Ahmedabad News: ગુજરાત યુનિવર્સિટીમાં આવેલ કે.એસ સ્કૂલ ઓફ બિઝનેસ મેનેજમેન્ટમાં એડમિશન પ્રક્રિયામાં છબરડો, મિત્રએ જ 5 વિદ્યાર્થીઓ પાસેથી પૈસા લઈને અપાવ્યા નકલી એડમિશન, વિદ્યાર્થીઓ રોલનંબર ન આવતા કો-ઓર્ડિનેટરને પૂછવા ગયા ત્યારે ભાંડો ફૂટ્યો.
Share
ગુજરાત યુનિ.ની કે.એસ. સ્કૂલમાં રૂપિયા લઈને વિદ્યાર્થીઓને પ્રવેશ
રોલનંબર ન આવતા કો-ઓર્ડિનેટરને પૂછવા ગયો ત્યારે ભાંડો ફૂટ્યો
પ્રવેશ અપાવવા માટે આરોપીએ 17થી 20 હજાર રૂપિયા કર્યા હતા નક્કી
Ahmedabad News: ગત માર્ચ મહિનામાં યોજાયેલી બોર્ડની પરીક્ષાના પરિણામ જાહેર થયા બાદ મોટાભાગના વિદ્યાર્થીઓએ કોલેજોમાં એડમિશન લઈ લીધા છે. હાલ દરેક કોર્સમાં પ્રવેશ પ્રક્રિયા પણ પૂર્ણ થઈ ગઈ છે અને કોલેજો પણ ચાલું થઈ ગઈ છે. જોકે, હજુ પણ કેટલાક વિદ્યાર્થીઓ કોલેજોમાં પ્રવેશ માટે પ્રયાસ કરી રહ્યા છે. જેના માટે તેઓ પૈસા ચૂકવીને પણ એડમિશન લેવા માટે તૈયાર છે. ત્યારે વિદ્યાર્થીઓની મજબૂરીનો ફાયદો ઉઠાવવા કેટલાક ઠગો એક્ટિવ થયા છે. ત્યારે અમદાવાદના વિદ્યાર્થીઓ પાસેથી પૈસા લઈને ખોટા અડમિશન આપવામાં આવતા ખળભળાટ મચી ગયો છે. જોકે, આ મામલે કોઈ પોલીસ ફરિયાદ કરવામાં આવી નથી.
ફાઈલ ફોટો
મેરિટ લિસ્ટમાં નામ ન આવતો ફૂટ્યો ભાંડો
ગુજરાત યુનિવર્સિટીની કે.એસ.સ્કૂલમાં રૂપિયા લઈને વિદ્યાર્થીઓને ખોટા પ્રવેશ ફાળવી દેવામાં આવતા ખળભળાટ મચી ગયો છે. મિત્રએ જ રૂપિયા લઈને 5 વિદ્યાર્થીઓને ગુજરાત યુનિવર્સિટી કેમ્પસમાં આવેલા કે.એસ.સ્કૂલ ઓફ બિઝનેસ મેનેજમેન્ટ અને એમએસસી આઇટીમાં ખોટા પ્રવેશ ફાળવી દીધા. જોકે, કોલેજ શરૂ થયા બાદ મેરિટલિસ્ટમાં વિદ્યાર્થીઓના નામ ન હોવાથી ભાંડો ફૂટ્યો હતો. કૌભાંડ સામે આવ્યા બાદ પણ યુનિવર્સિટીએ ફરિયાદ કરવાના બદલે પરસ્પર મામલો ઉકેલી લેવા તાકીદ કરી હતી.
વિદ્યાર્થીઓ પહોંચ્યા હતા કો-ઓર્ડિનેટર પાસે
પ્રાપ્ત વિગતો અનુસાર, કે.એસ.સ્કૂલ ઓફ બિઝનેસ મેનેજમેન્ટમાં ચાલતાં ઇન્ટિગ્રેટેડ એમબીએ અને એમએસસી આઇટી કોર્સમાં એડમિશન મળી ગયું હોવાનું માનીને છેલ્લા કેટલાક દિવસથી વિદ્યાર્થીઓ કોલેજમાં ક્લાસ એટેન્ડ કરી રહ્યા હતા. જે બાદ લાંબા સમય સુધી આ વિદ્યાર્થીઓને રોલ નંબર જાહેર ન થતાં તેઓ કો-ઓર્ડિનેટર પાસે પહોંચ્યા હતા અને તેમને કેમ રોલ નંબર જાહેર કરવામાં આવ્યા નથી તે અંગેની પૂછપરછ કરી હતી.
ફાઈલ ફોટો
હચમચી ગયા વિદ્યાર્થીઓ
જે બાદ કો-ઓર્ડિનેટરે તેમની યાદી ચકાસતા આ પાંચેયના નામ યાદીમાં નહોંતા. જેથી કો-ઓર્ડીનેટરે આ વિદ્યાર્થીઓના પ્રવેશ જ થયા ન હોવાનું જણાવ્યું હતું. આ જાણી પાંચેય વિદ્યાર્થીઓ હચમચી ગયા હતા. તેમણે સમગ્ર મામલો વાલીઓને જણાવતા તેમના વાલીઓ પણ કોલેજ ખાતે દોડી આવ્યા હતા. આ દરમિયાન વાલીઓ રજિસ્ટ્રારને મળવા પહોંચ્યા હતા. જ્યાં વાલીઓને પૂછતા તેઓએ કહ્યું હતું કે વિદ્યાર્થીઓના મિત્રએ અંદાજે 17 હજાર રૂપિયાથી લઇને 20 હજાર રૂપિયા લઈને તેમના બાળકોને કે.એસ.સ્કૂલમાં પ્રવેશ ફાળવી દેવાની બાંયેધરી આપી હતી.
પરસ્પર મામલો ઉકેલ્યો
યુનિવર્સિટીના કે.એસ.સ્કૂલમાં એમબીએ અને એમએસસી આઇટીમાં પાંચ વિદ્યાર્થીઓને ખોટા પ્રવેશ ફાળવનારા શખ્સે ફીની પહોંચ પણ આપી હતી. જોકે, આ પહોંચ ખોટી હતી. જે બાદ યુનિવર્સિટી દ્વારા આ શખ્સને બોલાવીને વાલીઓને તેની સામે ફરિયાદ કરવા જણાવ્યું હતું. જોકે, પ્રવેશ અપાવનારા અને લેનારા પરસ્પર ઓળખતાં હોવાથી રૂપિયા પરત આપે તો પોલીસ ફરિયાદ ન કરવાનું વલણ દાખવ્યું હતું. જેથી બંને પક્ષે વચ્ચે આ મામલે સહમતિ થતાં તેઓએ ફરિયાદ કરી નહોંતી.
