સાળંગપુર વિવાદ / 'શ્રીરામ-શિવજી પણ એકબીજા સામે હાથ જોડીને ઊભા છે એનો અર્થ એ નથી...', દેવતાના અપમાન પર શું બોલ્યા પુષ્પેન્દ્ર મહારાજ

• સાળંગપુર ભીતચિત્ર વિવાદ પર પુષ્પેન્દ્ર મહારાજની પ્રતિક્રિયા
• ધર્મદેવ અને ભક્તિમાતાના કુળદેવ હનુમાનજી
• લેફ્ટિસ્ટ કોમ્યુનિસ્ટ માણસોનું જોર ચાલી રહ્યું છે

સાળંગપુર હનુમાનજીના ભીતચિત્રને લઈને થયેલા વિવાદમાં પુષ્પેન્દ્ર મહારાજની પ્રતિક્રિયા સામે આવી છે. પુષ્પેન્દ્ર મહારાજે સ્વામિનારાયણ સંપ્રદાયના લોકો ધર્મકુળના હોવાનો દાવો કર્યો છે. આ સાથે તેમણે અયોધ્યા અને રામચંદ્ર ભગવાન સાથે નાતો હોવાનો પણ દાવો કર્યો છે.  પુષ્પેન્દ્ર મહારાજે કહ્યું કે, ધર્મદેવ અને ભક્તિમાતાના કુળદેવ હનુમાનજી છે. તેમણે ઉમેર્યું હતું કે, નીલકંઠવર્ણી ભૂખ્યા હોય ત્યારે અનેક વખત હનુમાનજીએ ભોજન આપ્યું હતું. 

પુષ્પેન્દ્ર મહારાજે કહ્યું કે, 11થી 12 વર્ષના તપસ્વી નીલકંઠવર્ણી ઉર્ફે ઘનશ્યામ પાંડેની અનેક વખત હનુમાનજીએ રક્ષા કરી છે. આ સાથે કહ્યું કે, નીલકંઠવર્ણી ભૂખ્યા હોય ત્યારે અનેક વખત હનુમાનજીએ ભોજન આપ્યું છે. તેમણે કહ્યું કે, પ્રણામ કરતા દર્શાવવા તે હનુમાનજીનો વિવેક.  સનાતન ધર્મમાં લેફ્ટિસ્ટ કોમ્યુનિસ્ટ માણસોનું જોર ચાલી રહ્યું છે. 

શું કહ્યું પુષ્પેન્દ્ર મહારાજે ? 
પુષ્પેન્દ્ર મહારાજે કહ્યું કે, નિલકંઠ વર્ણી જ્યારે વનમાં વિચરણ કરતા ત્યારે તેઓને જ્યારે ભોજન પ્રાપ્ત નહોતું થતું તો હનુમાનજી મહારાજ ધર્મદેવના કુળદેવતા હોવાના કારણે જ્યારે-જ્યારે તેમને જરૂર પડતી ત્યારે હનુમાનજી મહારાજે તેમની રક્ષા કરી છે. આ સાથે નીલકંઠ દેવ અને માતા પાર્વતીએ પણ ઘનશ્યામ મહારાજને જમાડેલા છે. અને જો એક સ્વામિનારાયણના સત્સંગી તરીકે જોઇએ તો જેને-જેને જ્યારે જરૂર પડે ત્યારે હનુમાનજી મહારાજ પ્રગટ થાય છે.

પુષ્પેન્દ્ર મહારાજે ઉમેર્યું કે, હનુમાનજી મહારાજ એટલા બધા મોટા દેવ છે કે તેમને એ વિવેક અને વાણી અને એ વર્તન એમનામાં છે કે 12 વર્ષના એક બ્રહ્મચારી તપસ્વી વેશમાં વનમાં ફરતા હોય ત્યારે તેમને પ્રણામ કરીને જમાડે એ તેમનો વિવેક છે. પ્રણામનો અર્થ એ નથી કે સાષ્ટાંગ દંડવત પ્રણામ કરવા. માટે જ આટલા બધા વાંધા ઊભા થયા છે. પ્રણામ કરવા તેનો અર્થ જરા સંસ્કૃતમાં જાણી લેજો.

શ્રીરામ-શિવજી પણ એકબીજા સામે હાથ જોડીને ઊભા છે 
પુષ્પેન્દ્ર મહારાજે કહ્યું કે, ભગવાનના અન્ય કોઇ પણ અવતાર, જેમ કે રામચંદ્રજી શિવ ભગવાનની સામે હાથ જોડીને ઊભા છે અથવા તો શિવ પોતે રામચંદ્રજી સામે હાથ જોડીને ઊભા છે તો એનો અર્થ એ બિલકુલ નથી થતો કે આ ઊંચા છે ને પેલા નીચા છે. જેને વિવેક નથી ખબર, કશું જ નથી જાણતા અને ખાસ કરીને જે લોકોને આજે મફતમાં ઇન્ટરનેટ મળી ગયું છે અને કશું જ કાર્ય કર્યા વગર, વગર શ્રમ કર્યે કઇ જ કાર્ય કર્યા વગર પોપ્યુલર થવા માટેનો આ જે માર્ગ મળ્યો છે તે સનાતન ધર્મની સંસ્કૃતિ ઉપર લેફતિસ્ટ કોમ્યુનિટી વિચારધારાવાળાઓનું ફૂલ જોર ચાલી રહ્યું છે. તમે સનાતન સંસ્કૃતિનો નાશ કરવા બેઠા છો. બહુ જ વાંધો હોય તો આખું લિસ્ટ છે ગુગલમાં જોઇ લેજો. કે અન્ય સંપ્રદાયો, અન્ય માન્યતાવાળા લોકો આપણા સનાતન સંસ્કૃતિ માટે શું-શું બોલે છે. એટલે ત્યાં જઇને વિરોધ કરશો તો તમારી વીરતા દેખાશે.