BIG NEWS / દવાઓ અને ઑક્સીજન તૈયાર રાખો: H3N2ના વધતાં કહેર વચ્ચે નીતિ આયોગે કર્યું સૂચન, ટાસ્ક ફોર્સ પણ બનાવાશે

• H3N2 વાયરસના પ્રકોપને પગલે તંત્ર હરકતમાં
• નીતિ આયોગે સૂચન જારી કર્યા
• હોસ્પિટલોમાં સ્ટાફ, દવા મેડિકલ, ઓક્સિજન સહિતના સંસાધનોની ઉપયોગીતા સજ્જ રાખવા સૂચન

દેશભરમાં વકરી રહેલા H3N2 વાયરસના પ્રકોપને પગલે આરોગ્યતંત્ર દોડતું થયું છે. તો બીજી તરફ લોકોમાં પણ ભયનો માહોલ જોવા મળી રહ્યો છે આવી સ્થિતિ વચ્ચે નીતિ આયોગે ઇન્ફલ્યુએન્ઝાનો સામનો કરવા માટે ટાસ્ક ફોર્સની રચના કરવા અંગે એક બેઠક યોજી છે. જે બેઠકમાં વાયરસનો સામનો કરવા માટે રાજ્યોને સજ્જ રહેવા સૂચન કરવામાં આવ્યું છે. વધુમાં હોસ્પિટલોમાં સ્ટાફ, દવા મેડિકલ, ઓક્સિજન સહિતના સંસાધનોની ઉપયોગીતા સજ્જ રાખવા પણ આદેશ કરાયા છે. ઉપરાંત આ વાયરસનો સામનો કરવા પ્રથમ તમામ લોકોને જાગૃત કરવા સહિતની કાર્યવાહી કરવા જણાવ્યું છે.

લોકોમાં જાગૃતિ લાવવા માટે પગલાં લેવામાં

બેઠકમાં જણાવ્યા અનુસાર લોકોમાં જાગૃતિ લાવવા માટે પગલાં લેવામાં આવશે. આ ઉપરાંત ઇન્ફલ્યુએન્ઝાનો સામનો કરવા માટે કોરોના જેવા જ નિયમોનું પાલન કરવા અંગે નિર્દેશ કરાયો છે. જેમાં નાક અને મો ઢાંકવા ઉપરાંત ભીડભાડ વાળી જગ્યાએ જવાનું ટાળવા તથા આ વાયરસના સંભવિત લક્ષણો વાળા લોકોના સંપર્ક ન આવવા જણાવાયુ છે. તેમજ લક્ષણો દેખાતાની સાથે જ ટેસ્ટ કરાવી લેવા સહિતની સૂચના આપવામાં આવી છે. આ મામલે રાજ્યોને સુચના આપી દેવામાં આવશે. ઉપરાંત કમિશન દ્વારા પ્રેસ રિલીઝ જાહેર કરી લોકોને સતર્ક રહેવા સૂચના આપવામાં આવી છે.

જાન્યુઆરી માસથી 451 કેસ સામે નોંધાયા

આ ઉપરાંત કેન્દ્રીય આરોગ્ય મંત્રી મનસુખ માંડવીયા એ પણ સતત મોનિટરિંગ વધારવા સૂચના આપી છે. મહત્વનું છે કે ઇન્ફલ્યુએન્ઝાને પગલે કર્ણાટકમાં એક અને હરિયાણામાં એક એમ કુલ બે મોત થયાનું પણ સામે આવ્યું છે. આરોગ્ય મંત્રી મનસુખ માંડવીએ શુક્રવારે રાજ્યોના સબંધિત વિભાગને પરિસ્થિતિ પર નજર રાખવા જણાવ્યું છે. સ્વાસ્થ્ય મંત્રાલય દ્વારા શેર કરવામાં આવેલા ડેટામાં જણાવ્યા મુજબ બે જાન્યુઆરીથી માંડી પાંચ માર્ચ સુધીમાં દેશમાં H3N2ના 451 કેસ સામે આવ્યા છે.