રોષ / લમ્પી રોગનો હાહાકારઃ ભુજમાં ડમ્પિંગ સાઇટ પર મોટી સંખ્યામાં ગૌ વંશના મૃતદેહો ખડકલો, મૃતદેહના નિકાલનો અભાવ

• ભુજ, રાજકોટ, જામનગરમાં ગૌવંશના મૃતદેહોના ખડકલા
• ભલભલાને થરથરાવી નાખે તેવા દ્રશ્યો સર્જાયા
• ગાયોના મૃતદેહોનો યોગ્ય નિકાલ કરવા માંગ

કચ્છ જિલ્લામાં ગાયોમાં લમ્પી વાઇરસે હાહાકાર મચાવ્યો છે.આવી કપરી સ્થિતીમાં ભુજ શહેરના નાગોર રોડ પર આવેલા ડમ્પિંગ સાઇટ ખાતે ગૌવંશના મૃતદેહોના ખડકલા દેખાતા લોકોમાં રોષ ફેલાયો છે. હિન્દુ ધર્મમાં જેને માનું સ્થાન આપવામાં આવ્યું છે તેવી ગાયોના મૃતદેહ ખુલ્લામાં રાઝડતા પશુપ્રેમીઓની લાગણી દુભાઈ છે. માતાના મોતનો મલાજો ન જળવાતા ઢગલાબંધ ગૌવંશના મૃતદેહને લઈને ભલભલાને થરથરાવી નાખે તેવા દ્રશ્યો સર્જાયા છે. આથી ગાયોના મૃતદેહોનો યોગ્ય નિકાલ કરવામાં આવે તેવી લોકોમાંથી માંગ ઊઠી છે. કચ્છના તમામ તાલુકામાં ગાયોમાં લમ્પી વાઇરસનો ઝેરી પંજો પડ્યો છે. જેને અટકાવવા અત્યાર સુધી 1.46 લાખ પશુઓનું રસીકરણ કરવામાં આવ્યું છે. જ્યારે 43 હજાર ગૌ વંશની સારવાર કરવામાં આવી છે. છતાં પણ હજારોની સંખ્યામાં ગૌવંશ મોતને ભટયા છે.

રાજકોટ-કાલાવડમાં પણ આવી જ સ્થિતિ 
રાજકોટમાં પણ લમ્પીનો કહેર કાબૂ બહાર હોય તેવું લાગી રહ્યું છે. રાજકોટના માલિયાસણ ગામ પાસે કચ્છ જેવી જ સ્થિતિ છે. જ્યાં  લમ્પીની મોતને ભેટનાર ગાય, ગૌવંશ અને વાછરડાના મૃતદેહોના ઢગલાના દ્રશ્યો સર્જાતાં લોકોમાં રોષ ફાટી નીકળ્યો છે. બીજી તરફ માથું ફાડી નાખે તેવી દુર્ગંધ આવતી હોવાથી લોકોને પસાર થયું મુશ્કેલ બની રહ્યું છે. વધુમાં ભુજ-રાજકોટની માફક જામનગરમાં પણ પશુ મોતના ઢગલા જોવા મળી રહ્યા  છે. લમ્પીની મોતના મુખમાં ધકેલાયેલ ગૌવંશના મૃતદેહના કાલાવડમાં ઢગલા જોવા મળી રહ્યા છે. જેથી લોકોમાં આક્રોશ ફેલાયો છે.