- ભારતીય ટીમે શાનદાર રીતે શ્રીલંકાને 302 રનથી હરાવ્યું
- ટીમ ઈન્ડિયાએ અત્યાર સુધી 7 મેચ રમી તમામમાં જીત મેળવી
- સેમિફાઇનલમાં ત્રણ જગ્યાઓ માટે 5 ટીમો વચ્ચે સ્પર્ધા
World Cup 2023 : ભારતીય ટીમે શાનદાર રીતે શ્રીલંકાને 302 રનથી હરાવ્યું છે. મહત્વનું છે કે, આ મેચમાં ભારતીય ટીમ માટે બોલરોએ શાનદાર પ્રદર્શન કર્યું હતું. શ્રીલંકાના બેટ્સમેનો ભારતીય બોલરો સામે ટકી શક્યા ન હતા. રોહિત શર્માના નેતૃત્વમાં ભારતીય ટીમ વનડે વર્લ્ડ કપ 2023માં શાનદાર પ્રદર્શન કરી રહી છે. ટીમ ઈન્ડિયાએ અત્યાર સુધી 7 મેચ રમી છે અને તે તમામમાં જીત મેળવી છે. ટીમ ઈન્ડિયાએ શ્રીલંકા સામે મોટી જીત નોંધાવ્યા બાદ ODI વર્લ્ડ કપ 2023ની સેમીફાઈનલ માટે ક્વોલિફાઈ કરી લીધું છે.
ભારતનું જોરદાર પ્રદર્શન
ભારત વર્તમાન વર્લ્ડ કપમાં સેમિફાઇનલ માટે ક્વોલિફાય થનારી પ્રથમ ટીમ બની ગઈ છે. હાલમાં સેમિફાઇનલ માટે ત્રણ જગ્યાઓ ખાલી છે અને આ ત્રણ જગ્યાઓ ભરવા માટે 5 ટીમો વચ્ચે સ્પર્ધા ચાલી રહી છે. સેમીફાઈનલ માટે હજુ પણ દક્ષિણ આફ્રિકા, ઓસ્ટ્રેલિયા, ન્યુઝીલેન્ડ, પાકિસ્તાન અને અફઘાનિસ્તાન વચ્ચે મુકાબલો છે. જેમાંથી સાઉથ આફ્રિકા, ન્યુઝીલેન્ડ અને ઓસ્ટ્રેલિયાને સેમીફાઈનલમાં પહોંચવાની સૌથી વધુ આશા છે. કારણ કે આ ત્રણેય ટીમોનો નેટ રન રેટ પ્લસમાં છે.
આ પાંચ ટીમો સેમિફાઇનલની રેસમાં
1. દક્ષિણ આફ્રિકા
ભારતીય ટીમ જીતતાની સાથે જ દક્ષિણ આફ્રિકાને હારનો સામનો કરવો પડ્યો અને બીજા સ્થાને પહોંચી ગઈ. દક્ષિણ આફ્રિકાએ અત્યાર સુધી 7 મેચ રમી છે અને 6 જીત સાથે તેના 12 પોઈન્ટ છે. અત્યારે દક્ષિણ આફ્રિકાને ભારત અને અફઘાનિસ્તાન સામે મેચ રમવાની છે. જો દક્ષિણ આફ્રિકાની ટીમ ભારત સામેની મેચ હારે છે અને અફઘાનિસ્તાન સામે જીતે છે તો તે 14 પોઈન્ટ સાથે સેમીફાઈનલ માટે ક્વોલિફાઈ થઈ જશે.
2. ઓસ્ટ્રેલિયા
ઓસ્ટ્રેલિયન ટીમ ODI વર્લ્ડ કપ 2023માં અત્યાર સુધી 6 મેચ રમી ચુકી છે અને ટીમે ચારમાં જીત મેળવી છે. ટીમ 8 પોઈન્ટ અને પ્લસ 0.970 નેટ રન રેટ સાથે ત્રીજા સ્થાને છે. ઓસ્ટ્રેલિયાની ટીમે હજુ બાંગ્લાદેશ, ઈંગ્લેન્ડ અને અફઘાનિસ્તાન સામે મેચ રમવાની છે. ઓસ્ટ્રેલિયન ટીમ અફઘાનિસ્તાન અને બાંગ્લાદેશ સામેની મેચો આસાનીથી જીતી શકે છે અને તેમના માટે સેમીફાઈનલના દરવાજા ખુલી શકે છે.
3. ન્યુઝીલેન્ડ
ન્યૂઝીલેન્ડની ટીમે ODI વર્લ્ડ કપ 2023માં 7 મેચ રમી છે અને ચારમાં જીત મેળવી છે. તે જ સમયે તેને ત્રણ મેચમાં હારનો સામનો કરવો પડ્યો છે. ટીમ 8 પોઈન્ટ સાથે ચોથા સ્થાને છે. ન્યૂઝીલેન્ડે હજુ પાકિસ્તાન અને શ્રીલંકા સામે મેચ રમવાની છે.
4. પાકિસ્તાન
પાકિસ્તાનની ટીમે ODI વર્લ્ડ કપ 2023માં અત્યાર સુધી 7 મેચ રમી છે અને 3માં જીત મેળવી છે. તેને ચાર મેચમાં હારનો સામનો કરવો પડ્યો છે. પાકિસ્તાનના 6 પોઈન્ટ છે અને તે ટીમોમાં પાંચમા સ્થાને છે. પાકિસ્તાનની હજુ ન્યૂઝીલેન્ડ અને ઈંગ્લેન્ડ સામે મેચ બાકી છે. સેમીફાઈનલમાં પહોંચવા માટે પાકિસ્તાની ટીમને આ બંને મેચ મોટા અંતરથી જીતવી પડશે. આ સિવાય તેણે અન્ય ટીમોના પરિણામો પર પણ નિર્ભર રહેવું પડશે.
5. અફઘાનિસ્તાન
અફઘાનિસ્તાનની ટીમ વર્તમાન વર્લ્ડ કપમાં 6 મેચ રમી છે જેમાંથી ત્રણમાં તેણે જીત અને ત્રણમાં હારનો સામનો કરવો પડ્યો છે. ટીમ 6 પોઈન્ટ સાથે છઠ્ઠા સ્થાને છે અને તેનો નેટ રન રેટ માઈનસ 0.718 છે. અફઘાનિસ્તાને હજુ નેધરલેન્ડ, ઓસ્ટ્રેલિયા અને દક્ષિણ આફ્રિકા સામે મેચ રમવાની છે.
