નિવેદન / 'હું નાક દબાઉ તો કરોડો રૂપિયા ઓકાવું..' સાંસદ મનસુખ વસાવાએ વિરોધીઓની ગરદન મરોડી, ગુંજ ગાંધીનગર સુધી

• નર્મદામાં સાંસદ મનસુખ વસાવા વિરોધીઓ પર વરસ્યા
• "મારા વિરોધીઓ મારા વિશે પત્રો લખે છે"
• "હાથી પાછળ કૂતરા તો ભસ્યા કરે"

નર્મદા જિલ્લાના દેડિયાપાડા ખાતે લાભાર્થી સંમેલન યોજાયો હતો. જે સંમેલનમાં જિલ્લા ભાજપના અગ્રણી નેતાઓ ઉપસ્થિત રહ્યાં હતા. ભાજપ દ્વારા આયોજિત આ કાર્યક્રમમાં સાંસદ મનસુખ વસાવા વિરોધીઓ પર બરાબરના વરસ્યા છે. તેમણે કહ્યું હતું કે, હું નાક દબાવું તો કરોડો રૂપિયા ઓકાવી શકું તેમ છું, પણ હરામનો પૈસો મારા ઘરમાં નહિ આવે.

'નાક દબાવુ તો કરોડો રૂપિયા કમાઈ શકું'
મનસુખ વસાવાએ વિરોધીઓને આડે હાથ લીધા હતા તેમજ ફરતા પત્રને લઈ અનેક આક્ષેપો પણ કર્યા હતાં. તેમણે કહ્યું કે, મારા વિરોધીઓ મારા વિશે પત્રો લખે છે તેમજ હાથી પાછળ કૂતરા તો ભસ્યા કરે. તેમણે કહ્યું કે, હું એક ઉદ્યોગપતિનું નાક દબાવુ તો કરોડો રૂપિયા કમાઈ શકું છું અને આ મારું કામ નથી હું સેટિંગ કરવા વાળો માણસ નથી. અત્રે તમને જણાવી દઈએ કે, મનસુખ વસાવાનો ભ્રષ્ટાચારના આક્ષેપ સાથેનો પત્ર વાયરલ થયો હતો.

'જો હિંમત હોય તો મારી સાથે આવે ને વાર્તાલાપ કરે'
નર્મદા ભાજપના જ નેતા સામે મનસુખ વસાવાએ નિશાન તાક્યુ હતું. તેમણે જણાવ્યું હતું કે, હાથી પાછળ કૂતરાં ભસ્યાં કરે કહી દેડિયાપાડા બેઠક હારી ગયા તો મારા માથે અને નીલ રાવના માથે હારનો ટોપલો નાખે છે. તેમણે કહ્યું કે, નર્મદા, છોટાઉદેપુરમાં શિક્ષણનું પ્રમાણ ઓછું છે તેમજ શિક્ષણમાં શિક્ષકોની ઘટ છે તો પુરી કરીશું. તેમણે આકાર પ્રહારો કરતા કહ્યું હતું કે, જે ભ્રષ્ટાચાર સાથે જોડાયેલા છે એવા બાયલા લોકોને હું ખુલ્લા પાડું છું અને એવા લોકો આવો નનામો પત્ર લખે છે. તેમણે કહ્યું કે, જો હિંમત હોય તો મારી સાથે આવે ને વાર્તાલાપ કરે. 

પત્ર ચર્ચાનો વિષય બન્યો
મનસુખ વસાવાએ જણાવ્યું હતું કે, મને કાપો તો લોહીમાંથી હિન્દુત્વનું ટપકું પડે અને એક-એક ટપકું હિન્દુ-હિન્દુ બોલે, ડંકાની ચોટ પર કહું છું કે ભૂતકાળમાં હિન્દુની વાત કરી છે અને કરીશું તેમ પણ કહ્યું હતું. તેમણે પ્રહાર કરતા કહ્યું કે, અમે તો સૌનો સાથ સૌનો વિકાસમાં માનીએ છીએ અને કોઇ અમને છંછેડે તો તેને છોડવો પણ નહીં, મેં કોઇની સાથે સેટિંગ નથી કર્યું અને કરીશ પણ નહીં. તેમણે ઉમેર્યું હતું કે,  રાજનીતિમાં મૌન ન રહેવાય. જો દબાઇ ગયા તો સમજો તમારું રાજકારણ પતી ગયું. તમને જણાવી દઈએ કે, નર્મદા જિલ્લામાં હાલ નનામો પત્ર ચર્ચાનો વિષય બન્યો છે. જેમાં મન દુઃખ દાદાનો ઉલ્લેખ કરવાયો છે.