આકાશી આફત / બનાસકાંઠા જળબંબાકાર: ખેતરો અને ઘરોમાં 5-5 ફૂટ પાણી, દ્રશ્યોમાં દર્દ છલકાય છે

• બનાસકાંઠા જિલ્લામાં વરસાદથી તારાજી
• ડીસાના 15 તળાવ થયા ઓવરફ્લો
• ખેડૂતોને બાજરીના પાકમાં મોટું નુકસાન પહોંચ્યું

કચ્છ-દ્વારકા બાદ બિપરજોયનો કહેર બનાસકાંઠા જિલ્લામાં પણ વરસ્યો છે. જિલ્લામાં ભારે પવન સાથે ભારે વરસાદ થયો છે. જેના કારણે ખેડૂતોને લાખો રૂપિયાની નુકસાની વેઠવાનો વારો આવ્યો છે. ભારે વરસાદથી ખેતરો હજુ પણ તરબતર છે. 24 કલાક બાદ પણ લોકોના ઘરમાં અને ખેતરોમાં પાણી પાણી જ પાણી જોવા મળી રહ્યું છે.

વરસાદથી ખેતરો હજુ પણ તરબતર 
થરાદ, ધાનેરા અને ડિસા સહિતના વિસ્તારોમાં ખેતરમાં વસવાટ કરતાં લોકોના ઘરોમાં પાણી ઘૂસ્યા છે તેમજ અનાજ અને ઘરવખરી પલળી જતા લોકો મુશ્કેલીમાં મુકાયા છે. જ્યાં તમામ ખેતરો પણ જળબંબાકાર જોવા મળી રહ્યા છે. સ્થાનિકોએ તાત્કાલિક સહાય ચૂકવવા માગ કરી રહ્યાં છે. જિલ્લાના વાવ, થરાદ, લાખણી અને ધાનેરામાં દાડમમાં સૌથી વધુ નુકસાન થયું છે. ખેડૂતોએ 5 વર્ષથી ઉછરેલા દાડમના છોડ જમીનદોસ્ત થતા ખેડૂતોને મોટું આર્થિક નુકસાન થયું છે. બીજી તરફ લાખણી પંથકમાં અનેક ગામોમાં આકાશી આફતે તબાહી મચાવી છે. જ્યાં એક તરફ ખેડૂતો ચોમાસું વાવાતરની તૈયારીમાં હતા તો બીજી તરફ વાવાઝોડા અને વરસાદના કારણે ખેતરમાં 5 ફૂટ પાણી ભરાતા ખેડૂતોની હાલત કફોડી બની છે.. અહીં ખેડૂતોને બાજરીના પાકમાં મોટું નુકસાન પહોંચ્યું છે. ખેડૂતોની તમામ ઘરવખરી સાથે તેમના પશુઓને ખાવા માટેનો ચારો પણ નાશ પામ્યો છે..

ખેતરો બેટમાં ફેરવાયા
તો બીજી તરફ લાખણી તાલુકાના અનેક ગામના ખેતરો બેટમાં ફેરવાયા છે જ્યાં નજર કરો ત્યાં પાણી જ પાણી નજરે ચડી રહ્યો છે. ભારે પવન સાથે વરસાદ ખાબકતા ડેકા ગામમાં ભારે નુકસાન થયું છે. ખેતરોમાં પાણી ભરાઈ જતા બાજરીના પાકને ભારે નુકસાન થયું છે. અહીં  ખેડૂતોને લાખો રૂપિયાનું નુકસાન ભોગવવાનો વારો આવ્યો છે. તેમજ અહી પણ સરકાર સર્વે કરી યોગ્ય સહાય કરે તેવી ખેડૂતો માગ કરી રહ્યાં છે. 

ખેડૂતોઓએ વેદના ઠાલવી
થરાદ, ધાનેરા અને ડીસાના ગામડાઓમાં વરસાદના 12 કલાક બાદ પણ ખેતરોમાં 5 ફૂટ પાણી ભરાયેલા દર્શયો સામે આવ્યા છે. જ્યાં ખેડૂતોએ જણાવ્યું કે, ચોમાસાની શરૂઆતમાં જ આવી હાલત થઈ ગઈ છે અને હવે ખેડૂતો ચોમાસામાં ખેતી કરવી મુશ્કેલ બનશે તેમણે વધુમાં કહ્યું કે, પશુઓ માટેનો ઘાસચારો પણ પાણીમાં છે તો બીજી તરફ નવા ઘાસચારાનું વાવતેર થઈ શકે તેમ નથી અને પાણી ભરાયા હોવાથી ખેતીકામ બંધ રહેશે. 

15 તળાવ ઓવરફ્લો થયા 
બનાસકાંઠા જિલ્લામાં ભારે વરસાદ બાદ અનેક ગામમાં તારાજીના દ્રશ્યો સામે આવ્યા છે તો બીજી સારી બાબત પણ સામે આવી છે, કે ડીસા તાલુકાના 15 તળાવ ઓવરફ્લો થયા છે. તળાવો ઓવરફ્લો થતાં ગ્રામજનોમાં ખુશીનો માહોલ જોવા મળી રહ્યો છે. તળાવો ભરાતા ખેડૂતોને સિંચાઈ માટે પાણી મળી રહેશે. 

શાળાની દીવાલ જમીન દોસ્ત
ડીસા તાલુકાની લાંછિયા પ્રાથમિક શાળાની દીવાલ જમીન દોસ્ત છે. શાળાની અંદરથી પાણી પસાર થતા દીવાલ તૂટી છે જેના કારણે શાળામાં આવવાનો રસ્તો બંધ થયો છે. ઘટના સમયે શાળામાં રજા હોવાથી મોટી જાનહાનિ ટળી છે તેમજ બે દિવસ બાદ આજે શાળા શરૂ થઈ છે. રસ્તો ખરાબ હોવાના કારણે આજે ધોરણ 1થી 5માં માત્ર 25 બાળકો જ શાળામાં પહોંચ્યા હતા