યૌન શૌષણ કેસ / સહમતિથી સેક્સ સંબંધ બાંધનાર સગીરોને POCSO હેઠળ ગુનેગાર ન ઠેરવી શકાય- હાઈકોર્ટનો મહત્વનો ચુકાદો

• POCSO કેસમાં બોમ્બે હાઈકોર્ટનો મહત્વનો ચુકાદો
• સહમતિથી બાંધેલા રોમેન્ટિક સંબંધોમાં POCSO લાગુ ન પડે
• બળજબરીથી બાંધવામાં આવેલા સંબંધોમાં POCSO લાગુ પડે 

બાળકોને યૌન હુમલાથી બચાવવા માટે લાગુ પાડવામાં આવેલા POCSO કાયદાને લઈને બોમ્બે હાઈકોર્ટે એક મહત્વનો ચુકાદો આપ્યો છે. સગીર પર રેપના આરોપી 22 વર્ષીય યુવકને છોડી મૂકતાં બોમ્બે હાઈકોર્ટે એવી ટીપ્પણી કરી કે સંમતિપૂર્ણ રોમેન્ટિક સંબંધો માટે સગીરોને સજા અને ગુનાહિત બનાવવા માટે પોક્સો એક્ટ બનાવવામાં આવ્યો નથી.

બાળકોને યૌન હુમલાથી બચાવવા બનાવાયો પોક્સો, સંમતિવાળી સંબંધો માટે નહીં 
જસ્ટિસ અનુજા પ્રભુદેસાઈની સિંગલ બેન્ચ આ કેસની સુનાવણી કરી રહી હતી. ખંડપીઠે કહ્યું કે તે સાચું છે કે આ કેસમાં પીડિતા સગીર હતી, પરંતુ તેનું નિવેદન પ્રથમ દ્રષ્ટિએ બતાવે છે કે આ સંબંધ બંને માટે સંમતિપૂર્ણ હતો. પોક્સો એક્ટ બાળકોને જાતીય હુમલાના ગુનાઓથી બચાવવા બનાવાયો છે, સંમતિથી સંબંધો બાંધતા સગીરોને સજા આપવા પોક્સો એક્ટ નથી બનાવાયો.  

કોર્ટે આરોપીને કેમ છોડી મૂક્યો 
હાઈકોર્ટે બંને પક્ષોની દલીલો સાંભળી, પુરાવાઓનો અભ્યાસ કર્યો અને કહ્યું કે આરોપી 17 ફેબ્રુઆરી, 2021 થી કસ્ટડીમાં છે. હજુ ટ્રાયલ શરૂ થઈ નથી. ઘણા બધા કેસ પેન્ડિંગ છે તે જોતાં તરત જ ટ્રાયલ શરૂ થવાની શક્યતા ઓછી છે એમ કહી શકાય. આરોપીને વધુ કસ્ટડીમાં રાખીને, તે ભયાનક ગુનેગારો સાથે જોડાશે જે તેના હિત માટે હાનિકારક હશે. સાથે જ કોર્ટે ચાર શરતોને અધીન રહીને આરોપીને જામીન પર છોડવાનો આદેશ કર્યો હતો.

શું બની હતી ઘટના 
કોર્ટ ઈમરાન શેખ નામના એક યુવક દ્વારા દાખલ કરવામાં આવેલી અરજી પર સુનાવણી કરી રહી હતી. ઇમરાનની મુંબઇ પોલીસે એક સગીરાના અપહરણ અને બળાત્કારના મામલે ધરપકડ કરી હતી. સગીરાની માતાની ફરિયાદ પરથી યુવક સામે આઈપીસીની કલમ 363, 376 અને પોક્સો એક્ટની કલમ 4 મુજબ ગુનો નોંધવામાં આવ્યો હતો. કેસ મુજબ સગીરા 27 ડિસેમ્બર, 2020 ના રોજ ઘરેથી નીકળી ગઈ હતી જે પછી બે-ત્રણ દિવસ તેની સહેલીના ઘેર રહી હતી. આરોપ છે કે એક રાત્રે આરોપીએ સગીરા  બિલ્ડિંગની છત પર બોલાવી અને તેની સાથે બળજબરીથી સંબંધ બાંધ્યા હતા.