મહામારી / હવે આ રાજ્યોએ ધોરણ 10 અને 12 ની બોર્ડની પરીક્ષાઓ રદ કરી, અહીં ધોરણ 1 થી 12 ની સ્કૂલો 15 મે સુધી બંધ

• ઓડિશામાં ધોરણ 10 અને 12 ની બોર્ડની પરીક્ષાઓ મોકૂફ
•  મુખ્યમંત્રી નવીન પટનાયકે લીધો નિર્ણય 
• ધોરણ 9 અને 11 ના વિદ્યાર્થીઓ પ્રમોટ થશે 

ઓડિશામાં 3 મે થી 10 અને 12 મા ધોરણની બોર્ડની પરીક્ષાઓ શરુ થવાની હતી જે 15 મે ના પૂરી થવાની હતી પરંતુ રાજ્યમાં કોરોનાના વધી રહેલા કેસોને ધ્યાનમાં રાખીને રાજ્ય સરકારે આ નિર્ણય લીધો છે. ઓડિશામાં ધોરણ 9 અને 11 માના વિદ્યાર્થીઓને પણ ઉપરના ધોરણમાં પ્રમોટ કરવાનો નિર્ણય લેવાયો છે.

યુપીમાં 10-12 ની પરીક્ષા રદ, 15 મે સુધી 1 થી 12 ની સ્કૂલો બંધ
યુપી સરકારે પણ ધોરણ 10 અને 12 ની પરીક્ષાઓ મોકૂફ કરી દીધી છે. યોગી આદિત્યનાથની સરકારે રાજ્યમાં ધોરણ 1 થઈ 12 ની સ્કૂલો 15 મે સુધી બંધ રાખવાનો પણ નિર્ણય લીધો છે. 

પંજાબ-હરિયાણાએ ધોરણ 10 ની પરીક્ષાઓ રદ કરી
પંજાબ અને હરિયાણા સરકારે પણ ધોરણ 10 ની પરીક્ષાઓ રદ કરી છે જોકે ધોરણ 12 ની પરીક્ષાઓ પર કોઈ નિર્ણય લેવાયો નથી પરંતુ પરિસ્થિતિને સમીક્ષા કર્યા બાદ કોઈ નિર્ણય કરવામાં આવશે તેવું જણાવાયું છે. 

મહારાષ્ટ્રમાં બોર્ડની પરીક્ષાઓ મોકૂફ થઈ ગઈ 

અન્ય રાજ્યોમાં પરીક્ષાઓને લઈને નિર્ણય લેવામાં આવ્યા છે જેમાં ઉત્તરપ્રદેશમાં 24 એપ્રિલથી શરૂ થનારી પરીક્ષાઓને સ્થગિત કરી દેવામાં આવી છે અને મહારાષ્ટ્રમાં પણ બોર્ડની પરીક્ષાઓને હાલ પૂરતી સ્થગિત કરવામાં આવી છે. મહારાષ્ટ્ર સરકાર જૂન મહિનામાં બોર્ડની પરીક્ષા લેવા માટે વિચાર કરી રહી છે.

મધ્ય પ્રદેશમાં મોકૂફ થઈ ગઈ પરીક્ષાઓ 

મધ્ય પ્રદેશમાં પણ કોરોના વાયરસના કહેરના કારણે બોર્ડની પરીક્ષાઓને એક મહિના માટે મોકૂફ કરવામાં આવી છે. રાજ્યમાં કોરોના વાયરસના કેસ વધતાં સતત ચિંતામાં વધારો જોવા મળ્યો છે. 

ગુજરાતમાં 30 એપ્રિલ સુધી શાળાઓ લોક 

ગુજરાતમાં પણ કોરોના વાયરસના કેસ વધતાં 30 એપ્રિલ સુધી શાળાઓ સહિતના દરેક શૈક્ષણિક સંસ્થાનોને બંધ કરવાના આદેશ આપવામાં આવ્યા છે. ગુજરાત બોર્ડની પરીક્ષા પણ મે મહિનામાં કરવામાં આવવાની છે જેમાં વાલીમંડળો દ્વારા માંગ કરવામાં આવી છે અત્યારે પરીક્ષાઓ મોકૂફ કરવામાં આવે. આ સિવાય ધોરણ 10 અને 12 સિવાયના વિદ્યાર્થીઓને માસ પ્રમોશન આપી દેવા માટે ઑલ વાલી મંડળ દ્વારા માંગ કરવામાં આવી છે.