ડોક્યુમેન્ટમાં ફેરફાર / નવો પાસપોર્ટ લેવા માટે હવે સૌથી પહેલા કરવું પડશે આ કામ, સરકારે નિયમમાં કર્યો ફેરફાર

• નવા પાસપોર્ટ માટે સરકારે કર્યો મોટો ફેરફાર
• પહેલા ડિજિલોકર પર દસ્તાવેજો કરવા પડશે અપલોડ
• ત્યાર બાદ વેબસાઈટ પર કરવાની રહેશે અરજી 

ભારત સરકારે આંતરરાષ્ટ્રીય મુસાફરી માટે પાસપોર્ટ અરજી પ્રક્રિયામાં મોટો ફેરફાર કર્યો છે. નવા પાસપોર્ટ માટે અરજદારોએ હવે સરકારી પ્લેટફોર્મ ડિજીલોકરનો ઉપયોગ કરવો પડશે. તમામ દસ્તાવેજો ડિજીલોકરનો ઉપયોગ કરીને અપલોડ કરવાના રહેશે. એકવાર દસ્તાવેજો અપલોડ થઈ ગયા પછી, અરજદારો તેમની પાસપોર્ટ અરજી સત્તાવાર વેબસાઇટ, passportindia.gov.in દ્વારા ઑનલાઇન કરી શકે છે. 

વિદેશ મંત્રાલયે શું કહ્યું 
વિદેશ મંત્રાલય (MEA) એ કહ્યું છે કે જો અરજદારોએ તેમના દસ્તાવેજો DigiLocker દ્વારા અપલોડ કર્યા છે, તો તેઓએ અરજી પ્રક્રિયા દરમિયાન ઓરિજનલ દસ્તાવેજોની નકલો સાથે રાખવાની જરૂર નહીં રહે. આ પગલાથી પાસપોર્ટ લેવામાં લાગતો સમય ઘટશે. ફિઝિકલ ડોક્યુમેન્ટ વેરિફિકેશનની જરુરિયાત ઘટાડવા માટે સરકારે આ પગલું ભર્યું છે. 

DigiLocker શું છે?
DigiLockerએ ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલય દ્વારા પૂરી પાડવામાં આવતી ડિજિટલ વોલેટ સેવા છે. યુઝર્સ ડિજીલોકરમાં એજ્યુકેશન સર્ટિફિકેટ, બર્થ સર્ટિફિકેટ, પાન કાર્ડ, આધાર કાર્ડ, પાસપોર્ટ અને વોટર આઈડી કાર્ડ જેવા મહત્વના સત્તાવાર દસ્તાવેજોને સ્ટોર કરી અને એક્સેસ કરી શકે છે. મંત્રાલયે હવે ઓનલાઈન અરજી સબમિશન માટે ડિજીલોકર દ્વારા આધાર દસ્તાવેજોનો ઉપયોગ કરવાની પણ પરવાનગી આપી છે.

DigiLockerનો ઉપયોગ કેવી રીતે કરવો? 
DigiLocker એકાઉન્ટ ખોલવા માટે યૂઝર્સે મોબાઈલ નંબર સાથે નોંધણી કરવાની જરૂર છે અને આ નંબર પહેલેથી જ આધાર સાથે લિંક હોવો જોઈએ. ડિજીલૉકર એકાઉન્ટમાં લૉગ ઈન કરતી વખતે યૂઝર્સે લિંક કરેલા મોબાઈલ નંબર પર વન-ટાઇમ ઓટીપી (OTP) મોકલવામાં આવશે. જો તમે DigiLockerમાં કોઈ ફેરફાર કરવા માંગો છો, તો તે ડેટાને આધારમાં અપડેટ કરવો પડશે.