મોભો / PM મોદી રાષ્ટ્રપતિના વતનમાં કેમ બોલ્યા કે મને શરમ આવી ગઈ, પછી લોકોએ તાળીઓ પાડી

• કાનપુરમાં બે દિગ્ગજ નેતાઓની હાજરી
• રાષ્ટ્રપતિ કોવિંદ અને પીએમ મોદી પહોંચ્યા પરૌખ
• રાષ્ટ્રપતિએ તમામ પ્રોટોકોલ તોડી નાખ્યા 

ઉત્તર પ્રદેશના કાનપુરમાં શુક્રવારે ભારતના બે સૌથી ટોચના નેતાઓની એક સાથે હાજરી જોવા મળી હતી. રાષ્ટ્રપતિ રામનાથ કોવિંદ તેમના વતન ગામ પરૌખ પહોંચ્યા હતા. પછીથી વડાપ્રધાન નરેન્દ્ર મોદી પણ કાનપુર ગ્રામ્ય વિસ્તારમાં સ્થિત તેઓના ગામમાં પહોંચ્યા હતા.

PM મોદી ચકિત થઈ ગયા 

આ દરમિયાન એક એવી ઘટના બની, જેના કારણે વડાપ્રધાન નરેન્દ્ર મોદીએ કહ્યું હતું કે તેઓને શરમ લાગી ગઈ હતી. પીએમ મોદીએ પોતે પોતાના ભાષણમાં આ ઘટનાનો ઉલ્લેખ કર્યો અને કહ્યું હતું કે આ ઘટના જોઈને તેઓ આશ્ચર્યચકિત થઈ ગયા.

રાષ્ટ્રપતિએ તમામ પ્રોટોકોલ તોડયા 
 શુક્રવારે એટલે કે 3 જૂનના રોજ વડાપ્રધાન નરેન્દ્ર મોદી રાષ્ટ્રપતિ કોવિંદના ગામ પરૌખ પહોંચ્યા હતા. આ દરમિયાન રાષ્ટ્રપતિએ તમામ પ્રોટોકોલ તોડીને પોતાના વતન ગામ પહોંચેલા પીએમને રિસીવ કર્યા હતા. તેઓ ખુદ પીએમ મોદીને લેવા હેલિપેડ પર પહોંચ્યા હતા.

આ ઘટનાનો ઉલ્લેખ કરતાં વડા પ્રધાન નરેન્દ્ર મોદીએ તેમના ભાષણમાં કહ્યું હતું કે મહામહિમની આ ઉષ્માથી મને સુખદ આશ્ચર્ય થયું હતું. તેમણે કહ્યું હતું કે આ દરમિયાન હું ખૂબ જ શરમ અનુભવી રહ્યો હતો.

એક તરફ બંધારણ હતું અને બીજી બાજુ સંસ્કારો.
પરૌખ ખાતે સભાને સંબોધતા પીએમએ કહ્યું કે આ ગામની માટીમાંથી રાષ્ટ્રપતિને જે મૂલ્યો મળ્યા છે તે આખી દુનિયાએ જોયા છે. મેં જોયું કે એક તરફ બંધારણ હતું અને બીજી બાજુ સંસ્કારો. રાષ્ટ્રપતિજીએ ઓફિસની મર્યાદામાંથી બહાર આવીને મને આશ્ચર્યચકિત કરી દીધો હતો. મને રિસીવ કરવા તેઓ પોતે હેલિપેડ પર આવ્યા હતા. આનાથી મને ખૂબ જ શરમ અનુભવાઈ કારણ કે તેમના માર્ગદર્શન હેઠળ અમે કામ કરી રહ્યા છીએ અને તેમના પદની એક ગરિમા છે. તેઓ એક વરિષ્ઠ પદે બિરાજે છે. 

PM MODI એ કહ્યું હતું કે મેં રાષ્ટ્રપતિને કહ્યું કે તેમણે આજે મારી સાથે મોટો અન્યાય કર્યો છે. તેના પર રાષ્ટ્રપતિએ કહ્યું કે હું બંધારણની મર્યાદાઓનું પાલન કરું છું, પરંતુ સંસ્કારોની પણ પોતાની તાકાત હોય છે. હું અહીં તમારું સ્વાગત રાષ્ટ્રપતિ તરીકે નહીં પરંતુ એક બાળક તરીકે જે અહીં મોટો થયો છે, પરૌખ ગામના નાગરિક તરીકે કરું છું. PM મોદીએ કહ્યું હતું કે આ આપણી સામે એક ઉદાહરણ છે કે ભારતના એક ગામમાં જન્મેલો સૌથી ગરીબ વ્યક્તિ પણ વડાપ્રધાન, રાજ્યપાલ કે મુખ્યમંત્રી બની શકે છે.