીસ, સ્પેશિયલ ઓપરેશન ગ્રુપ (એસઓજી), ક્રાઇમ બ્રાંચ સહિતની ટીમ અનેક વખત એમડી ડ્રગ્સનો જથ્થો ઝડપી પાડે છે પણ દર વખતે નવા નવે પેડલર્સ સામે આવી જાય છે. મોડી રાતે સ્પેશિયલ ઓપરેશન ગ્રુપની ટીમે સારંગપુર વિસ્તારમાં જાહેરમાં એમડી ડ્રગ્સ વેચતા પેડલરને ઝડપી પાડીને 3.24 લાખનો મુદ્દામાલ જપ્ત કર્યો છે. 

શહેરમાં MD ડ્રગ્સ મહાસંકટ બન્યું
ડ્રગ્સ માફિયાને તો પોલીસ રોકી રહી છે પરંતુ નશો કરનારને પકડવા માટે પણ પોલીસે એક અભિયાન શરૂ કર્યું છે. શહેરમાં એમડી ડ્રગ્સ મહાસંકટ બની ફેલાઇ રહ્યું છે જેને રોકવા માટે પોલીસ એલર્ટ છે અને યુવાઓને ડ્રગ્સની લતથી બચાવી રહ્યા છે. ચોંકાવનારી વાત એ છે કે ચણા મમરાની જેમ એમડી ડ્રગ્સનું વેચાણ અમદાવાદમાં થઇ રહ્યું છે. જે આવનારા સમય માટે ખતરાની ઘંટડી સાબિત થશે. 

બાતમીના આધારે કરાઈ ધરપકડ
સ્પેશિયલ ઓપરેશન ગ્રુપની ટીમને બાતમી મળી હતી કે સારંગપુર સર્કલ પાસે જાહેર રોડ પર અબ્દુલવાજિદ શેખ (રહે, શમા સોસાયટી, વેજલપુર) એમડી ડ્રગ્સનું વેચાણ કરી રહ્યો છે. બાતમીના આધારે એસજીની ટીમે અબ્દુલ વાજિદને ઝડપી પાડ્યો હતો. જેની પાસેથી 3.24 લાખ રૂપિયાનું એમડી ડ્રગ્સ મળી આવ્યું હતું. એસઓજીની ટીમે એફએસએલની મદદ લઇને એમડી ડ્રગ્સનું પરીક્ષણ કરાવ્યું હતું. એસઓજીની ટીમે અબ્દુલવાજિદની આગવી સ્ટાઇલથી પૂછપરછ કરી હતી. જેમાં તેણે કબૂલાત કરી હતી કે શાહઆલમ વિસ્તારમાં રહેતા રાશિદ નામના યુવક પાસેથી ડ્રગ્સ ખરીદ્યું હતું. એસઓજીએ અબ્દુલ વાજિદ અને રાશિદ વિરુદ્ધ ગુનો દાખલ કરીને તપાસ શરૂ કરી છે.