Rajkot News: જાણીતા લેખક જય વસાવડાએ હિરાસર એરપોર્ટની સુવિધાની ટીકા કરતો વીડિયો બનાવ્યા બાદ ભાજપના પૂર્વ ધારાસભ્ય ડૉ.ભરત બોઘરાએ નામ લીધા વિના એરપોર્ટની વિશેષતાઓ અંગે વાત કરી.
Share
રાજકોટ ઈન્ટરનેશનલ એરપોર્ટ વીડિયો વાયરલ મામલો
એરપોર્ટથી ડૉ.ભરત બોઘરાએ વીડિયો વાયરલ કર્યો
વીડિયોમાં એરપોર્ટ વિશેની વિશેષતાઓ જણાવી
અગાઉ લેખક જય વસાવડાનો વીડિયો થયો હતો વાયરલ
Rajkot News: ગુજરાતના જાણીતા લેખક, સાહિત્યકાર અને વક્તા જય વસાવડાના રાજકોટ હિરાસર ઇન્ટરનેશનલ એરપોર્ટના વીડિયોએ સોશિયલ મીડિયા પર ભારે ચર્ચા જગાવી છે. ત્યારે હવે તેમના વીડિયો સામે જસદણના ભાજપના પૂર્વ ધારાસભ્ય ડૉ.ભરત બોઘરાએ એરપોર્ટ પર જઇને વીડિયો બનાવ્યો છે. ભરત બોઘરાએ વીડિયો બનાવી જય વસાવડાના વીડિયોનો જવાબ આપી જણાવ્યું કે, આ એરપોર્ટનું ટર્મિનલ છે, તે ટેમ્પરરી છે. આ એરપોર્ટ માટેનું મેઈન ટર્મિનલ બિલ્ડિંગ નિર્માણ પામી રહ્યું છે. લગભગ એપ્રિલ મહિના સુધીમાં એ ટર્મિનલ શરૂ થઈ જશે. આ એરપોર્ટ સૌરાષ્ટ્રવાસીઓ માટે ખૂબ આશીર્વાદરૂપ સાબિત થવાનું છે. જેથી કોઈ ગેરસમજ ન થાય તેવા ઈરાદા સાથે આ વીડિયો બનાવવામાં આવ્યો છે.
આ એક ટેમ્પરરી ટર્મિનલ છેઃ ડૉ.ભરત બોઘરા
પૂર્વ ધારાસભ્ય ડૉ.ભરત બોઘરાએ જણાવ્યું કે, આ એરપોર્ટ પરથી ઈન્ટરનેશનલ ફ્લાઇટનું પણ સંચાલન થવાનું છે. ડોમેસ્ટિક ફ્લાઇટની ફિકવંસી પણ વધવાની છે. સાથે સાથે કાર્ગો ટર્મિનલ પણ બનવાનું છે. આનાથી નાના ઉદ્યોગો પણ ફાયદો થશે. નરેન્દ્ર મોદી સાહેબનું વિઝન અને પ્લાનિંગ એમાં ક્યારેય કોઈ શંકા રાખવાની જરૂર નથી. ફરી વખત કહું છું કે આ એક ટેમ્પરરી ટર્મિનલ છે.
'નવી વ્યવસ્થા ઉભી થતી હોય ત્યારે કોઈ નાની અગવડતા હોય'
તેઓએ વધુમાં જણાવ્યું કે, જે તે સમયે પાણીની લાઇનમાં ખરાબીના કારણે શૌચાલયોમાં પાણી આવી રહ્યું ન હતું, પરંતુ ટેમ્પરરી ટર્મિનલમાં પણ અત્યારે કોઈ અસુવિધા નથી. એપ્રિલ સુધીમાં રેગ્યુલર ટર્મિનલ ચાલું થવાનું છે. જ્યારે કોઈ નવી વ્યવસ્થા ઊભી થતી હોય ત્યારે સ્વાભાવિક છે કે શરૂઆતમાં નાની-મોટી અગવડતા ઊભી થાય, તે આપણે બધાએ સંભાળી લેવી જોઈએ. એટલા માટે કારણ કે આ રાજકોટ આપણું છે, આ એરપોર્ટ આપણું છે. લોકોની વચ્ચે સાચી માહિતી જાય તે માટે મેં આ વીડિયો બનાવ્યો છે. મહત્વનું છે કે, જય વસાવડાના વીડિયો બાદ ભાજપના પૂર્વ ધારાસભ્યએ વીડિયો બનાવી ખુલાસો કરવો પડ્યો જેને લઇને લોકો સોશિયલ મીડિયા પર પ્રતિક્રિયાઓ આપી રહ્યા છે.
જય વસાવડાએ એરપોર્ટની સુવિધાની કરી હતી ટીકા
આપને જણાવી દઈએ કે, જય વસાવડાએ તાજેતરમાં રાજકોટ હિરાસર ઇન્ટરનેશનલ એરપોર્ટ અંગે એક વીડિયો સોશિયલ મીડિયા પર મૂકીને એરપોર્ટની સુવિધા અંગે ટીકા કરી હતી. તેઓએ જણાવ્યું હતું કે, એરપોર્ટના શૌચાલયમાં પાણી જ નથી આવતું, ત્યાં પ્લાસ્ટીકની બે બોટલો મુકાઈ છે. સાથે જ રાજકોટનું નવું એરપોર્ટ શહેરથી 31 કિલોમીટર દૂર આવેલું છે. મુસાફરો માટે આ નવી નસીબની બલીહારી છે.
સુવિધાની મોટી-મોટી વાત પોકળ સાબિત થઈઃ જય વસાવડા
જય વસાવડાએ કહ્યું હતું કે, આપણા પીએમ મોદી જેવા તેવા પ્રોજેક્ટ હાથમાં લ્યે જ નહીં, તેમના પ્રોજેક્ટમાં ઉત્સવ જેવો માહોલ હોઈ. તેઓ ગુજરાતમાં હતા ત્યારે પણ તેમના પ્રોજેક્ટમાં ડિઝાઈન-પ્રેઝન્ટેશન અદભૂત રહ્યા છે. તો હિરાસર એરપોર્ટમાં આવું કેમ. એરપોર્ટમાં કાર્ડ બોર્ડના મોટા બોક્સ બનાવી એરપોર્ટ ઉભુ કરી દેવાયું છે. સેન્સ તથા એથીક વગરના ચોકઠા બનાવી દેવાયા છે. આ એરપોર્ટની સુવિધાની મોટી-મોટી વાત થઈ હતી, તે તમામ પોકળ સાબિત થઈ હોય તેવું લાગી રહ્યું છે.
