નિર્ણય / GTUની પરીક્ષા આપનારા વિદ્યાર્થીઓને મોટી રાહત: હવે પેપર પૂર્ણ થયા બાદ અઢી કલાક સુધી નહીં બેસવું પડશે

• GTUની પરીક્ષાને લઈને મહત્વનો નિર્ણય
• 1 કલાક બાદ વિદ્યાર્થી પેપર આપીને જઈ શકશે
• વિદ્યાર્થીને અઢી કલાક સુધી બેસવું પડશે નહીં

ગુજરાત ટેકનોલોજીકલ યુનિવર્સિટી દ્વારા પરીક્ષાને લઈને મહત્વનો નિર્ણય લેવામાં આવ્યો છે. જે મુજબ હવે પરીક્ષા શરૂ થયાના એક કલાક બાદ વિદ્યાર્થી ઈચ્છે તો ક્લાસરૂમ અને સેન્ટરની બહાર નીકળી શકશે. કોલેજોની અનેકવાર રજૂઆત બાદ નિયમોમાં ફેરફાર કરાયો છે. મહત્વનું છે કે અગાઉ પેપર પૂર્ણ થાય ત્યાં સુધી એટલે કે અઢી કલાક સુધી બેસવું પડતું હતું.

કોલેજોએ કરી હતી રજૂઆત
ગુજરાતની ટેકનિકલ કોલેજોના આધ્યાપકોના મંડળે GTU (ગુજરાત ટેકનોલોજીકલ યુનિવર્સિટી)ને રજૂઆત કરી હતી કે એમસીક્યુ અને થીયરી પરીક્ષા દરમિયાન વિદ્યાર્થી વારંવાર વહેલા જવા દેવા માટે તકરાર કરતા હોય છે. જેથી પરીક્ષા શરૂ થયાના એક કલાક બાદ વિદ્યાર્થીઓને જવું હોય તો પ્રશ્નપત્ર વગર જવા દેવામાં આવે. 

GTUએ બહાર પાડ્યો પરિપત્ર
કોલેજોના આધ્યાપકોના મંડળની રજૂઆતને GTU દ્વારા સ્વીકારી લેવામાં આવી છે. ગુજરાત ટેકનોલોજીકલ યુનિવર્સિટી દ્વારા પરીક્ષાને લઈને નિયમોમાં ફેરફાર કરવામાં આવ્યા છે. જીટીયુ દ્વારા આ મામલે એક પરિપત્ર બહાર પાડવામાં આવ્યો છે.

હવેથી વિદ્યાર્થીને પરીક્ષામાં અઢી કલાક બેસી રહેવું નહી પડે
GTUના પરિપત્ર મુજબ વિદ્યાર્થીઓએ પરીક્ષા શરૂ થયાના 30 મિનિટ પહેલા આવવાનું રહશે અને પરીક્ષા શરૂ થયાના એક કલાક બાદ વિદ્યાર્થીઓ ઈચ્છે તો ક્લાસરૂમ અને સેન્ટરની બહાર નીકળી શકશે. પરીક્ષાના એક કલાક બાદ જતા વિદ્યાર્થીએ પ્રશ્નપત્ર સુપરવાઈઝરને આપીને જવાનું રહેશે.

આ વર્ષથી જ લાગુ થશે આ નિયમ
આ નિયમો યુનિવર્સિટી દ્વારા દર વર્ષે લેવાતી થીયરીકલ પરીક્ષા અને એમસીક્યુ પરીક્ષાઓમાં લાગુ પડશે. સાથે જ આ નિયમ વર્તમાન વર્ષની હાલની સેમેસ્ટર પરીક્ષાઓથી જ લાગુ પડી જશે.