ફેસલો ગુજરાતનો / ભલભલા એક્સપર્ટ્સના ગણિત ફેલ કરવા માટે જાણીતું છે સૌરાષ્ટ્ર, આજે શું થશે?

• સૌરાષ્ટ્ર વિસ્તારમાં કોનો જાદુ ચાલશે?
• સૌરાષ્ટ્રના પરિણામો ફરી ચોંકવાશે?
• ચોંકાવનારા પરિણામ આપવા માટે જાણીતું છે સૌરાષ્ટ્ર

ચૂંટણી પરિણામ દરમિયાન સૌરાષ્ટ્રની બેઠકો પર સૌની નજર રહેશે કારણ કે સૌરાષ્ટ્ર વિસ્તાર હંમેશા ચોંકાવનારા પરિણામ આપવા માટે જાણીતો છે. એ જ રીતે આ વખતેની વિધાનસભાની ચૂંટણીના પરિણામમાં પણ સૌરાષ્ટ્રના મતદારોનો મિજાજ કેવો રહેશે એ એકદમ સચોટ રીતે કોઈ કહી શકે તેમ નથી. જો કે વિધાનસભા હોય, લોકસભા હોય કે પછી નગરપાલીકાની ચૂંટણી હોય સૌરાષ્ટ્રના પરીણામોએ હંમેશા રાજકીય પક્ષોને ઝટકો આપ્યો છે. ચાલો જોઈએ કેવો રહ્યો છે સૌરાષ્ટ્રનો ઈતિહાસ...

ગુજરાતમાં તારીખ 1 અને 5 ડિસેમ્બરના રોજ 15મી વિધાનસભાની બે તબક્કામાં ચૂંટણી યોજાઇ. જેનું મતદાન આજે પૂર્ણ થઇ ગયું છે. જેનું પરિણામ આજે ગુરુવારને 8 ડિસેમ્બરના રોજ આવશે. ત્યારે આ ચૂંટણીમાં વિધાનસભાની 182 બેઠકો માટે કુલ 1621 ઉમેદવારો મેદાનમાં હતા. જેમાં પહેલા તબક્કાની 89 બેઠકો માટે 788 ઉમેદવારો અને બીજા તબક્કાની 93 બેઠકો માટે 833 ઉમેદવારો વચ્ચે જંગ ખેલાયો હતો. ગુજરાત વિધાનસભાની ચૂંટણીના બંને તબક્કામાં કુલ 64.30 ટકા મતદાન નોંધાયું છે. જે ગત ચૂંટણી કરતા 4 ટકા ઓછું છે. ગુજરાતમાં 2017માં બંને તબક્કામાં કુલ 68 ટકા મતદાન નોંધાયું હતું. ગઇકાલે બુધવારે પ્રેસ કોન્ફરન્સમાં મુખ્ય નિર્વાચન અધિકારી પી. ભારતીએ જણાવ્યું હતું કે, અમદાવાદમાં 03 મતગણતરી કેન્દ્રો પર, સુરતમાં 02 મતગણતરી કેન્દ્ર પર અને આણંદમાં પણ 02 મતગણતરી કેન્દ્રો છે. એ સિવાય તમામ જિલ્લાઓમાં એક-એક મતગણતરી કેન્દ્ર ઉપર એકીસાથે મત ગણતરી શરૂ કરાશે.