કામની ખબર / ઓફિસમાં અંગત કામ માટે મોબાઈલ વાપર્યો તો નોકરી ગઈ સમજો,હાઈકોર્ટે આપ્યો મોટો ચુકાદો

• મદ્રાસ હાઈકોર્ટનો ચુકાદો 
• સરકારી કર્મીઓને કહ્યું,ઓફિસોમાં અંગત કામ માટે મોબાઈલ ન વાપરો
• કોર્ટે સરકારે કાયદો ઘડવાનો આપ્યો આદેશ 

તામિલનાડુની મદુરાઈ કોર્ટે એક મહત્વનો ચુકાદો આપતા એવું જણાવ્યું કે  સરકારી કર્મચારીઓએ ઓફિસના સમય દરમિયાન અંગત કામ માટે મોબાઇલ ફોનનો ઉપયોગ ન કરવો જોઇએ. 

કર્મીઓ ઉપરી અધિકારીની પરમિશન લઈને બહાર જઈને વાત કરી શકે 
કોર્ટે તમિલનાડુ સરકારને આ અંગે નિયમો ઘડવાનું અને આ નિયમોનું પાલન ન કરનારની સામે પગલાં ભરવાનો આદેશ આપ્યો છે. મદ્રાસ હાઈકોર્ટના જસ્ટિસ એસએમ સુબ્રમણ્યમે કહ્યું કે જો કોઈ સ્થિતિમાં ઈમરજન્સી કોલ કરવાની નોબત આવે તો કર્મચારીઓ તેમના ઉપરી અધિકારીઓની પરમિશન લઈને બહાર જઈ શકે અને મોબાઈલ વાપરી શકે. તમામ સંજોગોમાં મોબાઈલ ફોન સ્વીચ ઓફ રાખવો જોઈએ અથવા તો વાઈબ્રેશન, સાયલન્ટ મોડ પર રાખવો જોઈએ જેથી કરીને કામ માટે ઓફિસોમા આવતા લોકોને કોઈ પણ પ્રકારની ખલેલ ન પડે. 

મહિલા કર્મચારીની અરજી પર હાઈકોર્ટે આપ્યો મહત્વનો ચુકાદો
મામલો મદુરાઈનો છે. અહીંની મદ્રાસ હાઈકોર્ટની બેંચે સરકારી કર્મચારી દ્વારા દાખલ કરવામાં આવેલી અરજી પર સુનાવણી કરતા આ આદેશ આપ્યો હતો. આ અરજી આરોગ્ય વિભાગની મહિલા કર્મચારીએ કરી હતી. તે ઓફિસના કામ દરમિયાન મોબાઇલ ફોનનો ઉપયોગ કરતો મળી આવ્યો હતો. આ કારણે વિભાગે તેમને સસ્પેન્ડ કરી દીધા હતા. આની સામે તેમણે કોર્ટમાં અરજી કરી હતી, જેમાં વિભાગને તેમના સસ્પેન્શન ઓર્ડરને રદ કરવાનો આદેશ આપવામાં આવે તેવી માગણી કરી હતી.

ઓફિસોમાં મોબાઈલનો ઉપયોગ સારો ટ્રેન્ડ નથી 
અરજીની સુનાવણી દરમિયાન જસ્ટિસ એસએમ સુબ્રમણ્યમે કેસની વિગતોમાં જવાની ના પાડી દીધી હતી. તેમણે કહ્યું કે આજકાલ આ ખૂબ સામાન્ય વાત બની ગઈ છે કે સરકારી કર્મચારીઓ ઓફિસના કામ દરમિયાન વ્યક્તિગત કામ માટે મોબાઈલ ફોનનો ઉપયોગ કરે છે. આ સારો ટ્રેન્ડ નથી. જસ્ટિસે કહ્યું કે  ઓફિસોમાં મોબાઈલ ફોનના ઉપયોગને કારણે લોકોની માનસિક શાંતિ હણાતી હોય છે અને આને કારણ સરવાળે જાહેર ઓફિસોના કામકાજ પર અવળી અસર પડતી હોય છે અને તેથી કોર્ટનો એવો અભિપ્રાય છે કે સરકારે આ કેસની ગંભીર નોંધ લેવી જોઈએ. સાથે જ કોર્ટે અરજી દાખલ કરનાર મહિલા કર્મચારીને રાહત આપવાનો ઈનકાર કરી દીધો હતો.